Pene 24

Te tumu o Iesu i haere mai ai i nia i te fenua nei

MEA rahi roa te ohipa ta Iesu i rave i taua mahana ra i Kaperenaumi e ta ˈna mau pǐpǐ e maha ra, e ua faaoti oia e te feia no Kaperenaumi o tei afai mai i ta ratou feia maˈi atoa ia faaora o Iesu ia ratou i taua po ra. Aita ˈtura o Iesu i nehenehe e faaea o ˈna anaˈe iho ra.

Ua aahiata i teie nei. Te poiri noa râ, ua tia maira o Iesu e ua haere atura i rapae o ˈna anaˈe iho. Ua haere atura oia e tae roa ˈtu i te hoê vahi moemoe i reira oia e nehenehe ai e pure i to ˈna Metua. Aita râ o ˈna i faaea maoro o ˈna anaˈe ra no te mea ua haere o Petero e te tahi atu mau taata e imi ia ˈna i to ratou iteraa e ua reva oia.

Ia ite ratou ia Iesu, ua na ô atura Petero e: “Te maimi nei te taata taatoa ia oe.” Te hinaaro ra te feia no Kaperenaumi ia faaea mai Iesu ia ratou ra. Ua oaoa roa hoi ratou i te ohipa o ta ˈna i rave no ratou! Teie râ, ua haere mai anei Iesu i nia i te fenua nei no te faatupu i teie mau faaoraraa semeio? Eaha ta ˈna e parau ra no nia i teie tumu parau?

Ia au i te hoê faataaraa parau a te Bibilia, ua pahono atu o Iesu i ta ˈna mau pǐpǐ e: “Mai haere tatou i te mau oire fatata nei ia parau haere atoa vau i te basileia i reira; o to ˈu hoi ïa tere i haere mai ai.” A onoono mai ai te taata ia faaea mai oia, ua parau atu o Iesu e: “E parau haere â vau i te parau maitai o te basileia o te Atua i te mau oire ê atu â e tia ˈi, i tonohia mai ai hoi au.”

Oia mau, ua haere mai o Iesu i nia i te fenua nei no te poro i te Basileia o te Atua, o te faatiamâ i te iˈoa o to ˈna Metua e o te arai i te mau fifi atoa a te taata nei e a muri noa ˈtu. Teie râ, no te haapapu e na te Atua i tono mai ia ˈna, ua faatupu o Iesu i te mau faaoraraa semeio. Tau senekele na mua ˈtu, ua faatupu atoa o Mose i te tahi mau semeio, ei haapapuraa e e tavini mau â oia na te Atua.

I teie nei, a faarue mai ai Iesu ia Kaperenaumi no te haere e poro i te tahi atu mau oire, ua apee maira ta ˈna na pǐpǐ e maha ia ˈna. O Petero ïa e to ˈna taeae o Anederea, e o Ioane e to ˈna taeae o Iakobo. Te haamanaˈo ra paha outou e i te hebedoma na mua ˈtu, ua titau Iesu ia ratou ia riro mai ei hoa rave ohipa matamua no ˈna i roto i to ˈna mau tere.

Ua manuïa mau â te tere pororaa a Iesu i Galilea e ta ˈna na pǐpǐ e maha! Inaha, ua parare roa te parau no ta ˈna mau ohipa e tae roa ˈtu na Suria taatoa. Ua apee maira te mau tiaa rahi taata no Galilea, no Iudea, e no ǒ mai i Ioridana, ia Iesu e ta ˈna mau pǐpǐ. Mareko 1:35-39; Luka 4:42, 43; Mataio 4:23-25; Exodo 4:1-9, 30, 31.

▪ Eaha ta Iesu i rave i te poipoi aˈe, i muri aˈe i te mahana ohipa rahi i Kaperenaumi?

▪ No te aha Iesu i tonohia mai ai i nia i te fenua nei, e eaha te tumu mau o ta ˈna mau semeio?

▪ O vai tei apee ia Iesu i roto i to ˈna tere pororaa i Galilea, e mea nafea to te taata fariiraa i te mau ohipa a Iesu?