Te hoê hoa haavarevare
E “hoa” to oe ta oe i matau i to oe apîraa. E tauturu o ˈna ia oe ia paari atu â oe e ia maitai oe e o vetahi. Ia hepohepo oe e nehenehe oe e “tiaturi” ia ˈna. Mea papu, ua tiaturi noa oe ia ˈna i roto e rave rahi tupuraa.
Ua itehia mai ia oe i to ˈna huru mau. Pauroa te mahana to reira o ˈna e i te mau vahi atoa. Ua manaˈo oe maoti o ˈna ua paari mai oe, aita râ, ua ino e ua veve roa ˈtu â oe.
Aita i maoro aˈenei, ua tamata oe i te tâpû i teie auhoaraa, aita râ, o ˈna i vaiiho ia oe. Ua riro o ˈna ei fatu no oe. Ua tatarahapa roa oe i te matauraa ia ˈna.
TERA te auhoaraa e vai nei i rotopu e rave rahi feia puhipuhi i te avaava e te avaava. I muri aˈe e 50 matahiti puhipuhiraa i te avaava, te haamanaˈo ra te hoê vahine o Earline te iˈoa: “Ua tauturu mai te avaava ia ˈu, hau atu i te tahi atu taata ati aˈe ia ˈu. I te tahi taime o ˈna noa to ˈu hoa, aita e hoa mai ia ˈna.” Ua taa râ ia Earline, te avaava ei hoa haavarevare e te ino. Mea papu, e nehenehe e manaˈohia no Earline te parau faahitihia i te omuaraa, hoê noa râ taa-ê-raa. I to ˈna haapiiraa mea ino te avaava no te Atua, no te mea e faaino te reira i to tatou tino ta ˈna i horoa mai, ua faaea o ˈna i ta ˈna peu.—Korinetia 2, 7:1.
Ua faaoti atoa te hoê tane o Frank te iˈoa i te faaea i te reira no te faaoaoa i te Atua. I te hoê râ mahana, i muri aˈe i to ˈna puhipuhiraa i ta ˈna avaava hopea, ua maere roa o ˈna i to ˈna haereraa i raro aˈe i te tahua fare no te imi i te omou avaava tei topa na te area o te tahua fare. Ua parau Frank: “I reira iho to ˈu faaearaa i te avaava. I to ˈu iteraa ia ˈu e te tuturi ra no te heru i te repo ia itehia mai e au i te omou avaava, ua faufau-roa-hia vau. E aita vau i puhipuhi faahou i te avaava.”
No te aha mea fifi roa ia faaea i te avaava? Ua itehia mai e te feia hiˈopoa e rave rahi tumu: (1) E faatupu te avaava i te hinaaro maha ore mai te raau taero. (2) Ia ravehia te nicotine, e hitu noa tetoni no te tae i te roro. (3) Pinepine e tuhaa faufaa roa te avaava i roto i te oraraa o te hoê taata, ia tamaa, ia inuinu, ia paraparau, ia faafaaea e te vai atu â.
Mai ta Earline raua Frank i faaite mai, e nehenehe e faaea i teie peu maha ore. Mai te peu te puhipuhi ra oe i te avaava e te hinaaro ra oe e faaea, a taio i te mau tumu parau i muri nei o te tauturu ia oe ia haamata i te hoê oraraa apî.