Pene 23

Te tahi atu mau semeio i Kaperenaumi

I TE Sabati i muri aˈe i to Iesu titauraa i ta ˈna mau pǐpǐ matamua e maha—o Petero, o Anederea, o Iakobo e o Ioane—ua haere paatoa ratou i te hoê sunago o te oire no Kaperenaumi. I reira, ua haapii ihora o Iesu, e ua maere roa ˈˈera te taata no te mea ua haapii oia ma te mana, eiaha râ mai ta te mau papai parau ra.

I taua mahana Sabati ra, tei reira atoa te hoê taata i uruhia i te demoni. Te tahi tau taime i muri iho, ua tuô ihora oia ma te reo puai: “Auê e Iesu i Nazareta e! eaha ta oe ia matou nei? i haere mai oe e haapohe ia matou? Ua ite au ia oe, o te Mea Moˈa ïa o te Atua ra.”

Te demoni e haavî ra i taua taata nei, o te hoê ïa o te mau melahi a Satani. Ua avau atura Iesu i te demoni, na ô atura: “A mamû, a haere i rapae au, e vaiiho atu ia ˈna!”

Ua roohia ˈtura teie taata i te ira iriti e ua pii ihora te demoni ma te reo puai. Teie râ, ua faarue oia i taua taata ra ma te ore e rave ino ia ˈna. Ua maere anaˈe ihora te mau taata atoa! “Eaha râ te reira?” o ta ratou i ani. “Te faaue nei hoi oia i te mau varua faufau ma te mana, e te faaroo nei ratou ia ˈna.” Ua atutu ihora teie parau na roto i taua fenua ra.

Ua faarue ihora o Iesu e ta ˈna mau pǐpǐ i te sunago e ua haere atura ratou i te fare o Simona, tei pii-atoa-hia o Petero. Ua pohehia hoi te metua hoovai vahine o Simona i te fiva puai. Ua taparu aˈera ratou ia Iesu e: ‘A tauturu na ia ˈna.’ Ua haere atura o Iesu i pihai iho ia ˈna, rave maira i to ˈna rima e ua faatia aˈera ia ˈna i nia. I reira iho, ua ora aˈera to ˈna maˈi, e ua faaineine ihora oia i te tahi maa na ratou!

I muri iho, ia mairi te mahana, ua haere maira te mau taata no te mau vahi atoa e ta ratou feia maˈi i te fare o Petero. E ua rǔrǔ maira to te oire atoa i mua i te uputa! Ua faaora aˈera o Iesu i te feia maˈi atoa, noa ˈtu eaha te huru o te maˈi. Ua faaora atoa oia i te feia i uruhia i te demoni. Ia haere mai ratou i rapae, ua pii hua te mau demoni o ta ˈna i tiavaru ra e: “O te Mesia oe te Tamaiti a te Atua.” Ua avau atura râ Iesu ia ratou e aita o ˈna i faatia ia ratou ia paraparau no te mea ua ite ratou e o ˈna te Mesia. Mareko 1:21-34; Luka 4:31-41; Mataio 8:14-17.

▪ Eaha tei tupu i roto i te sunago i te mahana Sabati i muri aˈe i to Iesu titauraa i ta ˈna mau pǐpǐ e maha ra?

▪ Ihea to Iesu haereraa i muri aˈe i to ˈna faarueraa i te sunago, e eaha te semeio ta ˈna i rave i reira?

▪ Eaha te ohipa i tupu i muri iho i tauâ ahiahi ra?