Pene 4

“Babulonia”, tei haaparuparuhia e tei haapao-atoa-hia râ no te haamouraa

1. a) Eaha te auraa o te parau ra “babulonia”, e o vai tei patu i te oire o tei topahia i taua iˈoa ra? b) Eaha ta te arii manaˈo teitei ra o Nimeroda i opua i te patu, eaha ˈtura te faahopearaa?

TE ITEHIA ra te arepurepuraa i roto i te ao nei i te pae politita, i te pae totiare e i te pae no te haapaoraa. Inaha, te tatararaa o te parau hebera ra i roto i te Bibilia no te parau ra arepurepu o “babulonia” ïa. I roto i te Genese, te parauhia ra o Babulonia i te iˈoa ra o Babela, oia hoi te auraa “arepurepuraa”. Na Nimeroda i patu i taua oire ra, e taata patoi hoi teie ia Iehova (Genese 10:8-10). I raro aˈe i te faatereraa a taua arii manaˈo teitei ra, ua patu aˈera te taata i te hoê pare e ia tupu noa ˈtu i nia roa i te raˈi, ma te ore hoi te reira e fariihia mai e Iehova. Ua faahuru ê maira râ oia i taua opuaraa ra o te ore roa ˈtu e faahanahana ra ia ˈna, na roto i te faaarepurepuraa i te reo otahi o te feia e patu ra, ia ore hoi ratou e nehenehe faahou e taa eaha ta te tahi e ta te tahi e parau ra no te rave amui i te ohipa. — Genese 11:1-9.

2. a) Eaha tei tupu i nia i te Puai o te ao nei oia hoi i nia ia Babulonia, i te matahiti 539 ra hou to tatou nei tau, e ua mou anei te oire ra o Babulonia te iˈoa? b) Eaha te mau parau e itehia ra no nia i te oire tahito ra o Babulonia?

² Tau matahiti i muri iho, ua faatiahia ˈˈera te hoê oire apî o Babulonia te iˈoa, i te hiti o te pape ra o Eupharate (Te mau Arii 2, 17:24; Paraleipomeno 1, 9:1). I te matahiti 539 hou to tatou nei tau, ua faataahurihia ˈˈera te Puai i roto i te ao taatoa nei oia hoi o Babulonia, na Kuro Rahi, te emepera no Medai e Peresia, ia au i te parau tohu a Iehova tei papaihia i roto i te Isaia 45:1-6. Noa ˈtu te ino o taua toparaa ra, ua tamau noa ˈtura o Babulonia i te vai mai ei oire rii. Ua faahiti-faahou-hia maira râ to ˈna parau e tae noa ˈtu i te piti o te afaraa o te senekele matamua o to tatou nei tau (Petero 1, 5:13). Ua itehia râ e taua oire tahito ra e ere roa ˈtu ïa o “Babulonia Rahi” ta te aposetolo o Ioane i papai i roto i te buka ra o te Apokalupo, pene 17.

3. O vai mau na o Babulonia Rahi?

³ Te Babulonia Rahi o te Apokalupo o tei faaauhia i te hoê vahine faaturi e parahi ra i nia iho i “te hoê puaa uteute”, o te mau faatere haapaoraa hape ïa o te ao taatoa nei, e to roto atoa hoi te mau haapaoraa atoa o te amuiraa faaroo kerisetiano (Apokalupo 17:3-5)a. Ia au i te mau hiˈopoaraa a te aposetolo Ioane no nia ia ˈna, ua faaturi hoi taua faanahonahoraa taipe ra i te pae varua e te mau tia mana politita atoa o te fenua nei. E mana rahi â to te mau haapaoraa hape o te ao taatoa nei aore ra Babulonia Rahi.

“Taua no teie nei ao”, eiaha râ no te Atua

4. I te roaraa o te Tamaˈi rahi Matamua, mea nafea o Babulonia Rahi i te faarahiraa ˈtu i ta ˈna mau taparahiraa taata i nia i te huitaata nei?

⁴ E ere roa ˈtu te tiaraa o Babulonia Rahi i te mea papu i te hopearaa iho â râ o te Tamaˈi Rahi matamua o te ao nei. I roto i te roaraa o taua tamaˈi ra, ua faarahi atu â o ˈna i ta ˈna ohipa taparahi taata i nia i te huitaata nei. Ua faaitoito te mau upoo faatere haapaoraa o te amuiraa faaroo kerisetiano teie e faahua parau nei e o ratou te mau pǐpǐ a Iesu Mesia, i roto i ta ratou mau aˈoraa ia faaô atu te mau taurearea ia ratou i roto i te tamaˈi. Teie ta Harry Emerson Fosdick, orometua tuiroo porotetani e tei pohe hoi i teie mahana, e teie e turu nei i te tutavaraa i te pae no te tamaˈi, i parau mai i muri iho: “Ua tuu matou i te mau reva tamaˈi i roto i ta matou fare pure. (..) E mai roto mai â i to matou nei vaha, ua pure matou i te Arii no te hau e ua faahanahana matou i te tamaˈi.” Ua pure te mau perepitero e vetahi atu mau melo o te mau upoo faatere o te amuiraa faaroo kerisetiano no te mau nuu tamaˈi i roto i ta ratou mau haaputuputuraa faaroo. Ua tavini atoa ratou ei perepitero faehau i roto i te nuu i nia i te fenua nei, to te reva e to te taib.

5. a) Eaha te mau parau a Iakobo (4:4) o ta te amuiraa faaroo kerisetiano i haafaufaa ore? b) Eaha te haavaraa a te Atua ia ˈna?

⁵ Ma te arataihia e taua mau upoo faatere haapaoraa ra, aita roa ˈtu te amuiraa faaroo kerisetiano i tâuˈa noa ˈˈe i te mau parau a Iakobo (4:4), o te na ô ra e: “E te mau faaturi tane, e te mau faaturi vahine, aore outou i ite e, o te hinaaro i teie nei ao, o taua au ore ïa i te Atua ra? E teie nei, o tei titau e ei taua oia no teie nei ao ua taa maite ïa oia, e e enemi ïa no te Atua?” No reira, e tae roa mai i teie mahana, ua riro noa te amuiraa faaroo kerisetiano ei enemi no te Atua Teitei ra. Mea papu maitai atura ïa e aita o ˈna e farii maira ia ˈna, e no reira e mea atâata roa ˈtura ïa no ˈna. Eita to ˈna mau hoa politita e tia ia tiaturihia, e te haere noa ˈtura te manaˈo patoi i te haapaoraa i te rahi-roa-raa. E ere roa ˈtu no ˈna o te Atua i parau ai e: “Eiaha e hautihia mai tei faatahinuhia e au.” — Paraleipomeno 1, 16:22.

“A haere ê mai na outou i rapae e au mau taata e”

6, 7. a) Eaha te piiraa ru e vai ra i roto i te Apokalupo 18:4, e no vai ma ïa? b) Afea ra te hoê piiraa mai te reira te huru i piihia i tahito ra te haamataraa i te tupu i nia i te mau ati Iuda e autâ ra i roto ia Babulonia tahito ra?

⁶ E piiraa ru teie na te Atua i to ˈna mau taata i faatahinuhia ra e no to ratou mau hoa i te tau hopea o te amuiraa o te mau mea nei oia hoi: “A haere ê mai na outou i rapae, e au mau taata e, ia ore outou ia riro ei rave atoa i ta ˈna ra mau hara.” (Apokalupo 18:4). Oia mau, a haere ê mai na outou i rapae i te mau haapaoraa hape o te ao taatoa nei, oia hoi ia Babulonia Rahi!

⁷ Te faahaamanaˈo ra taua pii ra i te poroi ta Ieremia (50:8; 51:6, 45) i faatae atu i te toea o te mau ati Iuda i faautuahia e Iehova e 70 matahiti faatîtîraa e tei hopoihia ei tîtî i Babulonia. Ua haamata taua mau parau ra i te tupu i nia i taua mau taata i hopoi-tîtî-hia e o te autâ ra i Babulonia i te matahiti 537 hou to tatou nei tau, i muri aˈe to Kuro Rahi, inaha ua tohuhia mai hoi to ˈna haereraa mai, aratairaa i to ˈna mau faehau medai peresia na roto i te Eupharate tei mǎrô e tae roa i roto i te oire no Babulonia.

8. a) Mea nafea to Kuro Rahi faatupuraa i te Isaia 45:1-6? b) No te aha e tia i tei faahohoˈahia i te Kuro Rahi ia faatupu atoa i taua faahohoˈaraa ra no te mau mea e tupu a muri aˈe?

⁸ I roto i te matahiti matamua o ta ˈna faatereraa, ua faatupu aˈera o Kuro Rahi i te parau tohu a Isaia (45:1-6). Ua faatupu atoa te taata e faahohoˈahia ra i te emepera ra o Kuro, e tei riro atoa hoi ei taata puai aˈe ia ˈna, oia hoi o Iesu Mesia, i taua faahohoˈaraa ra no te mau mea e tupu a muri aˈe. Ua tupu te reira i te tau i haapaohia ra, i muri aˈe i to ˈna haamataraa i te faatere i roto i te mau raˈi i te pae atau o Iehova, a hope ai te mau “tau taotiahia o te mau nunaa” i te avae atopa o te matahiti 1914 (Luka 21:24). I roto i te roaraa o te Tamaˈi rahi Matamua o te ao nei i te matahiti 1914 ra e tae atu ai i te matahiti 1918, ua riro aˈera te toea o te mau Iseraela i te pae varua ei tîtî na Babulonia Rahi e tae noa ˈtu hoi na ta ˈna mau tane faaturi politita.

9, 10. a) Eaha te ohipa i ravehia i nia e vau o na taata faatere a te Taiete? b) Eaha te mau haapapuraa e vai ra e o Babulonia Rahi te tumu no te opuaraa e haamou i te ohipa a te nunaa o Iehova?

⁹ Ei hiˈoraa, i te fenua Marite, ua opanihia te buka ra Le mystère accompli (na roto i te reo farani), i te mea hoi e ua faarirohia taua buka ra ei buka orure hau, oia hoi te buka hopea i neneihia i taua tau ra na te Taiete Watch Tower. Inaha, ua tuuhia ˈtu toopiti na taata papai i mua i te haavaraa no Brooklyn, i roto i te Hau no New York, e ua faautuahia ˈˈera raua ma te tia ore hoi e 20 matahiti fare auri i roto i te fare auri no Atlanta i Géorgie. Hoê â utua ta te peretiteni o te taiete i te pae o te neneiraa, te taata haapao faufaa e e toru atu â mau taata faatere. Ua faautua-atoa-hia te hoê taata tatara parau hoê ahuru matahiti fare auri.

¹⁰ Mea na reira ˈtura ïa, i te 4 no tiurai 1918, teie na kerisetiano e vau o tei pûpû ia ratou no te Atua, i te tuuraahia ˈtu i roto i te pereoo auahi o te tere tia atu i Atlanta i reira ratou i te huriraahia i roto i te fare auri. Ua tia atura ïa te mau melo o te pu a te Taiete Watch Tower i Brooklyn ia faaitoito i roto i taua tuhaa ra. O vai mau na hoi te tumu no taua ohipa ra? Te pahono ra te buka ra Les Prédicateurs présentent les armes (beretane) e: “I muri aˈe i te hoê tuatapapa-maite-raa, mai te huru ra ïa e te mau Ekalesia e te mau upoo faatere haapaoraa te tumu no te ohipa e ravehia no te haamou roa i te feia i turu ia Russell [Te mau Ite] (...) A faaroo ai te feia nenei i te vea faaroo e ua faautuahia ratou e 20 matahiti fare auri, fatata te taatoaraa tei faaite i to ratou oaoa i roto i ta ratou mau vea, te feia rarahi e te feia nainai. Aita roa ˈtu vau i ite noa ˈˈe i te hoê parau maitai i roto i ta ratou mau vea faaroo.” — Ray Abrams, mau api 183, 184.

Ua topa oia, aita râ i haamouhia

11, 12. a) Eaha ta Babulonia Rahi i opua? b) Mea nafea o ˈna i te tairiraahia, aita râ i haamouhia? c) Mai te aha ïa te huru o te nunaa o Iehova tei tiamâ mai?

¹¹ Teie râ, eita te oaoaraa e vai maoro noa ˈtu â i roto ia Babulonia Rahi. I te tau faatupuraa raau o te matahiti 1919, ua hiˈa aˈera oia; tera râ, e tupu â vetahi atu mau ohipa hou oia e haamou-roa-hia ˈi. Te manaˈo ra o Babulonia e eita te nunaa o Iehova e tia faahou mai e e vai noa oia i raro aˈe i ta ˈna faatîtîraa. E inaha, i te avae mati 1919, ua matara aˈera te uputa o te fare auri i mua i na tia e vau a te Taiete Watch Tower, e ua tuuhia maira ratou ma te aufauhia ˈtu i te tahi tuhaa moni. I muri iho, ua tiamâ roa maira ratou i te mau pariraa atoa.

¹² E inaha, ua maue ê atura te oaoa o Babulonia Rahi i reira iho! Teie ta te buka ra Les prédicateurs présentent les armes (beretane) e parau ra no nia i te haavararaa i faaotihia e te tiribuna e faaue ra e ia tuuhia te mau Ite: “Ua mamû noa te mau Ekalesia i mua i taua faaotiraa a te tiribuna ra.” Auê râ ïa oaoaraa e i roto i te nunaa a Iehova! Ua ora faahou mai ta ˈna faanahonahoraa i roto i te ao taatoa nei. I roto i te tairururaa i tupu i Cedar Point i te matahiti 1919, ua faaitoito aˈera te peretiteni o te Taitete i te feia i tae mai, e rave rahi tausani hoi ratou i tae mai, na roto i ta ˈna oreroraa parau “A faaite i te Basileia”. Ua tiamâ faahou mai te mau Ite no Iehova e ua poro faahou ratou ma te itoito i te Basileia o te Atua i te vahi taata. Ua topa o Babulonia Rahi, noa ˈtu â hoi e aitâ oia i haamouhia. Na Iesu Mesia, te Kuro Rahi i tairi ia ˈna, ma te faatiamâ atura hoi i ta ˈna mau pǐpǐ haapao maitai.

13. I te iteraahia mai te Taiete o te mau Nunaa i roto i teie nei ao, eaha te ohipa ta Babulonia Rahi i rave?

¹³ Oia mau, e ora mai o Babulonia no te tomo atu i roto i te tau no te tamaˈi e tupu a muri aˈe. A faaauhia ˈtu ai te Taiete o te mau Nunaa ei faanahonahoraa no te haamau i te hau, ua turu aˈera te Apooraa rahi a te mau Ekalesia no te Mesia i Marite ia ˈna e ua faaite aˈera i mua i te taatoaraa e ua riro te Taiete o te mau Nunaa ei “tia politita no te Basileia o te Atua i nia i te fenua nei”. A haamauhia ˈi taua faanahonahoraa ra, ua haamata ihora o Babulonia i te faariro i taua faanahonahoraa nei ei parahiraa no ˈna e ua aratai atura hoi i taua “puaa uteute” taipe ra. — Apokalupo 17:3.

14. a) Eaha te huru o Babulonia Rahi i roto i te Piti o te Tamaˈi rahi o te ao nei? b) Eaha â ta Babulonia Rahi i rave i te taime te mauhaa a te taata no te faatupu i te hau e haere mai ai i nia mai raro mai i te abuso, i muri aˈe i te Piti o te Tamaˈi rahi o te ao nei?

¹⁴ Ua tuu atura râ taua mauhaa i haapaohia no te haamau i te hau, i roto i te abuso o te vai-ohipa-ore-raa, a haamata ˈi te Piti o te Tamaˈi rahi o te ao nei, e inaha, aita ˈtura to Babulonia Rahi e [puaa] faahou no te afaifai ia ˈna (Apokalupo 17:8). Tei te pae hoi o ˈna o na nunaa e 57 tei faaô ia ratou i roto i te piti o te tamaˈi. I te mea hoi e ua tahoê atu oia i taua mau puai ra, aita roa ˈtu ïa taua mau puai ra i huru ê noa ˈˈe i te reira, e i te mea e ua amahamaha oia i roto e rave rahi hanere mau pǔpǔ faaroo papu ore, aita roa ˈtu te reira i faaaueue noa ˈˈe ia ˈna. A haere mai ai te mauhaa i haapaohia no te haamau i te hau mai roto mai i te vai-ohipa-ore-raa a hope ai te Piti o te Tamaˈi rahi, i raro aˈe i te huru o te mau Hau amui, ua haavitiviti aˈera o Babulonia Rahi i te paiuma ˈtu i nia ia ˈna e ua haa atura i ta ˈna haaraa i nia ia ˈna.

E fariu tia mai te mau puai politita i nia ia Babulonia

15, 16. a) E ite atu te huitaata nei i teihea ohipa riaria mau? b) Eaha te faaotiraa a te Atua Puai hope, ia au i te Apokalupo 17:15-18?

¹⁵ Fatata roa te taata i te riro ei ite no te hoê ohipa riaria mau. Oia hoi e fariu tia mai te mau hau politita i nia ia Babulonia Rahi no te haamou roa ia ˈna. E riro paha taua parau nei i te haaputapû i te mafatu o te feia e tiaturi mau ra e mea maitai te mau haapaoraa atoa. Ua faaoti maira râ o Iehova, tei Teitei i roto i te ao atoa nei e aita e parahiraa faahou to Babulonia Rahi i roto i te ao nei e ua navai o ˈna i te haavare-noa-raa i te taata. E tia mau â oia ia haamou-roa-hia.

¹⁶ Inaha, ua oti vetahi mau mauhaa puai i te faanahonahohia, mau mauhaa ta te Atua e nehenehe e faaohipa no te haamou roa ia ˈna, oia hoi: te mau tia politita o teie nei ao. Te tohu ra te buka Apokalupo tei faauruahia e te Atua e e haafariu mai Iehova i te mau tane faaturi a Babulonia i nia ia ˈna; e tataratara roa ratou i to ˈna ahu, ma te faaite mai e o vai mau na oia, oia hoi e paruru na te mau demoni. E ia oti, e tutui roa ratou ia ˈna i te auahi, oia hoi te auraa, e faariro roa ratou ia ˈna ei rehu. E faatupu ratou i nia ia ˈna te mea ta ratou iho i faatupu i nia i te feia haamori mau a te Atua mau ra. — Apokalupo 17:15-18; 18:24.

17. E turai anei te ohipa patoi ia Babulonia i ravehia e te mau tia politita, ia farii mai taua feia nei i te haamoriraa a Iehova, e eaha tei horoa mai i te pahonoraa i taua uiraa ra?

¹⁷ E ere ïa te auraa e ia tupu taua ohipa aroraa a te mau haapaoraa e ravehia i nia ia Babulonia na te mau hau politita e, e fariu mai ïa ratou i muri iho i nia i te haamoriraa a te Atua ra o Iehova, aore ra e faahoa ˈtu ratou ia ˈna. Ahiri e mai te reira te huru, eita ïa ratou e riro mai tei parauhia i roto i te buka a te Apokalupo (Apokalupo 17:12-14). Te ohipa aroraa ˈtu i te haapaoraa ta Iehova i faatia ia ratou ia faatupu, e riro iho â ïa i te faaoaoa ia ratou, tera râ e tamau-noa-hiâ ratou i te haavarehia e te Diabolo ra o Satani, “te atua o [te amuiraa o te mau mea nei]”, te enemi rahi o Iehova. — Korinetia 2, 4:4.

18, 19. a) O vai te ore e ora mai no te ite atu i te faatiaraahia te mana hope o Iehova i nia i te ao taatoa na roto i te arai o te ‘Tamaiti hui arii no te hau’? b) O vai ma râ te nehenehe e faaite e a muri noa ˈtu e mea nafea to Iehova fariuraa ˈtu i nia ia Babulonia Rahi?

¹⁸ Eita o Babulonia rahi e ora ˈtu no te ite atu i te ohipa hopea e tupu oia hoi: te faatitiaifaroraahia te mana hope o Iehova i roto i te ao taatoa nei na roto i te arai o te ‘Tamaiti hui arii no te hau’, te “Atua puai”, e parahi ra i teie nei i te pae atau o Iehova, te Atua teitei e te Puai hope. — Isaia 9:6.

¹⁹ I muri mai i te paruai, i raro aˈe i te faatereraa aueue ore a Iehova, te tia noa ra ïa ta ˈna mau Ite (Isaia 43:10, 12). Na nia i te faaueraa a te mau raˈi parau-tia, e aratai-maite-hia mai ratou i rapae mai roto mai ia Babulonia Rahi (Apokalupo 18:4). I te mea hoi e ua riro ratou ei ite no te mau ohipa faahiahia mau, e riro ïa ratou i te faaite tahaa mai i to ratou oaoa tano mau. I muri iho, e riro ratou ei mau Ite no Iehova e a muri noa ˈtu, no te mea e nehenehe ratou e faaite e a muri noa ˈtu e mea nafea to te Atua haamoˈaraa i to ˈna iˈoa na roto i te haamou-roa-raa ia Babulonia Rahi. — Apokalupo 19:1-3.

[Nota i raro i te api]