E nafea mea taa ê anaˈe orua?

TE FIFI

Mea au na oe i te tuaro, area to hoa, i te taio. Mea haapao maitai e aravihi oe, e ere roa ˈtu râ o ˈna mai tera. Mea au na oe ia farerei i te mau hoa area o ˈna, e hinaaro ïa ia faaea orua anaˈe.

E na ô paha oe, ‘Aita mâua e tano ra! No te aha aita i ite i te reira i te taime haamatauraa?’

I nia i te tahi faito, ua ite oe i te reira. Ua farii oioi râ i te rave i te mau haapaeraa. Mea maitai ia faaite faahou i tera huru i te mea ua faaipoipohia orua i teie nei. E tauturu atu teie tumu parau ia na reira. Na mua râ, e hiˈopoa anaˈe te tahi mau manaˈo e faaite mea taa ê paha te tahi i to ˈna hoa faaipoipo.

TE TIA IA ITE

Mea taa ê roa anaˈe te tahi i te tahi. Te fa matamua o te haamatauraa, te iteraa ïa e tano anei orua. Ua taa ê roa anaˈe te huru o te tane e te vahine, eita e rave rahi e haere roa i te faaipoiporaa. Eaha râ te huru mea haihai roa anaˈe te taa-ê-raa mai te itehia i nia i te feia faaipoipo atoa?

Mea taa ê te huru o te mau taata atoa. E itehia iho â ïa hoê tuhaa aore ra hau atu e taa ê ai te tane faaipoipo i ta ˈna vahine:

Te faaanaanataeraa. Te na ô ra te vahine ra o Annaa te iˈoa: “Eita roa vau e au ia haere e faaanaanatae na rapae. Mea au râ na ta ˈu tane e haere na nia i te mouˈa o tei î i te hiona e ia haere ehia mahana na roto i te ururaau.”

Te peu. Te na ô ra te tahi tane o Brian te iˈoa: “E nehenehe ta ˈu vahine e ara maoro i te po e e tia i te hora pae i te poipoi. O vau râ, e hinaaro ïa hitu aore ra vau hora taotoraa. Aita anaˈe, e riri hanoa vau.”

Te huru. Mea paraparau roa to hoa faaipoipo, area oe, e ere roa ˈtu ïa. Te na ô ra te tane faaipoipo ra o David: “Ua matau vau i te ore e faaite i to ˈu mau fifi, area ta ˈu vahine, ua paari ïa i roto i te hoê utuafare o te faaite hanoa i te mau mea atoa.”

Mea maitai te taa-ê-raa. Te na ô ra Helena: “Mea maitai paha ta ˈu raveraa, e ere râ te auraa tera anaˈe te mea tano.”

TA OE E NEHENEHE E RAVE

A imi i te maitai o te tahi e te tahi. Te na ô ra Adam: “Eita Karen e au i te tuaro. Ua haere mai râ o ˈna na muri ia ˈu no te mataitai e rave rau hautiraa e aita o ˈna i haumani aˈe. Mea au na Karen e haere e mataitai i te mau taoˈa hamanihia e te feia aravihi. E apee au ia ˈna e e faaea mâua i ǒ te taime ta ˈna e hinaaro. E tutava vau i te anaanatae i te reira no te mea mea faufaa no ˈna.”—Aratairaa Bibilia: Korinetia 1, 10:24.

A farii atoa i te manaˈo o to hoa faaipoipo. E ere no te mea mea taa ê te manaˈo o to hoa, mea hape ïa te reira. Tera atoa ta Alex i haapii mai. Te na ô ra oia: “I manaˈo na vau hoê anaˈe ravea maitai e aita ˈtu â. I to ˈu râ faaipoiporaa, ua ite au e rave rahi ravea no te faatupu i te tahi ohipa. E mea maitai te mau raveraa atoa ua tapae-anaˈe-hia te hoê â fa.”—Aratairaa Bibilia: Petero 1, 5:5.

A faaite i te manaˈo tano. E ere no te mea aita orua i tuea, eita ïa orua e tano. Eiaha e faaoti oioi ua hape orua i te faaipoiporaa ia ite orua mea taa ê te tahi i te tahi. Te parauhia ra roto i te tahi buka: “E rave rahi te imi i te otoheraa ma te parau ‘Ua matapo-roa-hia vau i tera taime!’” Te na ô atoa ra râ: “I te mau taime oaoa atoa, te faaite ra orua e nehenehe te tahi e te tahi e here noa ˈtu te taa-ê-raa.” (The Case Against Divorce) A tutava i te faaoromai te tahi i te tahi noa ˈtu e faahaparaa ta te tahi atu.—Kolosa 3:13.

A tamata na: A papai i ta oe e au no nia i to hoa faaipoipo e eaha te mau tuhaa hoê â huru to orua. I muri iho, a tapao te mau tuhaa mea taa ê orua. Peneiaˈe, e ite oe mea iti roa te taa-ê-raa e vai ra i roto ia orua. E faaite atoa tera tapura eaha te mau tuhaa e nehenehe oe e faaite i te faaoromai aore ra e imi i to ˈna maitai. Te na ô ra Kenneth, te hoê tane faaipoipo: “Mea au na ˈu ia faaau ta ˈu vahine ia ˈna i to ˈu huru e mea au atoa na ˈna ia na reira atoa vau. Noa ˈtu e titauhia ia rave au i te tahi haapaeraa, ia oaoa o ˈna, e oaoa atoa ïa vau.”—Aratairaa Bibilia: Philipi 4:5.