Te hoê faaararaa no mutaa iho

Eita Iehova e faatia ia tuino te feia iino i te paradaiso. O to ˈna mau hoa anaˈe te ora i reira. E roohia te feia iino i te aha? No te ite i te pahonoraa, a hiˈopoa na i te aamu mau o Noa. I ora na Noa e mau tausani matahiti i mairi. E taata maitai oia tei tutava noa i te rave i te hinaaro o Iehova. Ua rave râ te tahi atu mau taata o te fenua i te mau ohipa iino. No reira, ua faaite Iehova ia Noa e e hopoi mai Oia i te hoê diluvi no te haamou i teie feia iino atoa. Ua faaue oia ia Noa e patu i te hoê araka, eiaha o ˈna e to ˈna utuafare e pohe ia tae mai te diluvi.—Genese 6:9-18.

Ua patu Noa e to ˈna utuafare i te araka. Ua faaara o Noa i te taata e e tae mai te diluvi, aita râ ratou i faaroo i ta ˈna parau. Ua tamau ratou i te rave i te mau ohipa iino. I te otiraa te araka, ua aratai o Noa i te animara i roto i te araka, e ua tomo atura oia e to ˈna atoa utuafare i roto. Faatupu ihora Iehova i te hoê vero rahi. Ua topa te ûa e 40 mahana e e 40 po. Ua ninahia te fenua atoa i te pape.—Genese 7:7-12.

Ua pohe te feia iino, ua ora mai râ o Noa e to ˈna utuafare. Ua faaora Iehova ia ratou mai roto mai i te diluvi i nia i te hoê fenua tamâhia i te ino. (Genese 7:22, 23) Te na ô ra te Bibilia e e tae faahou â te tau e haamou ai Iehova i te feia e ore e rave i te mea maitai. Eita te feia maitai e haamouhia. E ora ratou e a muri noa ˈtu i roto i te paradaiso i te fenua nei.—Petero 2, 2:5, 6, 9.

I teie mahana te rave ra e rave rahi taata i te mau ohipa iino. Ua î te ao i te ati. Te tono noa nei Iehova i ta ˈna mau Ite no te faaara i te taata, aita râ te rahiraa e hinaaro nei e faaroo i te mau parau a Iehova. Aita ratou e hinaaro nei e taui i to ratou mau eˈa. Aita ratou e hinaaro nei e farii i ta te Atua e parau ra no nia i te mea maitai e te mea ino. E roohia teie feia i te aha? E taui anei ratou ia tae i te hoê mahana? Eita roa e rave rahi e taui. Te fatata mai ra te tau e haamouhia ˈi te feia iino e e ore roa ratou e ora faahou.—Salamo 92:7.

Eita te fenua e haamouhia, e faarirohia râ ei paradaiso. E ora te feia tei riro ei mau hoa no te Atua e a muri noa ˈtu i roto i te paradaiso i te fenua nei.—Salamo 37:29.