I TO oe manaˈo, e tauturu anei te Bibilia i to utuafare ia vai hau noa? A hiˈo na i ta te Bibilia e ta te feia i uiuihia e parau ra. A feruri eaha te mau manaˈo e tauturu atu ia faaea i te tatamaˈi, ia faatupu noa i te hau e ia piri atu â te mau melo o to utuafare.
ARATAIRAA BIBILIA IA VAI NOA TE HAU
A FAAITE I TE MANAˈO MAITAI NO TE TAHI E TE TAHI.
“Eiaha roa ei mea e ravehia ma te mârô e te teoteo faufaa ore ra; ei aau haehaa râ, i te manaˈo haamaitairaa ˈtu te tahi i te tahi eiaha ia ˈna iho. Eiaha hoi te taata atoa e haapao i ta ˈna anaˈe ihora, e haapao atoa râ i to vetahi ê ra maitai.”—Philipi 2:3, 4.
“Ua taa ia mâua, mea maitai ia faaite mea faufaa aˈe to hoa faaipoipo ia oe iho e ia vetahi ê.”—Vahine, 19 matahiti faaipoiporaa.
A FAAROO MAITE NA MUA.
“E faaite atu ia ratou, . . . eiaha ei mârôrô, ia mǎrû râ, e te mamahu i te taata atoa.”—Tito 3:1, 2.
“I te rahiraa o te taime, eita te tatamaˈiraa e tupu ia tano te toparaa reo ia pahono tatou. Mea faufaa ia faaroo ma te ore e faahapa oioi e ia farii i te manaˈo noa ˈtu aita tatou i mauruuru.”—Vahine, 20 matahiti faaipoiporaa.
A FAAITE I TE FAAOROMAI E TE MǍRÛ.
“E mǎrû mai te tavana i te faaoromai; e fatifati te ivi i te arero mǎrû.”—Maseli 25:15.
“E tupu te tatamaˈiraa, e faaea râ te reira ia au i te huru ta tatou e faaite. E titau-mau-hia te faaoromai. Ia na reira mâua, e itehia mai te ravea no te faaafaro i te fifi.”—Vahine, 27 matahiti faaipoiporaa.
EIAHA E HAAMAUIUI.
“E haapae atoa outou i taua mau parau atoa nei, i te riri, te tairoiro, te feii, te faaino, e te parau tiaâ i to outou vaha.”—Kolosa 3:8.
“Mea faahiahia na ˈu te faaoromai o ta ˈu tane. E faaite noa o ˈna i te mǎrû. Eita roa e tutuô, mea faatura râ ia ˈu.”—Vahine, 20 matahiti faaipoiporaa.
A FAAORE NOA I TE HAPA E A FAAAFARO OIOI I TE FIFI.
“E faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi.”—Kolosa 3:13.
“Ia tupu te fifi, e ere i te mea ohie ia faaite noa i te mǎrû. E nehenehe oe e parau aore ra e rave te tahi mea o te haamauiui i to hoa. I tera mau taime, mea maitai ia faaore i te hapa. Aita anaˈe tera huru, eita na hoa faaipoipo e oaoa.”—Vahine, 34 matahiti faaipoiporaa.
A HOROA MA TE AAU TAE E EIAHA E HAAPAO NOA IA OE.
“E horoa, e e noaa hoi ta outou. . . . O taua faito hoi ta outou e faito ra, o te faito-faahou-hia mai ïa ta outou.”—Luka 6:38.
“Ua ite ta ˈu tane eaha ta ˈu e au e e rave noa ïa o ˈna i te mea e faaoaoa ia ˈu. E pinepine au i te feruri e nafea vau ia na reira atoa no ˈna. E ere ïa hoê anaˈe te oaoa, o mâua toopiti râ e mai tera noa tae roa mai i teie nei.”—Vahine, 44 matahiti faaipoiporaa.
A TUTAVA I TE HAA IA VAI HAU NOA TO UTUAFARE
Tau melo utuafare noa tei uiuihia e te feia pia o te vea A ara mai na! Na te ao, e mirioni tei faaite atoa i te mau huru maitatai o te tauturu i te utuafare ia vai hau noa maoti te Bibilia.a Noa ˈtu eita te tahi melo e na reira, ua ite ratou mea maitai ia riro ei taata faatupu i te hau. Teie hoi ta te Bibilia e fafau ra: “Te feia râ i faaau i te parau hau ra, e oaoaraa to ratou.”—Maseli 12:20.
a No te ite atu â nafea ia oaoa te utuafare, a hiˈo i te pene 14 o te buka Eaha ta te Bibilia e haapii mau ra? piahia e te mau Ite no Iehova. Te vai atoa ra i nia www.jw.org. A pata atoa i nia LA BIBLE ET VOUS > DE L’AIDE POUR LES FAMILLES.
