Po auahi

Auraa: E itehia te parau ra “po auahi” i roto e rave rahi huriraa o te Bibilia. E iriti vetahi mau huriraa na roto i te mau parau ra “te menema,” “te ao o te feia pohe,” e te vai ra ˈtu â. Area e papai noa vetahi atu mau Bibilia i te mau parau tumu tei hurihia i te tahi taime na roto i te parau ra “po auahi”; te auraa ïa te papai nei ratou na roto i ta tatou piapa, ma te ore râ e huri ia ratou. Eaha taua mau parau ra? Oia hoi te taˈo Hebera she’ohlʹ e to ˈna taˈo aifaito Heleni haiʹdes, e faataa ra eiaha i te hoê vahi hunaraa taitahi, te menema matauhia râ no te feia pohe. Te vai atoa ra te taˈo Heleni ra geʹen·na i faaohipahia ei taipe o te haamouraa mure ore. Teie râ, i roto i te Amuiraa faaroo Kerisetiano e e rave rahi atoa haapaoraa e ere i te Kerisetiano, te haapiihia ra e ua riro te po auahi ei vahi faaeahia e te mau demoni, i reira te feia iino e faautuahia ˈi i muri aˈe i to ratou pohe (e te tiaturi nei vetahi e e haamauiuihia ratou).

Te haapii ra anei te Bibilia e te mauiui nei te feia pohe?

Koh. 9:5, 10; MN: “Ua ite te feia e ora nei, e pohe ratou, aita râ a te feia i pohe ra e parau itea. . . . O tei itea ia oe ta to rima e rave ra, a rave ma to puai atoa ra; aore hoi e ohipa, aore e imiraa, aore hoi e ite, aore hoi e paari [i roto i te Shéol],* i te apoo ta oe e haere na.” (I te mea e aita a ratou e parau itea, papu maitai e eita ratou e mauiui.) (*“Shéol,” Jé, Da; “menema,” Sa; “mau po auahi,” AG; “ao o te feia pohe,” TOB, Md, AC.)

Sal. 146:4: “Te reva nei hoi to ˈna varua, te hoˈi nei oia i to ˈna ra repo; mou roa ˈtura ta ˈna i opua* i taua mahana ra.” (*“To ˈna mau manaˈo,” Jé; “ta ˈna mau opuaraa,” Os, Da, TOB, BFC, ZK, Md.)

Te parau ra anei te Bibilia e e ora mai te nephe i te poheraa o te tino?

Ezek. 18:4: “O tei* rave i te hara ra, o te pohe ïa.” (*“Te nephe,” Da, Sa, AC, Sy; “te taata,” Os; “te mea ora,” Ch.)

“Aita te manaˈo no nia i te ‘nephe,’ na roto i te auraa o te hoê mea varua aore ra itea-ore-hia, taa ê i te ‘tino,’ . . . e itehia ra i roto i te Bibilia.”—La Parole de Dieu (Paris, 1960) a Georges Auzou, orometua haapii o te Papai Moˈa i te Fare haapiiraa rahi perepitero no Rouen, Farani, api 128.

“Noa ˈtu e e huri-pinepine-hia te taˈo Hebera nefesh [i roto i te mau Papai Hebera] na roto i te taˈo ‘nephe,’ mea hape roa ïa ia horoa ˈtu i te hoê auraa Heleni. Aita roa ˈtu nefesh . . . i faataahia mai te hoê mea te nehenehe e ohipa taa ê atu i te tino. I roto i te Faufaa Apî, e iriti-pinepine-hia te taˈo Heleni psyche na roto i te taˈo ‘nephe,’ tera râ, i reira atoa e tia ia ara i te horoa noa no te reira i te auraa ta te mau philosopho Heleni i faaohipa na. To ˈna auraa oia hoi ‘ora,’ aore ra ‘oraora,’ aore ra i te tahi taime ‘te iho.’”—The Encyclopedia Americana (1977), Buka 25, api 236.

O vai tei haere i roto i te po auahi o te Bibilia?

Ia au i te Bibilia, e haere anei te feia iino i roto i te po auahi?

Sal. 9:17: “E hurihia te taata ino i te po;* e te mau fenua atoa aore i manaˈo i te Atua ra.” (*“Po auahi,” Sa; “ao o te feia pohe,” 9:18 i roto i te BFC; “faaearaa o tei pohe,” 9:18 i roto i te AC; “shéol,” Da, 9:18 i roto i te Jé.)

Ia au i te Bibilia, e haere atoa anei te feia parau-tia i roto i te po auahi?

Ioba 14:13: “[Ua pure atura o Ioba e:] Ahiri oe e faatapuni ia ˈu i hade* e; ahiri oe e huna ia ˈu, e ia ore to oe riri; ahiri oe e faataa i te taime, a manaˈo mai ai ia ˈu nei!” (O te Atua iho tei parau e “e taata parau-tia e te paieti, e te mǎtaˈuraa i te Atua, e te faarueraa i te ino” o Ioba.—Ioba 1:8.) (*“Faaearaa o tei pohe,” Sg, AC; “ao o te feia pohe,” BFC; “shéol,” Dh, Jé, MN; “chéol,” Os, CT.)

Ohi. 2:25-27: “Te parau maira hoi Davida ia ˈna [Iesu Mesia] e, . . . e ore hoi oe e vaiiho i tau [“nephe,” MN] i hade*, e ore hoi oe e tuu i to mea moˈa ra ia tahuti noa na.” (I te mea e aita te Atua i “vaiiho” ia Iesu i roto i te po auahi, aore ra hade, e ere anei te auraa e ua vai o Iesu i reira no te hoê taime noa?) (*“Faaearaa o tei pohe,” Sy, AC, Md, TOB; “ao o te feia pohe,” BFC; “Hade,” Jé, Os, Da, MN.)

E nehenehe anei e haere i rapaeau mai i te po auahi o te Bibilia?

Apo. 20:13, 14: “E ua tuu maira te miti i te feia i pohe i roto ia ˈna ra, e ua tuu maira te apoo e hade* i te feia i pohe i roto ia raua ra, e haavahia ihora ratou atoa i ta ratou mau ohipa. E hurihia ˈtura te apoo e hade i roto i te roto auahi.” (No reira, e faaorahia mai te feia pohe i te po auahi ra. A tapao atoa e mea taa ê te po auahi i te roto auahi, i reira e hurihia ˈi oia.) (*“Po auahi,” AC; “faaearaa i raro aˈe i te repo fenua,” Md; “faaearaa o tei pohe,” Sy; “ao o te feia pohe,” BFC.)

No te aha e vai ai te anoiraa no nia i te auraa ta te Bibilia e parau ra no te po auahi?

“I te mea e ua iriti noa te feia huri Bibilia matamua na roto i te parau ra po auahi i te taˈo Hebera Shéol e nau taˈo Heleni ra Hade e Gehena, ua tupu te anoiraa rahi e te taa ore. Aita te papai-faahou-noa-raa i teie mau parau e te feia huri o te mau neneiraa hiˈopoa-faahou-hia o te Bibilia, i navai no te faaore i te anoiraa e te mau manaˈo hape.”—The Encyclopedia Americana (1942), Buka XIV, api 81.

Ua vaiiho te tahi feia huri i ta ratou iho mau tiaturiraa ia haafifi i ta ratou ohipa e aita ratou i faaite i te feruriraa maitai i te huriraa i te mau taˈo tumu. Ei hiˈoraa: (1) Ua iriti te Bibilia a Saci i te taˈo she’ohlʹ ei “po auahi,” “menema” e “raroraa o te fenua”; e ua huri atoa oia i te taˈo haiʹdes ei “po auahi,” e te na reira atoa ra no geʹen·na. (2) Ua iriti te Bibilia no Maredsous i te taˈo haiʹdes ei “faaearaa o tei pohe,” “faaearaa i raro aˈe i te repo fenua” aore ra “po auahi.” Hau atu â, ua papai oia i te parau “faaearaa o tei pohe” no she’ohlʹ e “gehena” aore ra “po auahi” no geʹen·na. (3) Ua tuu te Bible de l’abbé Crampon (1905) i te parau “faaearaa o tei pohe,” “scheol,” “faaearaa pouri” aore ra “tanuraa maˈi” no she’ohlʹ; “po auahi” aore ra “faaearaa o tei pohe” no haiʹdes; e “gehena” aore ra “po auahi” no geʹen·na. E haapouri teie huru raveraa i te auraa o te mau taˈo Hebera e Heleni.

E nehenehe anei te feia iino e roohia i te hoê utua mure ore?

Mat. 25:46, Jé: “E reva ïa ratou, teie feia i te utua mure ore [“toperaa,” Int; Heleni, koʹla·sin], e te feia parau-tia ra i te ora mure ore.” (Te tuu ra te hoê iritiraa Beretane, The Emphatic Diaglott, i te parau “tâpû” eiaha râ te parau “utua.” Te faˈi ra te hoê nota i raro i te api e: “No ǒ mai te taˈo kolasin . . . i te taˈo kolazoo, oia hoi te auraa, 1. Tâpû; mai te toperaa i te mau amaa o te hoê tumu raau, topetope. 2. Haapae, haavî. . . . 3. Tairi, faautua. E faarirohia te tâpûraa te hoê taata i te ora aore ra i te totaiete, aore ra ia haapae ia ˈna, mai te hoê utua;—no reira mai ïa te toruraa o te auraa taipe o teie parau. Ua maiti matou i te auraa matamua no te mea e tano maitai aˈe i te piti o te tuhaa o te pereota e e haamau atoa oia i te parau patoi i to ˈna puai e to ˈna nehenehe taatoa. E haere te feia parau-tia i te ora, te feia iino i te huru o te tâpûraahia i te ora, oia hoi te pohe. Hiˈo Tes. 2, 1:9.”)

Tes. 2, 1:9: “O te utuahia mai ïa i te pohe mure ore,* mai te aro atu o te Fatu ra, mai te anaana o to ˈna ra mana.” (*“Ereraa mure ore,” Jé; “pau mure ore,” TOB, BFC; “moeraa mure ore,” Os, AC.)

Iuda 7: “Mai ia Sodoma hoi e Gomora, e te mau oire atoa i pihai ihora, o tei faariro ia ratou iho i te peu taiata e te hinaaro tia ore mai ia raua atoa ra, o tei haapaohia ïa ei hiˈoraa, i te raveraa i te pohe i te auahi pohe ore ra.” (I te mea e ua pohe te auahi i haamou ia Sodoma e Gomora e mau tausani matahiti i teie nei, ua vai noa râ te mau pau o taua auahi ra no te mea aita teie nau oire i patu-faahou-hia. Teie nei râ, e ere noa te haavaraa a te Atua no te mau oire, no te feia iino râ e faaea ra i roto. Ua riro te utua i roohia e ratou ei hiˈoraa faaararaa. I roto i te Luka 17:29, te parau ra o Iesu e ua “pohe” ratou; te haapapu ra te Iuda 7 e mea mure ore teie haamouraa.)

Eaha te auraa o te parau te mau ‘haamauiuiraa mure ore’ faahitihia i roto i te Apokalupo?

Apo. 14:9-11; 20:10: “O te haamori i te puaa e to ˈna ra hohoˈa, e tei ia ˈna te tapao tei nia i to ˈna rae, e aore ïa, tei te rima; e inu ïa oia i te uaina faariri a te Atua ra, o tei niniihia ma te anoi ore i roto i te auˈa riri na ˈna ra; e e haamauiuihia oia i te auahi e te gopheri, i mua i te aro o te mau melahi moˈa ra, e i mua hoi i te aro o te Arenio ra. E e tia te au auahi i mauiui [Heleni, basa·ni·smouʹ] ai ratou ra i te peeraa i nia e a muri noa ˈtu; e ore roa e faaea to ratou mauiui i te rui e te ao, to te haamori i te puaa e to ˈna ra hohoˈa, e te farii i te tapao o to ˈna ra iˈoa.” “E i hurihia ˈtura te Diabolo i haavare ia ratou ra i roto i te roto auahi e te gopheri ra i te vairaa o te puaa e te peropheta haavare ra, e e haamauiuihia ratou i te rui e i te ao, e a muri noa ˈtu.”

Eaha taua ‘haamauiuiraa’ ra? Mea anaanatae ia tapao e ia au i te Apokalupo 11:10 “mea mauiui taua na peropheta e piti ra na te feia e parahi i te fenua nei.” E tupu teie mau haamauiuiraa no te mau poroi pariraa e te haama ta raua e faaite ra. I roto i te Apokalupo 14:9-11, te haapii ra tatou e te ite nei te feia e “haamori i te puaa [taipe] e to ˈna ra hohoˈa” i te mau ‘mauiui o te auahi e te gopheri.’ E ere roa ˈtu i te mau mauiui i muri aˈe i te poheraa, no te mea ‘aita a te feia i pohe e parau itea.’ (Koh. 9:5) No reira, na te aha e faatupu ra i teie mau huru mauiui i nia i te feia haamori i te “puaa” e “to ˈna hohoˈa” a ora noa ˈi ratou? O te faaiteraa ïa, ravehia e te mau tavini a te Atua, oia hoi e roohia teie feia haamori i te piti o te pohe, faataipehia e “te roto auahi e te gopheri.” E maoˈa te au auahi o to ratou haamouraahia e te auahi e a muri noa ˈtu, no te mea e haamouraa mure ore te reira e eita roa ˈtu ïa e moehia. Ia parau te Apokalupo 20:10 e e tia i te Diabolo ia ‘mauiui i te rui e i te ao, e a muri noa ˈtu’ i roto i “te roto auahi e te gopheri,” eaha ïa to ˈna auraa? Te parau maitai ra te Apokalupo 21:8 e te faataipe ra “te roto auahi e te gopheri” i “te piti o te pohe.” E haamauiuihia ïa te Diabolo i reira e a muri noa ˈtu, oia hoi te auraa e eita oia e matara faahou mai reira mai; e tapea-noa-hia oia e a muri noa ˈtu oia hoi i roto i te pohe mure ore. E haamanaˈo teie huru faaohiparaa i te parau “mauiui” (no te Heleni baʹsa·nos) i te Mataio 18:34 i reira te faataahia ra hoê â aˈa Heleni i te hoê ‘taata tapea.’—RS, AT, ED, MN.

Eaha te ‘Gehena auahi’ faahitihia e Iesu?

E itehia te taˈo Gehena 12 taime i roto i te mau Papai Heleni Kerisetiano. E 5 taime, e taaihia te reira i te auahi. Ua iriti te feia huri i te parau Heleni geʹen·nan tou py·rosʹ na roto i te parau “auahi o te po auahi” (Sa, BFC), “po auahi” (Ku), “gehena auahi” (Jé, TOB) aore ra “Gehena ura” (SO).

Haamanaˈoraa aamu: Tei rapaeau mai i te mau patu o Ierusalema te Peho no Hinoma (Gehena). I te hoê tau, e ravehia te haamoriraa idolo i reira, oia atoa te mau tusia tamarii. I te senekele matamua, e faaohipahia te Gehena no te tutuiraa i te mau pehu o Ierusalema. E tutuihia te mau tino pohe o te animala ma te tauehia i roto i te auahi, tei ama noa i te gopheri. E taue-atoa-hia i roto i te Gehena te mau tino o te feia taparahi taata e ore e tia ia hunahia i roto i te hoê menema haamanaˈoraa. No reira o Iesu i faahiti ai i roto i te Mataio 5:29, 30 i te tino taue-taatoa-hia i roto i te Gehena. Ia topa te tino pohe i ropu i te auahi ama noa, e pau oia, ia mau râ oia i te hoê pae o te topa tarere, e î haere to ˈna iˈo pê i te mau toe i vai noâ na. (Mar. 9:47, 48) Aita roa i taue-aˈenei-hia te hoê aˈe taata ora i roto i te Gehena; e ere ïa i te hoê vahi e haamauiuihia ˈi te taata ora.

I roto i te Mataio 10:28 [MN], ua faaara o Iesu i te feia e faaroo maira ia ‘mǎtaˈu i tei nehenehe e haapohe i te tino e te [nephe] i gehena.’ Eaha ta ˈna i hinaaro e parau? A tapao na e aita i parauhia i ǒ nei e e haamauiuihia i roto i te auahi o te Gehena; te parau nei râ o Iesu e e tia ia ‘mǎtaˈu i tei nehenehe e haapohe i roto i te Gehena.’ I to ˈna faahitiraa i te nephe ma te faataa ê i te reira, te haapapu ra Iesu e e nehenehe te Atua e haamou i te ravea atoa no te ora o te taata e aita ïa e tiaturiraa faahou no ˈna e tia faahou mai. No reira, te faataa ra te ‘Gehena auahi’ i te hoê â mea e te “roto auahi” o te Apokalupo 21:8, oia hoi te haamouraa, te “piti o te pohe.”

Ia au i te Bibilia, eaha te utua o te hara?

Roma 6:23: “E utua te pohe no te hara.”

Ia pohe te hoê taata, e nehenehe anei o ˈna e faautua-faahou-hia no ta ˈna mau hara?

Roma 6:7: “O te taata hoi i pohe ra, ua matara ïa oia i te ino nei.”

E tuea anei te parau o te mau haamauiuiraa mure ore o te feia iino i te huru iho o te Atua?

Ier. 7:31: “Ua faatia ratou [te mau ati Iudea apotata] i te mau vahi teitei i Topheta, i te peho o te tamaiti a Hinoma, ei tutuiraa i ta ratou mau tamaroa e te mau tamahine i te auahi; o tei ore i faauehia e au ra, no te mea aore roa i tia ia ˈu te reira.” (Mai te peu e aita roa te reira i tupu i roto i to ˈna mafatu, papu maitai e aita te Atua e rave ra i te reira i roto i te hoê faito rahi atu â.)

Faahohoˈaraa: Eaha to oe manaˈo no nia i te hoê metua tei tuu i te rima o ta ˈna tamarii i nia i te auahi no te hoê ohipa ino ta ˈna i rave? “E aroha hoi te Atua.” (Ioa. 1, 4:8) E rave anei te Atua i te hoê mea eita hoi te hoê metua taata feruriraa maitai e rave? Eita roa ˈtu!

Na roto i te parau ta Iesu i faahiti no te taata taoˈa rahi e no Lazaro, ua hinaaro anei o Iesu e parau e e haamauiuihia te feia iino i muri aˈe i to ratou poheraa?

E auraa mau anei to te faatiaraa a Luka 16:19-31 aore ra e faahohoˈaraa noa? I roto i te hoê nota i raro i te api, te farii ra te Bible de Jérusalem e e “aamu-parabole teie aita e taairaa e te aamu.” Ahiri e e ravehia mai tei papaihia, e tia ïa ia faaoti e e haere te feia e fanaˈo ra i te farii maitai a te Atua i nia i te ouma o te hoê noa taata, Aberahama; eita te hoê topata rii i nia i te rimarima e pau i roto i te auahi o Hade; e tamǎrû te hoê topata pape noa i te mau mauiui o te hoê taata e vai ra i reira. Mea tano anei te reira? Ahiri e e ravehia mai tei papaihia, e patoi ïa te reira i te mau tuhaa ê atu o te Bibilia. Teie râ, ahiri e e patoi te Bibilia ia ˈna iho, e niu anei te hoê hoa o te parau mau i to ˈna faaroo i nia i te reira? Aita hoi te Bibilia e patoi ra ia ˈna iho.

Eaha te auraa o teie parabole? E faataipe te “taata taoˈa rahi” i te mau Pharisea. (Hiˈo i te irava 14.) E faahohoˈa te taata taparu, Lazaro, i te nunaa ati Iuda ta te mau Pharisea i haavahavaha, o tei tatarahapa râ e tei riro mai ei mau pǐpǐ a Iesu. (Hiˈo Luka 18:11; Ioane 7:49; Mataio 21:31, 32.) E taipe to raua pohe; e faahohoˈa ra i te hoê tauiraa o te huru. Ua fanaˈo hoi te feia i haavahavahahia i te hoê tiaraa faahiahia i mua i te Atua, ua faarue râ te Atua i te feia i manaˈo na e ua fariihia ratou; e te mauiui ra ratou i te mau poroi haavaraa faataehia e te feia ta ratou i haavahavaha.—Ohi. 5:33; 7:54.

Eaha te mau tumu o te tiaturiraa i te po auahi?

I roto i te tiaturiraa no Babulonia e no Asura i tahito ra, “ua faataahia te po auahi . . . mai te hoê vahi e rave rahi mea mehameha i roto i reira e mana ˈi te mau atua e te mau demoni puai e te ino mau.” (The Religion of Babylonia and Assyria, Boston, 1898, a Morris Jastrow, Jr., api 581) E itehia te mau tumu o te po auahi a te Amuiraa faaroo Kerisetiano i roto i te haapaoraa Aiphiti i tahito ra. (The Book of the Dead, New Hyde Park, 1960, omuaraa parau a E. A. Wallis Budge, mau api 144, 149, 151, 153, 161) Ua haapii atura te faaroo Bouddha, no te senekele 6 H.T.T. mai â, i te vairaa o te hoê po auahi veavea e te hoê po toetoe. (The Encyclopedia Americana, 1977, Buka 14, api 68) No ǒ roa mai te mau hohoˈa peni no nia i te po auahi i roto i te tahi mau fare pureraa Katolika i Italia, i te fenua no Étrurie.—La civiltà etrusca (Milan, 1979) a Werner Keller, api 389.

No tahito roa mai râ te mau tumu mau o teie tiaturiraa o te faaino nei i te Atua. Te faaino nei te mau tiaturiraa Diabolo taaihia i te po auahi ei vahi haamauiuiraa i te Atua, e tei faaino rahi i te Atua, o te Diabolo ïa (oia hoi te auraa “pari haavare”), o ta Iesu ïa i parau “te metua o te haavare.”—Ioa. 8:44.