O vai ma te mau hoa o te Atua?

E Tamaiti o Iesu Mesia na Iehova e e hoa here rahi no ˈna. Hou oia a ora ˈi ei taata i te fenua nei, i ora na Iesu i te raˈi ei varua puai poietehia. (Ioane 17:5) Ua haere mai oia i te fenua nei no te haapii i te taata i te parau mau no nia i te Atua. (Ioane 18:37) Ua horoa atoa oia i to ˈna ora taata no te faaora i te mau taata faaroo i te hara e te pohe. (Roma 6:23) I teie nei, o Iesu te Arii o te Faatereraa arii a te Atua, te hoê faatereraa i te raˈi o te hopoi mai i te paradaiso i te fenua nei.—Apokalupo 19:16.

E mau hoa o te Atua atoa te mau melahi. Aita te mau melahi i haamata i te ora ei taata i te fenua nei. Ua poietehia ratou i te raˈi hou te Atua i hamani ai i te fenua. (Ioba 38:4-7) E mirioni melahi e vai ra. (Daniela 7:10) Te hinaaro nei teie mau hoa o te Atua i te raˈi ia haapii te taata i te parau mau no nia ia Iehova.—Apokalupo 14:6, 7.

E mau hoa atoa to te Atua i te fenua nei; te parau nei oia e e Ite ratou no ˈna. E faaite te hoê ite i mua i te haavaraa i ta ˈna i ite no nia i te hoê taata aore ra te hoê mea. E faaite te mau Ite no Iehova i ta ratou i ite no nia ia Iehova e ta ˈna opuaraa. (Isaia 43:10) Mai te mau melahi, te hinaaro nei te mau Ite e tauturu ia oe ia haapii i te parau mau no nia ia Iehova. Te hinaaro nei ratou ia riro atoa oe ei hoa no te Atua.