Ia au i te Bibilia
E tia anei ia pari tatou ia Satani no ta tatou mau hara?
O SATANI o tei parihia no te hara matamua a te taata. “I haavare mai te ophi ia ˈu, amu ihora vau,” o ta Eva i parau. (Genese 3:13) Mai reira mai, ua tamau te “ophi tahito . . . o tei parauhia o te [D]iabolo ra, e o Satani” i to ˈna riri rahi i nia i te huitaata, ‘ma te haapouri i te feruriraa’ o te taata e ma te “haavare i to te ao atoa nei.” (Apokalupo 12:9; Korinetia 2, 4:4) Aita e taata o te nehenehe e ape i ta ˈna faateimaharaa, tera anei râ te auraa e eita tatou e nehenehe e patoi atu i ta ˈna ohiparaa? E ia hara anaˈe tatou, no ˈna noa anei te hape?
Te faataa ra te Bibilia e ua haavare mau o Satani ia Eva. (Timoteo 1, 2:14) Ua vare oia i to ˈna manaˈoraa e na roto i te auraro-ore-raa i te faaueraa a te Atua, e noaa ˈi ia ˈna te ite, mai to te Atua ra te huru e te tiamâraa. (Genese 3:4, 5) No teie manaˈo, hara ihora oia. Ua faahape râ te Atua e na Eva e amo i te hopoia e ua faautua pohe oia ia ˈna. No te aha? No te mea, noa ˈtu e o Satani tei haavare, ua ite maitai o Eva i te faaueraa a te Atua. Aita roa o ˈna i faahepohia e faaroo ore; na ˈna hoi e faatere i ta ˈna iho mau ohipa, ma te nehenehe-mau-raa e patoi atu i te ohiparaa a Satani.
A patoi atu i te Diabolo
E nehenehe tatou te mau taata e patoi atu i te Diabolo. I roto i te Ephesia 6:12, te parauhia ra e ‘te aro nei tatou’ i te mau “varua iino i te reva nei.” Ma te papu ïa, te titau maira te Atua e ia aro atu tatou i te ohiparaa a Satani. Nafea râ te hoê taata e nehenehe ai e aro atu i te puai o Satani e ta ˈna ra mau demoni o tei hau aˈe i to te taata? Te anihia ra anei tatou ia aro i te hoê tamaˈi aifaito ore, o te pau papu tatou? Aita, no te mea aita te Atua e parau ra ia tatou e aro atu i te Diabolo ma to tatou iho puai. Te horoa ra o Iehova i te mau ravea rau ia nehenehe tatou e patoi atu i te mau faahemaraa a te Diabolo e ia upootia mai tatou. Te faaite ra te Bibilia ia tatou e o vai te Diabolo, nafea o ˈna ia ohipa e nafea tatou e paruru ai ia tatou iho.—Ioane 8:44; Korinetia 2, 2:11; 11:14.
Nafea ia “patoi atu i te [D]iabolo”
Te faaitoito ra te Bibilia e piti huru taahiraa avae no te patoi atu i te Diabolo. Te faauehia ra tatou e: “E auraro atu outou i te Atua. E patoi atu i te [D]iabolo, e na ˈna e maue ê atu.” (Iakobo 4:7) Te titau ra te taahiraa avae matamua o te auraroraa tatou iho i te Atua e ia rave tatou i ta ˈna mau faaueraa. E horoa mai te ite-tamau-raa tatou e te vai mau ra te Atua, to ˈna hamani maitai, to ˈna puai e to ˈna mana maitai, e ta ˈna mau faaueraa tumu teitei i te puai ia patoi atu tatou ia Satani. E mea faufaa atoa te pure-tamau-raa i te Atua.—Ephesia 6:18.
A hiˈopoa na i te taime i faahemahia ˈi o Iesu e te Diabolo. Ua tauturu papu te haamanaˈoraa e te faahitiraa i te mau faaueraa rau a te Atua ia Iesu no te patoi atu. I to ˈna manuïa-ore-raa i te faahemaraa e ia hara o Iesu, faarue ihora Satani ia ˈna. I muri i taua tamataraa ra, na roto i te arai o ta ˈna mau melahi, ua faaitoito ihora Iehova ia Iesu. (Mataio 4:1-11) No reira ïa Iesu, ma te tiaturi, i faaitoito ai i ta ˈna ra mau pǐpǐ ia ani i te Atua e ‘faaora ia ratou i tei ino ra.’—Mataio 6:13.
Te faaoraraa te Atua ia tatou, e ere ïa te auraa e e tuu oia i te hoê paruru ite-ore-hia na pihai iho ia tatou. Te parau nei râ oia e ia pee tatou i te mau huru maitatai a te Atua, mai te parau mau, te parau-tia, te hau e te faaroo. E ohipa teie mau huru mai te hoê “haana tamaˈi,” ia nehenehe tatou “ia patoi atu i te mau ravea paari a te [D]iabolo ra.” (Ephesia 6:11, 13-18) No reira ïa, ma te tauturu a te Atua e nehenehe ai tatou e patoi i te mau tamataraa a te Diabolo.
Te piti o te taahiraa e faaitoitohia ra i roto i te Iakobo 4:7 o te “patoi atu i te [D]iabolo.” E titau te reira i te ohipa-papu-raa, te maue-ê-raa i ta ˈna ohiparaa ino. E tia i te taata eiaha ia tuu ia ˈna iho i raro aˈe i to ˈna puai haavare e ia haapae i te mau philosopho materia e taiata o te parare roa i roto i te ao i teie mahana. E mea faufaa roa teie patoiraa i te Diabolo e te hoê oraraa pûpûhia no te faaoaoa i te Atua, no te aroraa ˈtu ia Satani. Tera râ, pauroa te mau hara e faahopearaa anei te reira no te ohiparaa a te Diabolo?
Ta tatou aroraa mai roto mai
Te faataa ra te taata papai ra o Iakobo e: “Ua haavarehia . . . te taata ia faahahau-ê-hia, e ia riro noa ˈtu i to ˈna iho hinaaro tia ore. E ua tô anaˈe taua hinaaro tia ore ra, fanau maira ta ˈna, o te hara.” (Iakobo 1:14, 15) Ma te peapea, eita tatou e nehenehe e na nia iho roa i te paruparu e te huru tia ore e vai ra i roto ia tatou. (Roma 5:12) “Aita mau e taata parau-tia i te fenua nei, o tei rave i te parau maitai, e aore roa e hara,” o ta te Bibilia e parau ra.—Koheleta 7:20.
E ere ïa te auraa e eita roa tatou e nehenehe e haavî i te mau hara atoa. I te tahi taime, na roto i ta tatou maitiraa tano ore, e hopoi tatou i te mau tamataraa i nia ia tatou iho. Noa ˈtu e no roto mai i to tatou huru tia ore aore ra no ô mai ia Satani ra te hoê hinaaro tano ore, tei ia tatou râ te parau no te manaˈonaˈo-noa-raa i te reira aore ra no te faarueraa. Ma te tano, ua papai te aposetolo Paulo e: “O ta te taata e ueue ra, o ta ˈna â ïa e ooti mai.”—Galatia 6:7.
A farii i te amo i te hopoia
Pinepine e mea fifi no te mau taata ia farii i to ratou iho mau paruparu, mau hape, mau hapa rii—oia mau, mau hara. (Salamo 36:2) Te hoê mea o te nehenehe e tauturu ia farii tatou i te amo i te hopoia no ta tatou mau hara, o te iteraa e aita te Atua e titau maira i teie nei ia vai tia roa tatou. “Aita aˈenei oia i tahoo mai ia tatou e ia faito i ta tatou mau hara, aore hoi i faautua mai ia tatou e ia faito i to tatou mau ino,” i faˈi na te taata papai salamo ra o Davida. (Salamo 103:10) I te mea e e faaore te Atua i te hara, e titau â oia ia aro uˈana tatou, ia haavî tatou ia tatou iho, no te patoi i te mau faahemaraa a te Diabolo e to tatou iho hinaaro i te rave i te hara.—Korinetia 1, 9:27.
E tia ia tatou ia taa e i te mea e e farii te Atua e e nehenehe te Diabolo e haafifi i ta tatou mau ohipa e te amo ra o ˈna i te hoê tuhaa rahi o te hopoia no te huru hara o te huitaata nei, aita te reira e faaiti ra i ta tatou iho hopoia. No reira te parau ra te Roma 14:12 e: “E hope roa tatou atoa i te faˈi i te parau ia ˈna iho i te Atua ra.”
Mai te peu râ e e “riaria [tatou] i te ino” e e “ati atu i te maitai,” e nehenehe tatou e upootia mai i nia i te ino. (Roma 12:9, 21) Aita te vahine matamua o Eva i manuïa no te rave i te reira e ua faautuahia o ˈna no to ˈna faaroo ore; e nehenehe hoi o ˈna e patoi atu e e auraro i te Atua. (Genese 3:16) Ua tâuˈa râ te Atua i te ohipa a te Diabolo i to ˈna faahemaraa ia Eva. Ua faainohia te Diabolo e ua faautuahia o ˈna i te haamouraa. (Genese 3:14, 15; Roma 16:20; Hebera 2:14) Fatata tatou i te ore e aro faahou i ta ˈna ohiparaa ino.—Apokalupo 20:1-3, 10.
[Faaiteraa i te fatu o te hohoˈa i te api 24]
Erich Lessing/Art Resource, NY