Pene 21

I te sunago o te oire o Iesu

EITA e ore e ua atutu te parau no te hoˈiraa mai o Iesu i Nazareta. Hou oia e faarue mai ai i te oire hau atu i te hoê matahiti na mua ˈtu no te haere atu e bapetizo ia ˈna ia Ioane ra, ua matauhia o Iesu mai te hoê tamuta. I teie nei râ, ua tui to ˈna roo ei taata faatupu semeio. Te hinaaro ra te feia e faaea ra i reira e ite ia ˈna ia rave i teie mau ohipa faahiahia mau ra i mua ia ratou.

Ua rahi roa ˈtu to ratou tiairaa a haere ai o Iesu, mai tei matauhia e ana, i te sunago o te oire. I reira, ua tia aˈera oia no te taio, e ua horoahia maira te otaro a te peropheta ra o Isaia. Ua itea maira ia ˈna te irava e parauhia ra no nia i te Taata ta Iehova i faatavai i to ˈna varua, e vai ra i roto i ta tatou Bibilia i teie mahana i roto i te pene 61.

I muri aˈe i to ˈna taioraa e e poro taua taata ra i te faaora i te feia aau oto, e ia ite faahou te matapo, e e poro oia i te matahiti e itehia mai e Iehova, ua faahoˈi atura Iesu i te otaro i te tavini e ua parahi atura. Tei nia te mau mata atoa ia ˈna. Ua parau ihora oia, tau taime paha te maoro, e ua faataa ˈtura e: “Teie nei parau i papaihia ta outou i faaroo iho nei, ua tupu ïa i teie nei mahana.”

Ua maere roa te taata i ta ˈna “mau parau maitatai” e ua parau atura ratou ratou iho: “E ere anei teie te tamaiti a Iosepha ra?” Ua ite râ Iesu e te hinaaro ra ratou e ia faatupu o ˈna i te mau semeio, e ua parau faahou maira oia e: “E riro outou i te faaau mai ia ˈu i te maa parau ra e, E te tahuˈa ra, a faaora ia oe iho: te ohipa ta oe i rave i Kaperenaumi ra ta matou i faaroo aˈenei, e rave atoa i ô nei, i to oe nei fenua.” Ma te papu maitai, ua manaˈo te feia ta Iesu i matau na i mutaa ihora e mea tia mau ia faatupu na mua Iesu i te faaoraraa i roto i to ˈna iho oire, ia fanaˈo na mua to ˈna iho mau taata. No reira ratou i manaˈo ai e ua haafaufaa ore Iesu ia ratou.

Ua taa râ ia Iesu i to ratou manaˈo, e ua faataa ˈtura oia i te tahi aamu. Mea rahi te mau vahine ivi i Iseraela i te tau o Elia, ta ˈna ïa e parau ra, aita râ o Elia i tonohia ˈtu i te hoê noa ˈˈe o taua mau vahine ra. Teie râ, ua haere oia i te hoê vahine ivi no Sidona e ere i te Iseraela, e ua faaora ˈtura oia i te taata na roto i te hoê semeio. Mea rahi atoa te lepera i te tau o Elisaia, o Naamana anaˈe râ, te hoê taata no Arama, o ta ˈna i faaora.

No to ratou riri i teie mau faaauraa au ore no roto mai i te aamu ra o te faaite tahaa ra i to ratou miimii e to ratou faaroo ore, ua tia maira te feia i roto i te sunago e ua tiahi atura ia Iesu i rapae i te oire. Ua tamata aˈera ratou i te turai ia ˈna na nia mai i te mouˈa tei reira to ratou oire i te paturaahia. Ua ora mai râ o Iesu i to ratou rima e ua haere ê atura. Luka 4:16-30; Te mau arii 1, 17:8-16; Te mau arii 2, 5:8-14.

▪ No te aha te oire no Nazareta i atutu ai?

▪ Eaha te manaˈo o te taata i te oreroraa parau a Iesu, no te aha râ ratou i riri roa ˈi?

▪ Eaha ta te taata i tamata i te rave i nia ia Iesu?