Tuhaa 8
A ora e a muri noa ˈtu i roto i te hoê paradaiso i nia i te fenua
1, 2. Eaha te huru o te oraraa i raro aˈe i te faatereraa a te Basileia o te Atua?
Eaha te huru o te oraraa ia faaore anaˈe te Atua i te ino e te mauiui i nia i te fenua e ia avari oia i ta ˈna ao apî i raro aˈe i te faatereraa aroha a to ˈna Basileia i nia i te raˈi? Te tǎpǔ nei te Atua e ‘e heheu oia i to ˈna rima, e e haamâha oia i te hiaai o te mau mea ora atoa nei.’—Salamo 145:16.
2 Eaha to tatou mau hiaai hohonu? E ere anei te hoê oraraa oaoa, te hoê ohipa hoona, te ruperupe i te pae materia, te hoê vahi unauna, te hau i rotopu i te mau nunaa atoa, e te tiamâraa mai i te parau-tia ore, te maˈi, te mauiui, e te pohe? E eaha ïa i te pae varua? Fatata roa teie mau mea atoa i te faatupuhia i raro aˈe i te faatereraa o te Basileia o te Atua. A tapao na eaha ta te mau parau tohu bibilia e faaite ra no nia i te mau haamaitairaa faahiahia i mua nei i roto i teie ao apî.
Te hau i rotopu i te huitaata nei
3-6. Eaha te haapapuraa e vai nei ia tatou e e fanaˈo te mau taata i te hau i roto i te ao apî?
3 “Ua faaore [te Atua] i te tamaˈi e tae roa aˈenei i te hopea fenua! ua ofati oia i te fana, e ua tapǔpǔ i te mahae, e ua tahuhia te mau pereoo tamaˈi ra i te auahi.”—Salamo 46:9.
4 “E tiapai ratou i ta ratou ˈoˈe ei auri arote, e ta ratou mau mahae ei tipi tope raau; e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.”—Isaia 2:4.
5 “Area te feia mǎrû ra, e parahi ïa i te fenua, e oaoa ratou i te rahi o te hau ra.”—Salamo 37:11.
6 “Ua parahi hau noa te fenua atoa nei, e aore e parau; ua puroro noa mai to ratou reo umere ma te oaoa.”—Isaia 14:7.
Te hau i rotopu i te taata e te mau animala
7, 8. Eaha te hau e itehia i rotopu i te mau taata e te mau animala?
7 “Ei reira te luko e parahi atoa ˈi raua o te arenio; e te nemera e te pinia mamoe, e apiti atoa ïa i te taotoraa; e te fanauˈa puaatoro, e te liona apî, e te puaatoro haaporia ra, hoê â amuiraa mai, e na te hoê tamaiti iti e aratai. Te puaatoro apî ra, e te daba maiaa ra, hoê â ïa amuraa, e hoê â taotoraa to te fanauˈa. E amu hoi te liona i te aihere mai te puaatoro atoa ra. E hauti noa hoi te tamarii aiû i te apoo o te asepi, e te tamaiti no mairi aˈe te û ra, e tuu ïa i te rima i nia i te pupuniraa o te zepho ra. E ore ratou e hauti, e ore e rave ino.”—Isaia 11:6-9.
8 “E ia tae i taua mahana ra e fafau ai au i te tahi faufaa no ratou i te mau manu o te fenua nei, e te mau manu o te raˈi ra, e te mau mea rii e nee i nia te fenua nei . . . e faataoto atu vau ia ratou ma te ora.”—Hosea 2:18.
Te oraora-maitai-raa tia roa, te ora mure ore
9-14. A faataa na i te huru o te oraora-maitai-raa i roto i te ao apî.
9 “Ei reira e faaaraarahia ˈi te mata o te matapo ra, e amaha hoi te tariˈa o te feia tariˈa turi ra: ei reira te pirioi e ouˈauˈa noa ˈi mai te aili, e himene mai hoi te vaha o te taata vava ra.”—Isaia 35:5, 6.
10 “E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa.”—Apokalupo 21:4.
11 “E ore hoi to te reira e parau e, Ua paruparu vau i te maˈi.”—Isaia 33:24.
12 “E rahi hoi te poria o to ˈna ra tino i to te tamarii; e hoˈi oia i tana apîraa ra.”—Ioba 33:25.
13 “Area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.”—Roma 6:23.
14 “Te faaroo ia ˈna ra, [e] roaa [ïa] te ora mure ore.”—Ioane 3:16.
E faaorahia mai te feia pohe
15-17. Eaha te tiaturiraa e vai nei no te feia o tei pohe ê na?
15 “E e tia-faahou-raa to tei pohe, te feia parau-tia e te feia parau-tia ore.”—Ohipa 24:15.
16 “Te fatata mai nei hoi te hora e faaroo ai te feia atoa i roto i te apoo ra [e haamanaˈohia ra e te Atua] i tana reo, e e haere mai i rapae.”—Ioane 5:28, 29.
17 “E ua tuu maira te miti i te feia i pohe i roto ia ˈna ra, e ua tuu maira te apoo e hade [te menema] i te feia i pohe i roto ia raua ra.”—Apokalupo 20:13.
Te fenua, te hoê Paradaiso tei î i te mau mea atoa
18-22. E riro mai te fenua atoa nei ei aha?
18 “Ei tuâ ua faatupu ïa. E hotu te mau raau o te ô ra i ta ratou maa, e tupu hoi to nia i te fenua ra; e parahi hoi ratou ma te ora i to ratou ra fenua.”—Ezekiela 34:26, 27.
19 “Ei reira e hotu rahi mai ai te fenua, e na te Atua, na to tatou iho Atua, e haamaitai mai ia tatou nei.”—Salamo 67:6.
20 “E rearea te medebara e te vahi pâpâmaro ra no ratou; e oaoa hoi te fenua aihere e e ruperupe hoi mai te tiare ra.”—Isaia 35:1.
21 “E haapuroro noa mai te mau mouˈa e te mau aivi i te himene oaoa na mua ia outou; e te mau raau atoa o te aru ra, e papai ïa i to ratou rima. E monohia te raau taratara, i te berusi; e monohia hoi te tataramoa, i te hedesa.”—Isaia 55:12, 13.
22 “Ei [te] paradaiso ïa oe e o vau atoa.”—Luka 23:43.
E fare maitai no te mau taata atoa
23, 24. Eaha te haapapuraa e e navai te mau fare maitatai no te taatoaraa?
23 “E patu ratou i te fare e na ratou iho e parahi . . . E ore ratou e patu e na vetahi ê e parahi; e ore ratou e tanu, e na vetahi ê e amu: . . . e vai taiata te aho o to ˈu ra feia i maitihia i to te mau mea ta ratou i hamani. E ore hoi ratou e ohipa faufaa ore noa; e ore ratou e faafanau i te tamarii pohe noa.”—Isaia 65:21-23.
24 “E parahi râ ratou o te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou.”—Mika 4:4.
E nehenehe outou e ora e a muri noa ˈtu i roto i te Paradaiso
25. Eaha te hiˈoraa nehenehe mau e vai nei no te tau i mua nei?
25 Auê ïa hiˈoraa faahiahia mau no te tau i mua nei! E tumu mau to te oraraa i teie nei ia tutauhia i nia i te tiaturiraa papu e, i roto i te ao apî a te Atua, e riro te mau fifi atoa o teie mahana ei mau mea no mutaa ihora! “E ore hoi tei mutaaihora e manaˈohia, e ore e faatupu-faahou-hia i roto i te aau.” (Isaia 65:17) E auê te tamahanaharaa e ia ite e e oraraa mure ore to reira: “E na [te Atua] e haamou roa i te pohe e a muri noa ˈtu.”—Isaia 25:8.
26. Eaha te ravea no te ora e a muri noa ˈtu i roto i te ao apî a te Atua?
26 Te hinaaro ra anei outou e ora e a muri noa ˈtu i roto i teie Paradaiso o te ao apî o tei fatata roa mai? ‘Eaha te tia ia ˈu ia rave no te fanaˈo i te farii maitai o te Atua i teie hopea o te ao nei e no te ora ˈtu i roto i ta ˈna ao apî?’ o ta outou paha ïa e ani mai. E tia ia outou ia rave i te mea ta Iesu i faaite i roto i te hoê pure o ta ˈna i faatae atu i te Atua: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.
27. Eaha te tia ia outou ia rave no te apiti atu i roto i te opuaraa a te Atua?
27 No reira, a rave mai i te hoê Bibilia, e a haapapu i te parau o ta outou i taio i roto i teie vea iti. A imi i te feia e tuatapapa nei e e haapii nei i teie mau parau mau bibilia. A haere mai i rapae i te mau haapaoraa haavare o te haapii ra e o te rave ra i te mau mea aore roa e tuea ra i te Bibilia. A haapii nafea outou, e tae noa ˈtu te mau mirioni taata ê atu o tei rave ê na i te hinaaro o te Atua, e nehenehe ai e apiti atu i roto i te opuaraa a te Atua ia ora te mau taata e a muri noa ˈtu i roto i te paradaiso i nia i te fenua nei. E a haafaufaa i ta te Parau faauruahia a te Atua e faaite ra no nia i te tau fatata roa i mua nei: “E te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.”—Ioane 1, 2:17.
[Hohoˈa i te api 31]
Fatata roa te opuaraa a te Atua e haamau faahou i te paradaiso i nia i te fenua i te tupu