E au i te manu meli, e ere râ i te manu meli

E oraraa ohipa roa to te mau manu meli, e tau haere hoi ratou na nia i te mau hanere tiare i te mau mahana atoa, e e uta ˈtu i te pape tiare i te ofaaraa. Ia tae i te tau uaaraa tiare, e imi te mau manu meli otane i te hoê hoa. No te reira, e hiˈo ratou e e hâuˈa. E huti-atoa-hia râ te ara-maite-raa o te manu meli mata mohimohi e te hoê hoa faahinaaro manaˈo-ore-hia—te tiare orchidée.

I te pae apatoa no Europa, e rave rahi mau orchidée oviri e ua taaihia to ratou faatitǒraa i nia i to ratou raveraa mai i te hohoˈa o te mau manu meli ovahine. E tia i teie mau orchidée ia afai i “te mau puohu” rea tiare i te mau hoa orchidée. O te mau manu meli ïa te mau manu faauta faahiahia roa ˈˈe. Tera râ, i te mea e aita e pape tiare monamona to te mau orchidée no te faatianiani i te mau manu meli, e tia ïa ia ratou ia haavarevare. E te haavarevareraa, e rave roa mai ïa te tiare i te hohoˈa e te hâuˈa o te hoê manu meli ovahine ia tamata te manu meli otane i te faahoa ˈtu ia ˈna! Te vai ra to te mau tiare orchidée huru rau tataitahi to ratou hohoˈa faahuru-ê-hia e to ratou hâuˈa noˈanoˈa.

I te taime e taa ˈi i te manu meli i to ˈna hape, ua tuu te orchidée i te hoê puohu rea tiare piripiri i nia i to ˈna tino. I muri iho, e rere te manu meli i nia i te tahi atu orchidée, o te haavarevare atoa ia ˈna, no te tuu atu i te rea tiare. I muri aˈe e rave rahi haavarevareraa, e taa i te manu meli e eita e nehenehe e tiaturi i teie mau orchidée. I taua taime ra, ua faatitǒ paha oia i te tahi mau tiare.

Mea nafea te noaaraa mai i teie mau orchidée aita to ratou e feruriraa, te hâuˈa e te hohoˈa tano maitai no te haavarevare i te mau manu meli? Te haapapu maira teie mau tereraa ohipa faahiahia e te vai ra te hoê Taata hamani maramarama, e e haamaere e e haafaahiahia noa ta ˈna poieteraa ia tatou.