I te mau taime atoa, ua hau ê anei te Atua ia Iesu?
AITA roa ˈtu Iesu i parau noa ˈˈe e o o ˈna te Atua. Aita te mau mea atoa ta ˈna i parau no ˈna iho i faaaifaito ia ˈna i te Atua — no nia i te puai, te ite, te matahiti.
Maoti to ˈna faaearaa i nia i te raˈi aore ra i nia i te fenua, ua faaite tamau ta ˈna mau parau e to ˈna haerea e te auraro ra o ˈna i te Atua. I te mau taime atoa, o te Atua te teitei aˈe, o Iesu tei raro aˈe, e mea poietehia oia e te Atua.
Ua taa ê Iesu i te Atua
UA FAAITE pinepine Iesu e e poieteraa taa ê oia i te Atua, e Atua to nia ˈˈe ia ˈna, hoê Atua o ta ˈna e haamori ra, hoê Atua o ta ˈna e pii ra “Metua”. Ma te pure i te Atua, oia hoi to ˈna Metua, te parau ra o Iesu e: “Oe, i te Atua mau ra.” (Ioane 17:3). I roto i te Ioane 20:17, te parau ra oia ia Maria i Magadala e: “Te haere nei au i nia, i taˈu Metua e i to outou Metua, i taˈu Atua e i to outou Atua.” (V.C.J.S.). I roto i te Korinetia 2, 1:3, te haapapu ra te aposetolo Paulo e, te vai ra taua mau huru taairaa i rotopu ia Iesu e te Atua: “Ia haamaitaihia te Atua, te Metua o to tatou Fatu ra o Iesu Mesia.” I te mea e, e Atua to Iesu, to ˈna Metua, eita ïa oia e nehenehe e riro mai, i taua iho taime, i taua Atua ra.
Aita te aposetolo Paulo i haamarirau i te parau e e piti taata taa ê o Iesu e te Atua: “Area ia tatou nei, hoê roa ïa Atua, o te Metua, (...) e hoê hoi Fatu, o Iesu-Kirito.” (Korinetia 1, 8:6, V.C.J.S.). Te haapapu ra te aposetolo te taa-ê-raa e vai ra i rotopu i te Atua e ia Iesu, i te na ôraa e: “Te aˈo atu nei ia oe i mua i te aro o te Atua, e te Kirito ra o Iesu, e te mau melahi i maitihia ra.” (Timoteo 1, 5:21, V.C.J.S.). Mai ta Paulo e faataa ê ra ia Iesu i te mau melahi no te raˈi, te na reira atoa ra oia no Iesu e no te Atua.
E auraa to te mau parau ta Iesu e faahiti ra i roto i te Ioane 8:17, 18. Te na ô ra oia e: “Ua papaihia hoi i roto i ta outou ture na, Ia faatia mai na taata toopiti ra, e parau-tia ïa. O vau hoi te hoê i faatia ia ˈu iho, e te Metua hoi o tei tono mai ia ˈu nei te hoê i faatia atoa mai ia ˈu.” Te faataa ra o Iesu i ǒ nei e e piti taata taa ê to ˈna Metua, oia hoi te Atua Mana Hope, e o o ˈna iho; mai te mea e aita, nafea ïa raua e nehenehe ai e riro ei ite toopiti?
Ua faataa faahou o Iesu e e poieteraa taa ê oia i te Atua, a parau ai oia e: “Eaha oe i parau mai e, ua maitai au? Hoê roa râ te maitai, o te Atua anaˈe ra.” (Mareko 10:18, V.C.J.S.). Ua haapapu Iesu na roto i taua mau parau e, aita e taata i hau ê i te maitai maoti ra o te Atua iho, aita atoa o Iesu iho. Na roto i to ˈna maitai hau ê i te rahi, mea taa ê te Atua ia Iesu.
Te hoê tavini e auraro ra i te Atua
MEA pinepine i roto i te mau Papai, te faahiti ra o Iesu i te mau parau mai teie te huru: “E ore e tia i te Tamaiti ia rave i te hoê mea oia anaˈe ra; te rave râ oia i ta ˈna i ite i te Metua i te raveraa.” (Ioane 5:19, V.C.J.S.). “I pou mai nei hoi au mai te raˈi mai e haapao i to tei tono mai ia ˈu nei hinaaro.” (Ioane 6:38). “Ere i ta ˈu ta ˈu e haapii nei, na ˈna râ, na tei tono mai ia ˈu nei.” (Ioane 7:16). E ere anei te taata tei tono tei hau aˈe i te taata tei tonohia?
Te ite-papu-hia ra to Iesu tiaraa ia faaauhia i to ˈna Metua i roto i te parabole o te ô vine. Te faaau ra Iesu i te Atua, to ˈna Metua, i te fatu ô vine tei reva i te ara e o tei vaiiho i ta ˈna ô vine i te feia faaapu e faahohoˈa ra i te upoo faatere haapaoraa ati iuda. I muri iho, i to te fatu ô vine tonoraa i te hoê o to ˈna mau tavini no te ani i te tahi maa hotu vine, ua tairi te feia faaapu i taua tavini ra e ua faahoˈi ratou ia ˈna e aita e taoˈa. Ua tono faahou te fatu ô vine i te piti e te toru o te tavini: ua roo-atoa-hia raua i te hoê â huru raveraa. I te pae hopea, ua parau te fatu o taua ô vine ra e: “E tono vau i ta ˈu tamaiti [Iesu] here, e ite maitai mai paha ratou ia ˈna ia hiˈo mai.” Feruri ihora râ te feia faaapu ino e: “O te taata aiˈa teie, tatou e taparahi ia riro mai te fenua ia tatou iho. Hopara maira ratou ia ˈna i rapae au i taua ô vine ra, e taparahi pohe roa ihora.” (Luka 20:9-16). I roto i taua parabole ra, te faataa ra o Iesu i to ˈna tiaraa ia faaauhia i to te Atua: mai te hoê tamaiti auraro ta to ˈna Metua e tono ra, ua tonohia oia e te Atua no te faatupu i To ˈna hinaaro.
Ua hiˈo tamau noa te mau pǐpǐ a Iesu ia ˈna mai te hoê tavini e auraro ra i te Atua, eiaha râ mai te hoê taata aifaito i te Atua. Ma te pure i te Atua, ua na ô atura ratou ia ˈna e: “I to Tamaiti moâ ra ia Iesu, ta oe i faatahinu ra, (...) ei faaora, e ia rave hia te mea maere e te semeio i te ioa o to Tamaiti moâ ra o Iesu.” — Ohipa 4:23, 27, 30, V.C.J.S.
O te Atua te teitei aˈe i te mau taime atoa
I TE haamataraa iho â o te taviniraa a Iesu, i to ˈna haereraa mai i rapae au i te pape i muri aˈe i to ˈna bapetizoraa, ua faaroohia aˈera te reo o te Atua mai nia mai i te raˈi ra i te na ôraa e: “Tau Tamaiti here teie, ua mauruuru roa vau ia ˈna.” (Mataio 3:16, 17). Ua hinaaro anei te Atua e parau e, o ˈna iho ta ˈna tamaiti, ua mauruuru o ˈna ia ˈna iho e na ˈna iho i tono atu ia ˈna? Aita roa ˈtu, ua parau râ te Atua te Poiete, mai te teitei aˈe, e ua mauruuru oia i te hoê taata tei raro aˈe Ia ˈna, ta ˈna Tamaiti, o Iesu, ia rave oia i te hoê ohipa.
Ua faaite mai Iesu e, o to ˈna Metua te teitei aˈe ia ˈna, i to ˈna parauraa e: “Tei nia iho ia ˈu te varua o te Fatu, oia i faatahinu mai ia ˈu ei poro haere i te parau maitai i te taata rii.” (Luka 4:18). Te faatahinuraa oia ïa te horoaraa i te mana aore ra te hoê ohipa i te hoê taata aore â e mana to ˈna no ǒ mai i tei teitei aˈe ia ˈna. E mea papu maitai ïa i ǒ nei e o te Atua iho tei Teitei aˈe, no te mea ua faatahinu oia ia Iesu, ua horoa oia i te hoê mana e aita hoi taua mana ra ia ˈna i mutaa ihora.
I te tahi atu â taime, ua faaite o Iesu e, o to ˈna Metua tei teitei aˈe ia ˈna. I to te metua vahine o na pǐpǐ toopiti aniraa ˈtu ia ˈna e ia parahi ta ˈna na tamaiti i to ˈna pae atau e to ˈna pae aui, ia haere oia i roto i to ˈna Basileia, ua pahono atura Iesu e: “Area te parahi i ta ˈu rima atau e ta ˈu rima aui ra, eita ïa e tia ia ˈu ia horoa, maori ra i te feia i haapao hia tereira e ta ˈu Metua [oia hoi te Atua].” (Mataio 20:23, V.C.J.S.). Mai te peu e, o Iesu iho te Atua Mana Hope, e mana ïa to ˈna no te horoa i taua mau haamaitairaa ra; aita râ oia i nehenehe e na reira, no te mea na te Atua hoi te reira, e ere hoi o Iesu te Atua.
Ua riro mau te mau pure a Iesu ei faahiˈoraa papu mau no to ˈna tiaraa iti aˈe i to ˈna Atua. A fatata ˈi Iesu i te pohe, ua faaite oia e, o vai te teitei aˈe ia ˈna ma te pure e: “E tau Metua, ia tia ia oe ra e hopoi ê atu i teie nei aˈua; ia tupu râ to oe hinaaro eiaha to ˈu.” (Luka 22:42). O vai ta Iesu e pure ra? Te hoê tuhaa anei no ˈna iho? Aita, te pure ra oia i te hoê taata taa ê mau ia ˈna, to ˈna Metua, te Atua, e o to ˈna hinaaro — e nehenehe hoi e riro i te mea taa ê i to ˈna — te upootia mai, o O ˈna anaˈe te nehenehe e ‘hopoi ê atu i teie nei aˈua’.
I muri iho, a piri roa mai ai to ˈna poheraa, ua pii hua o Iesu e: “E taˈu Atua, e taˈu Atua, e aha oe i faarue mai ai ia ˈu.” (Mareko 15:34, V.C.J.S.). O vai ta Iesu e pii ra? Ia ˈna iho aore ra i te hoê tuhaa no ˈna iho? E mea papu mau, e ere taua pii ra (“ta ˈu Atua”) no ǒ mai i te hoê taata e faariro ra ia ˈna ei Atua. Hau atu, ahiri e o Iesu te Atua, na vai ïa e faarue ra ia ˈna? Na ˈna iho anei? Aita roa ïa e auraa to te reira. Ua parau atoa o Iesu e: “E tau Metua, te tuu atu nei au i tau varua i to rima ra.” (Luka 23:46). Ahiri e o Iesu te Atua, no te aha oia i tuu ai i to ˈna varua i to ˈna Metua?
I muri aˈe i to ˈna poheraa, e toru mahana to Iesu vairaa i roto i te menema. Ahiri e o Iesu te Atua, ua hape ïa te irava i roto i te Habakuka 1:12 e parau ra e: “E tau Atua, e Tei Moˈa ra, e ore [oe] e pohe.” Teie râ, te faataa maitai maira te Bibilia e ua pohe mau Iesu e i roto i te menema tei roto oia i te hoê huru taa-ore-roa-raa. I te tahi aˈe pae, na vai i faatia mai ia Iesu mai roto mai i te pohe? Mai te peu e ua pohe mau oia, eita oia e nehenehe e faatia mai ia ˈna iho. Mai te peu e aita oia i pohe, eita ïa te hoo no te hara a Adamu e nehenehe e pee. Teie râ, ua aufau mau Iesu na roto i to ˈna pohe te hoo titauhia. “Oia hoi ta te Atua i faatia aˈenei [Iesu], ua matara hoi ia ˈna te tapearaa o te pohe.” (Ohipa 2:24). Ua faatia mai te Atua Mana Hope, tei Teitei aˈe, i to ˈna tavini o Iesu, tei raro aˈe ia ˈna, mai te pohe mai.
Ua faatupu Iesu i te mau semeio: ei hiˈoraa, ua faatia oia i te feia pohe. Te faaite ra anei te reira e o o ˈna iho te Atua? Ua noaa atoa taua mana ra i te mau aposetolo e te mau peropheta ra o Elia e o Elisaia; e taata noa hoi ratou. Ua horoa te Atua i te mau peropheta, ia Iesu e i te mau aposetolo te mana no te faatupu i te mau semeio no te faaite atu e, te turu ra te Atua ia ratou. Teie râ, aita hoê aˈe o ratou i riro mai ei tuhaa no te hoê Atua e rave rahi atua i roto ia ˈna.
E ite taotiahia to Iesu
I TO Iesu faahitiraa i ta ˈna parau tohu no nia i te hopea o te amuiraa o te mau mea nei, ua parau oia e: “Area i taua mahana e i taua hora ra, aore roa te hoe taata i ite, aore hoi te mau melahi i te rai ra, e aore atoa te Tamaiti, o te Metua anae râ.” (Mareko 13:32, V.C.J.S.). Ahiri Iesu i aifaito i te Metua i roto i te Toru Tahi, e ite ïa o ˈna i te mea ta te Metua i ite; aita râ oia i ite no te mea aita oia i aifaito i te Atua.
Oia atoa, te taio ra tatou i roto i te Hebera 5:8 e ua “ite oia [Iesu] i te auraro i to ˈna ra mau pohe”. E nehenehe anei e feruri e te vai ra te hoê ohipa te tia i te Atua ia haapii? Eita. Area râ o Iesu e tia ïa ia ˈna ia na reira, no te mea aita oia i ite i te taatoaraa o te mau mea ta te Atua i ite. Hau atu, ua tia ia ˈna ia haapii i te hoê mea aore hoi e tia i te Atua ia haapii: te auraro. Oia mau, eita e tia i te Atua ia auraro ia vetahi ê.
Te vai noa râ te taa-ê-raa i rotopu i te mea ta te Atua i ite e ta Iesu i ite i te taime i faatia-faahou-hia mai ai oia mai te pohe mai no te parahi i pihai iho i te Atua. Teie te mau parau omuaraa o te buka hopea o te Bibilia: “Te Apokalupo [te heheuraa aore ra faaiteraa] a Iesu-Kirito, ta te Atua i tuu mai iana ra.” (Apokalupo 1:1, V.C.J.S.). Ahiri e melo Iesu no te hoê huru atua, e tia anei e na te tahi atu melo o taua huru atua ra, oia hoi te Atua iho, ia horoa ˈtu ia ˈna te hoê faaiteraa? E tia ïa ia ˈna ia ite i taua faaiteraa ra, i te mea e ua ite te Atua i te reira. Aita râ Iesu i ite i te reira no te mea e ere oia i te Atua iho.
Te tamau noa ra Iesu i te auraro i te Atua
NA MUA ˈˈE e a ora ˈi oia ei taata, ua auraro Iesu i te Atua. I muri aˈe i to ˈna tia-faahou-raa, aita taua tiaraa i raro aˈe i te Atua i taui: ua auraro noâ Iesu i te Metua e ua vai noâ oia i te piti o te parahiraa.
I to ratou aparauraa no te tia-faahou-raa o Iesu, ua parau Petero e te feia atoa i pihai iho ia ˈna, i te mau ati Iuda no te Sunederi ra e: “Oia [Iesu] ta te Atua i faateitei aˈenei i tana rima atau.” (Ohipa 5:31). Ua papai Paulo e: “I faateitei roa ˈtu ai te Atua ia ˈna.” (Philipi 2:9). Ahiri o Iesu te Atua, nafea ïa o ˈna i te tuuraahia i te hoê tiaraa teitei aˈe i to mutaa ihora? Ua riro aˈena ïa oia ei melo teitei no te Toru Tahi. Mai te peu e, hou oia i faateiteihia ˈi, ua aifaito Iesu i te Atua, e tuu ïa to ˈna faateiteiraa ia ˈna i nia ˈˈe i te Atua.
Ua parau atoa Paulo e ua tomo Iesu “i roto râ i te rai mau (...), ia faaite oia iana iho i teienei â i mua i te aro o te Atua, no tatou”. (Hebera 9:24, V.C.J.S.) Te taata e tia ra i mua i te aro o te tahi taata ê atu, o o ˈna anei taua taata ra? Eita ïa e tia. E taata taa ê ïa ia ˈna iho.
Na reira atoa, hou o Setephano, te taata i haamauiui-pohe-hia no to ˈna faaroo, i pehihia ˈi i te ofai, ua “hiˈo tamau maite atura i nia i te raˈi, e ite atura i te hanahana o te Atua, e ia Iesu i te tia-maite-raa i te rima atau o te Atua ra”. (Ohipa 7:55.) E mea papu e ua ite o Setephano e piti taata taa ê eiaha râ te varua moˈa aore ra te Toru Tahi.
I roto i te Apokalupo 4:8 e tae atu i te 5:7, te itehia ra te Atua eiaha râ o Iesu i te parahiraa i nia iho i te terono e vai ra i nia i te raˈi. O Iesu iho râ, ua haafatata ˈtu ïa no te rave i te hoê otaro mai roto mai i te rima atau o te Atua. Te faataa atoa ra taua orama ra e, i roto i te raˈi iho, e ere Iesu i te Atua, e mea taa ê oia Ia ˈna.
Ia au i tei parauhia aˈenei, teie te parau e taiohia ra i roto i te Vea no roto mai i te vahi vairaa buka a John Rylands, neneihia i Manchester, i te fenua Beretane e: “I roto i te oraraa varua i nia i te raˈi, ua tapea noa Iesu, i muri aˈe i to ˈna tia-faahou-raa, i te hoê ihotaata taa ê maitai i te ihotaata o te Atua, mai te taime a ora ˈi oia i nia i te fenua. I pihai iho i te Atua e ia faaau-anaˈe-hia o ˈna i te Atua ra, mai te mau melahi atoa ïa o ˈna, e mea poiete-taa-ê-hia o ˈna i nia i te mau raˈi a te Atua; tera râ, no te mea e Tamaiti oia na te Atua, e huru taa ê ïa to ˈna e ei hanahana taa ê atoa to ˈna i to te mau melahi.” — Hiˈo Philipi 2:11.
Te faahiti faahou ra taua vea ra e: “Teie râ, aita te mau parau e parauhia ra no nia i te oraraa e te mau ohipa a te Mesia i nia i te raˈi ra, noa ˈtu â ïa e tiaraa atua to ˈna, e faaaifaito ra ia ˈna i te Atua e o oia iho te Atua. Tera râ, na te mau haapapuraa e horoahia ra e te Faufaa Apî no nia ia ˈna e ta ˈna ohipa e faaite ra e ua taa ê oia i te Atua e te auraro ra o ˈna i te Atua.”
I roto i te mau raˈi, e vai noa Iesu e a muri atu ei tavini no te Atua, taa ê i te Poiete, e e auraro oia Ia ˈna. O ta te Bibilia ïa e haapapu ra i te na ôraa e: “O te hopea ihora: ia pupu atura oia [Iesu] i te basileia i te Atua e te Metua ra, (...) i reiraˈtoa e tuu hia te Tamaiti iho i raro ae iana i tei tuu i te mau meaˈtoa i raro ae iana ra, ia riro te Atua ei taoa taatoa i te feia moâˈtoa ra.” — Korinetia 1, 15:24, 28, V.C.J.S.
Aita roa ˈˈe Iesu i faahua parau e o te Atua oia
MEA maramarama mau te tiaraa o te Bibilia. E ere noa e mea taa ê te Atua Mana Hope ra o Iehova ia Iesu, i te mau taime atoa, ua hau aˈe iho â te Atua ia Iesu. Ua faaite-noa-hia Iesu mai te hoê tavini haehaa o te Atua, taa ê ia ˈna e tei raro aˈe ia ˈna. No te reira te Bibilia i faataa ˈi ma te feaa ore e o “to te Mesia ra upoo, o te Atua ïa”; na reira atoa o “te Mesia te upoo o te taata atoa nei”. (Korinetia 1, 11:3.) Ua parau o Iesu iho e: “E rahi ae hoi te Metua iaˈu.” — Ioane 14:28, V.C.J.S.
E mea mau te reira, te rahi roa ˈtura te feia tuatapapa Bibilia e faˈi ra i te reira: e ere Iesu i te Atua, e aita oia i faahua parau noa ˈˈe e o o ˈna te Atua. Mai ta te vea ra i nia aˈe e faahiti ra, “e tia mau ia fariihia te reira: ua aratai te mau tuatapaparaa i ravehia i na toru ahuru aore ra maha ahuru matahiti hopea i mairi aˈenei i nia i te Faufaa Apî, i te feia tuatapapa Bibilia tuiroo i te faaotiraa ra e aita Iesu (...) i parau noa ˈˈe e o te Atua oia”.
Ua parau atoa taua vea ra no te mau kerisetiano matamua e: “No reira, ia faaohipa ratou i te tahi mau iˈoa no te faahanahana mai Mesia, Tamaiti a te taata, Tamaiti a te Atua e Fatu [no Iesu], ua hinaaro ratou e parau e te rave ra oia i te ohipa a te Atua eiaha râ o te Atua iho oia.”
No reira, te farii atoa ra te feia e tatara ra i te parau faaroo e e patoi te manaˈo ra e: o Iesu te Atua, i te taatoaraa o te haapiiraa a te Bibilia. Teie hoi ta te Bibilia e parau nei, i te mau taime atoa, o te Atua iho â te teitei aˈe ia Iesu oia to ˈna tavini e auraro noa ra Ia ˈna.
[Parau iti faaôhia i te api 19]
‘Ua aratai te mau tuatapaparaa i nia i te Faufaa Apî, i te feia tuatapapa Bibilia i te faaotiraa e aita Iesu (...) i parau noa ˈˈe e o te Atua o ˈna.’ — Vea no te fare vairaa buka a John Rylands.
[Hohoˈa i te api 17]
Ua parau Iesu i te mau ati Iuda e: “I pou mai nei hoi au mai te raˈi mai e haapao i to tei tono mai ia ˈu nei hinaaro, eiaha to ˈu iho hinaaro.” — Ioane 6:38.
[Hohoˈa i te api 18]
I to Iesu pii-hua-raa ˈtu e: “E taˈu Atua, e taˈu Atua, e aha oe i faarue mai ai ia ˈu?” ua papu mau ïa ia ˈna e e ere oia i te Atua.