Pene 20

Te piti o te semeio i Kana

A HOˈI mai ai Iesu i to ˈna vahi faaearaa i muri aˈe i te hoê pororaa maoro i Iudea, aita ïa o ˈna i faafaaea noa. Aita, ua haamata râ oia i te hoê taviniraa hau atu i te rahi i Galilea, te vahi oia i paari ai. Teie râ, maoti i te faaea mai ia ˈna ra, ua hoˈi atura ta ˈna mau pǐpǐ i to ratou mau utuafare e ua rave faahou atura i te mau ohipa o ta ratou i faarue atu.

Eaha te poroi ta Iesu i haamata i te poro? Teie ïa: “Te fatata mai nei te basileia o te Atua; a tatarahapa, a faaroo mai i te evanelia nei.” Eaha ïa te huru o te taata? Ua farii te feia no Galilea ia Iesu. Ua faahanahana ratou paatoa ia ˈna. Teie râ, e ere anaˈe no ta ˈna poroi, no te mea râ e rave rahi i rotopu ia ratou tei tae atu i Ierusalema i te oroa Pasa ra, tau avaˈe na mua ˈˈe, e ua ite hoi ratou i te mau tapao faahiahia ta Iesu i rave.

Mai te mea ra e ua haamata o Iesu i ta ˈna taviniraa rahi i Galilea ra, i Kana. Te haamanaˈo ra paha outou e, i to ˈna hoˈiraa mai na Iudea mai tau taime na mua ˈtu, ua taui oia i te pape ei uaina i te hoê oroa faaipoiporaa i taua oire nei. I te piti o to ˈna tere i Kana, e maˈi iti rahi to te tamaiti a te hoê taata toroa a te arii ra o Heroda Anitipa. Ia ite taua taata toroa ra e ua tae mai Iesu mai Iudea mai i Kana, ua faarue maira oia i to ˈna vahi faaearaa i Kaperenaumi no te haere atu e farerei ia Iesu. No to ˈna mauiui rahi, ua taparu atura oia ia Iesu e: ‘Haere mai e te Fatu, e pohe ta ˈu tamaiti.’

Ua pahono atura Iesu e: ‘A hoˈi i te fare. Ua ora to tamaiti!’ Ua tiaturi ihora teie taata toroa a Heroda e ua rave atura i te tere atea no te hoˈi i to ˈna fare. I nia i to ˈna eˈa, ua farerei oia i ta ˈna mau tavini tei ru mai no te faaite ia ˈna e ua maitai roa—ua ora hoi ta ˈna tamaiti! Ua ani atura oia: ‘I teihea hora i huru maitai mai ai oia?’

‘Mai ananahi ra, i te hora hoê o te avatea,’ ta ratou ïa i pahono mai.

Ua haamanaˈo aˈera te taata toroa e o te hora mau hoi o Iesu i parau ai e: ‘Ua ora to tamaiti!’ I muri aˈe i te reira, ua riro maira taua taata ra e to ˈna utuafare paatoa ei pǐpǐ na te Mesia.

Ua riro atura ïa o Kana ei oire faufaa mau, i reira to Iesu tapaoraa i to ˈna hoˈiraa mai na Iudea mai na roto i te faatupuraa i te semeio e piti taime. Oia mau, e ere hoi te reira anaˈe ta ˈna i faatupu e tae roa mai i taua taime ra, mea faufaa roa râ no te mea ua tapao teie mau semeio i to ˈna hoˈiraa mai i Galilea.

Ua hoˈi atura o Iesu i to ˈna utuafare ra i Nazareta. Eaha ïa te roohia i nia ia ˈna i reira? Ioane 4:43-54; Mareko 1:14, 15; Luka 4:14, 15.

▪ Ia hoˈi mai Iesu i Galilea, e nafea ïa ta ˈna mau pǐpǐ, e nafea te nunaa ia farii mai ia ˈna?

▪ Eaha te semeio ta Iesu i faatupu, e eaha te huru o te feia i fanaˈo i te reira?

▪ Mea nafea te oire no Kana i te haafaufaaraahia e Iesu?