E nafea ia ore te manaˈo e tu?

TE FIFI

Mea taa ê to oe manaˈo i to to hoa faaipoipo no nia te tahi mea. E au ra e toru ravea i mua ia orua:

1. E onoono ia faaotihia mai ta oe e manaˈo ra.

2. E farii noa i te hinaaro o to hoa faaipoipo.

3. E rave orua toopiti i te haapaeraa.

E na ô paha oe, ‘aita vau e au ra ia parauhia e rave i te haapaeraa. E au ra e eita hoê noa ˈˈe i roto ia mâua e nehenehe e rave i ta ˈna e hinaaro!’

Ia ravehia te haapaeraa tano, e oaoa mau orua. Hou râ a hiˈopoa ˈi e nafea ia na reira, a hiˈo na i te tia ia ite.

TE TIA IA ITE

E titauhia ia haa amui. Hou te faaipoiporaa, i matau na paha oe i te faaoti noa no oe. Ua taui râ i teie nei e e titauhia ia haafaufaa na mua oe e to hoa i to orua faaipoiporaa, eiaha râ te hinaaro o te tahi e te tahi. A manaˈo i te mau maitai ia na reira, eiaha râ i te mau fifi. Te na ô ra te tahi vahine o Alexandra te iˈoa, “e nehenehe te manaˈo o na taata e piti e faaite i te ravea maitai aˈe ia faaafaro i te fifi i ta te tahi i manaˈo o ˈna anaˈe.”

Eiaha e manaˈo ia oe anaˈe. Ua papai John M. Gottman, taata tauturu i te feia faaipoipo, “e ere te auraa e titauhia ia farii oe i te mau mea atoa ta to hoa e parau aore ra e manaˈo, mea faufaa râ ia ineine i te tâuˈa i to ˈna manaˈo.”a Te faataa-atoa-hia ra i roto i tera buka, ia faaite te tahi i to ˈna mauruuru ore i ta te hoa faaipoipo e tamata ra i te rave no te tahi fifi, eita te reira e afaro noa ˈˈe.

E farii i te mea e maitai ai te tahi. O vai hoi taata e oaoa i te hoa faaipoipo e titau ia rave mai ta ˈna e hinaaro aore ra e onoono ta ˈna te ravea maitai aˈe! Mea au aˈe ia ineine na hoa faaipoipo i te rave i te mea e maitai ai te tahi. Te na ô ra te vahine ra o June, “i te tahi taime, e faatia vau i te hinaaro o ta ˈu tane ia oaoa oia, tera râ, e na reira atoa o ˈna no ˈu. Mai tera i roto i te faaipoiporaa, mea tia ia horoa ˈtu e ia horoahia mai, eiaha râ ia horoa-noa-hia mai.”

E NAFEA?

To huru na mua roa. Mai te aha to orua huru ia haamata te aparauraa? E pinepine, e faaite atu te pahonoraa i teie uiraa i te tupu i te hopea o te reira. Ia haamata oe i te aparauraa ma te mau parau e haamauiui, e tupu iho â te tatamaˈiraa i te pae hopea. A haapao ïa i te aˈoraa Bibilia: “E faaaau aroha noa, e te hamani maitai, e te haehaa, e te mǎrû, e te faaoromai rahi.” (Kolosa 3:12) E nehenehe tera mau huru maitatai e tauturu ia oe e to hoa ia haapae i te tatamaˈi e ia ite e nafea ia faaafaro i te fifi.—Aratairaa Bibilia: Kolosa 4:6.

Te mau mea e tu ai te manaˈo. Ia riri oe a tamata ˈi orua i te faaafaro i te fifi, e tapao faaite te reira ua haapao noa paha oe e to hoa i te mea e taa ê ai to orua manaˈo. A feruri na râ i te mea e tu ai te manaˈo. No te tauturu ia orua, a tamata i teie:

A tahi, e tapao te tahi e te tahi i te mau mea faufaa no ˈna. Te piti, te mau mea ta orua e farii i te haapae no te faaafaro i te fifi. I muri aˈe, a tauaparau no ta te tahi e te tahi i tapao. Peneiaˈe, e faaite atu te reira ua tu to orua manaˈo i nia e rave rahi ohipa. Mai te peu tera iho â, mea ohie aˈe ia rave i te haapaeraa. Ia ore râ, e faufaa-noa-hia orua i tei tapaohia. E itehia hoi te manaˈo o te tahi e te tahi e eaha mau na te fifi.

A tauaparau. Mea ohie roa ia faaafaro vetahi fifi, te tahi atu râ e ere ïa. E piri roa ˈtu â te tane e te vahine ia aparau raua. Ma te na reira, e ite paha raua i te ravea maitai aˈe i ta raua i manaˈo no te faaafaro i te fifi.—Aratairaa Bibilia: Koheleta 4:9.

A farii i te taui i to manaˈo. Te na ô ra te Bibilia: “E aroha râ te taata atoa i tana iho vahine, mai te aroha ia ˈna ihora, e te vahine ra ia auraro oia i tana tane.” (Ephesia 5:33) Ia faaite noa te tahi i te tahi i to ˈna here e faatura, e ineine noa na hoa faaipoipo i te haapao i to te tahi atu manaˈo e peneiaˈe i te taui i to ˈna manaˈo. Te na ô ra te tahi tane faaipoipo o Cameron te iˈoa: “Te vai ra te tahi mau mea ta oe i ore i hinaaro e rave. Auaa râ te hoa i onoono ai, ua au roa oe i te reira i muri aˈe.”—Aratairaa Bibilia: Genese 2:18.