Hamani-ino-hia no te parau-tia

E riro paha te mau hoa aore ra te mau fetii i te parau mai ia outou e, te haafifihia nei te mau Ite o Iehova e te ture, tei raro aˈe ratou i te hoê opaniraa i roto i te tahi mau fenua aore ra e mau taata eita e nehenehe e tiaturi. No te aha ratou e faaino-noa-hia ˈi?

E ere roa ïa no te mea te ofati nei te mau Ite i te ture, no te mea ra, te pee nei ratou i te eˈa o Iesu. Ua faaite oia i ta ˈna mau pǐpǐ e e faainohia ratou, e hamani-ino-hia ratou e e pari-haavare-hia ratou e rave rahi mau ohipa iino. Te tumu o te reira, o Satani ïa, te enemi hoê roa o Iehova, oia te atua o teie nei ao o te imi nei i te ravea ia fariu ê te mau taata i te taviniraa a te Atua. — Mataio 5:10-12; 10:16-22, 34-39; 24:9, 10; Ioane 15:17 tae noa ˈtu 16:3; Timoteo 2, 3:12; Petero 1, 5:8; Apokalupo 12:17.

I te tapearaahia te mau aposetolo no te tuu atu ia ratou i mua i te Sunederi, e ere ïa no te mea e e mau taata taparahi taata, iria aore ra orure hau. No te mea ra te poro ra ratou i te parau apî maitai. I to te aposetolo Paulo hororaa i mua i te aro o te mau haava teitei, ua hinaaro oia ia paruruhia e ia faatiamâ papu i mua i te ture te tiaraa o te mau kerisetiano no te poro i te parau apî maitai. — Ohipa 4:18-20; 5:28-32; Philipi 1:7.

Te mau Ite o Iehova o to tatou nei tau e mau kerisetiano ïa o te auraro nei i te mau ture, o te aufau nei i ta ratou mau tute e o te faatura nei i te mau mana faatere. Te faahoˈi nei ratou i ta Kaisara ia Kaisara ra e ta te Atua i te Atua ra. Mai te peu e, te fifi nei ratou e te hoê hau, no te mea ïa aita te hau e farii nei i ta ratou ohipa pororaa aore ra no to ratou faaô-ore-raa ˈtu i roto i te mau ohipa a te mau nunaa. I roto i taua huru tupuraa ra, e tia ïa i te mau Ite o Iehova ia pee i te haerea o te mau aposetolo o tei parau e: “O te Atua ta matou e faaroo e tia ˈi eiaha te taata.” — Ohipa 5:29; Mareko 12:17; Ioane 18:36; Tito 3:1, 2.

Aita roa te mau Ite o Iehova e titau nei ia hamani-ino-hia ratou. Mea au aˈe na ratou i te hoê oraraa peapea ore e te hau mau. Tera râ, mai te peu e hamani-ino-hia ratou no to ratou auraro i te ture a te Atua e te peeraa i te hiˈoraa o Iesu Mesia, e faaoromai ïa ratou ma te oaoa. — Mataio 5:10-12; Ohipa 5:40, 41; Korinetia 1, 4:12; Timoteo 1, 2:2; Petero 1, 3:14, 15; 4:12-16.

● No te aha te mau Ite o Iehova e faainohia ˈi e e hamani-ino-hia ˈi?

● No te aha te mau Ite o Iehova e ô ai i roto i te haafifiraa e te mau mana hau, mai te mau aposetolo o te Mesia i to ratou ra tau?

● Mea nafea to te mau tavini a Iehova hiˈoraa i te hamani-ino-raa?

[Hohoˈa i te api 29]

Ua arataihia Iesu i mua ia Pilato e ua hurihia te aposetolo Paulo i roto i te fare tapearaa no to ˈna pororaa i te Basileia o te Atua.