Piti o te semeio i Kana

I muri iho e piti mahana i Samaria, haere ihora Iesu i to ˈna fenua. I poro haere na oia na Iudea, te hoˈi ra râ oia i Galilea e ere no te faafaaea. E haamata râ oia i te hoê taviniraa rahi atu â i te fenua i paari mai ai oia. Aita oia i manaˈo e e farii-maitai-hia oia i ǒ, mai ta ˈna hoi i parau, “e ore te hoê peropheta e faaturahia i to ˈna iho fenua.” (Ioane 4:44) Aita ta ˈna mau pǐpǐ i faaea i pihai iho ia ˈna, ua hoˈi râ i to ratou fetii ra e i ta ratou ohipa na mua ˈˈe.

Eaha te poroi ta Iesu i haamata i te poro? “Ua fatata mai te Faatereraa arii a te Atua. A tatarahapa e a tiaturi i te parau apî oaoa.” (Mareko 1:15) Eaha te huru o te taata? Mea rahi to Galilea tei farii maitai ia Iesu, a arue ai ia ˈna. E ere noa no ta ˈna poroi. No te mau tapao faahiahia atoa râ ta ˈna i faatupu, ta vetahi no Galilea tei haere i te Pasa i Ierusalema tau avaˈe na mua ˈtu i ite.—Ioane 2:23.

Ihea to Iesu haamataraa i ta ˈna taviniraa rahi na Galilea? E au ra e i Kana, i reira to ˈna tauiraa i te pape ei uaina i te hoê oroa faaipoiporaa. I to ˈna hoˈiraa ˈtu, faaroo ihora Iesu e e maˈi rahi to te hoê tamaroa tei fatata i te pohe. E tamaiti oia na te hoê taata toroa a te arii Heroda Anitipa, tei faaue ia tâpûhia te upoo o Ioane Bapetizo i muri aˈe. Faaroo ihora taua taata toroa ra e ua tae mai Iesu i Kana na Iudea mai. Faarue ihora oia i to ˈna fare i Kaperenaumi no te haere i Kana e imi ia Iesu. Parau onoono maira taua taata toroa ra ma te oto ia Iesu: “E te Fatu, a pou na ia ore ta ˈu tamaiti iti e pohe.”—Ioane 4:49.

Eita e ore e ua maere taua taata ra i ta Iesu pahonoraa: “A haere, te ora ra to tamaiti.” (Ioane 4:50) Tiaturi ihora te taata toroa ia Iesu e hoˈi atura i ǒ ˈna. A pou atu ai oia, farereihia maira oia e ta ˈna mau tavini tei haere ru mai e faaite ia ˈna i te parau apî oaoa. Oia mau, te ora ra ta ˈna tamaiti e mea maitai oia! Ui atura oia i teihea taime i maitai mai ai ta ˈna tamaiti, no te taa i te ohipa i tupu.

Pahono maira ratou: “Inanahi ra i te hitu o te hora i pee ai to ˈna fiva.”—Ioane 4:52.

Taa ihora i te taata toroa e o te hora mau â i parau ai Iesu: “Te ora ra to tamaiti.” I muri aˈe, riro maira taua taata taoˈa rahi ra, inaha e tavini ta ˈna, e to ˈna atoa utuafare taatoa ei pǐpǐ na te Mesia.

I Kana ïa to Iesu faatupuraa i te semeio e piti taime, to ˈna tauiraa i te pape ei uaina e i muri aˈe to ˈna faaoraraa i te maˈi o te tamaroa na te atea ê, oia hoi fatata e 26 kilometera i te atea. Parau mau, e ere te reira anaˈe ta ˈna mau semeio. Mea faufaa râ te piti o te semeio, e taa ïa i te taata e ua hoˈi mai oia i Galilea. E peropheta mau â oia tei fariihia e te Atua. E faatura-noa-hia anei râ teie peropheta i to ˈna iho fenua?

E itehia te reira ia hoˈi Iesu i to ˈna oire o Nazareta. Eaha te tiai mai ra ia ˈna?