No te aha te taata e rave rahi e patoi ai i te toto

I ROTO i te hoê faaotiraa faufaa roa, ua faautua te tiribuna no Ontario i te Croix-Rouge no Kanada no te mea ua roohia na taata e piti i pâmuhia i te toto i te tirotiro o te SIDA—ua farii raua atoa ra i te toto viivii o te hoê taata horoa toto. “Ia haamǎtaˈu te hoê mea ino mai te hoê toto viivii i te ora o te feia i pâmuhia i te toto,” ta te Haava ïa o Stephen Borins i parau, “mea titauhia te hoê ravea ru.”

I te roaraa o te mau matahiti 1980, fatata 1 200 o to Kanada tei roohia i te tirotiro o te SIDA e 12 000 hau tei roohia i te maˈi o te upaa, te hépatite C—pauroa anaˈe no te toto viivii aore ra te mau taoˈa hamanihia i te toto. No te faaiti i te numera o te mau maˈi pee, e hiˈopoa-maitai-roa-hia ˈtu â te feia horoa toto. Eita râ te feia horoa toto atoa e faaite i te parau mau no nia i to ratou huru oraraa i te pae taatiraa. Ei hiˈoraa, ua faaite te hoê tuatapaparaa i te mau Hau Amui no Marite e, 1 taata horoa toto i nia i te 50 te ore e faaite i te mau mea atâta, mai te raveraa i te taatiraa mahu aore ra i te taatiraa e te hoê vahine faaturi.

Hau atu â i teie fifi, e ere hoi te hiˈopoaraa i te toto i te mea papu roa. Ia au i te vea ra New Scientist, “ia horoa te hoê taata i te toto i raro mai i te toru hebedoma i muri aˈe i to ˈna rooraahia i te tirotiro o te SIDA, eita te mau tamatamataraa e faaite mai i te tirotiro. No te hépatite C, e nehenehe teie ‘area taime’ e raea roa hau atu i te piti avaˈe.”

I roto i te mau matahiti i mairi aˈenei, ua itehia te toparaa te numera o to Kanada e hinaaro ra e horoa—aore ra e farii—i te toto. Ua papai te papai vea o Paul Schratz e: “Te topa nei hoi te anaanatae i te horoa, e te maraa nei te numera o te feia eita e nehenehe e horoa, e haamaitai anaˈe ïa i te Atua i te mea e tei mua roa te mau Ite no Iehova i roto i te maimiraa i te mau ravea monoraa i te toto.”

Ma te faahiahia, te faatia ra te vea ra The Toronto Star e, i roto i te hoê matahiti aita i maoro aˈenei, fatata e 40 taata “i fariihia i roto i te mau fare maˈi no Kanada tei haavare e e mau Ite no Iehova ratou no te mea aita ratou e hinaaro ra i te mau pâmuraa toto.” Te faaite ra te mau tuatapaparaa e fatata e 90 % o to Kanada mea au aˈe na ratou te tahi ravea ê atu i te feia horoa toto. Inaha, e ere faahou te faaohiparaa i te toto i te hoê noa tumu parau i te pae faaroo.