E moemoeâ noa ra anei te oraora-maitai-raa tia roa?
UA ROO-AˈENA-HIA ra anei oe i te hoê maˈi ino mau aore ra tâpû-aˈena-hia ra anei oe e te taote? Ahiri e e, i teie nei, ua hau atu ïa oe i te mauruuru i te oraraa. Noa ˈtu râ eaha te huru o to oe tino, te tiaturi ra anei oe e e nehenehe oe e fanaˈo i te oraora-maitai-raa tia roa? E au ra e e ere te reira i te mea mau ia hiˈo-anaˈe-hia te rahiraa o te mau maˈi ino mau, mai te mariri ai taata aore ra te maˈi mafatu. Oia mau, i tera e tera taime e roohia te rahiraa o tatou i te maˈi. E ere râ te oraora-maitai-roa-raa i te hoê noa moemoeâ.
Ua poietehia te taata ia fanaˈo oia i te oraora-maitai-roa-raa, eiaha râ no te aro atu i te maˈi e te pohe. No te faaore râ i te maˈi e te pohe, ua horoa o Iehova i te niu no te oraora-maitai-raa tia roa e no te ora mure ore na roto i te tusia no te hoo o Iesu Mesia. “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16) Eita te feia o te ora e a muri noa ˈtu i roto i te ao apî i tǎpǔhia a te Atua e faaruru faahou i te tino maˈimaˈi aore ra i te ruhiruhia. I te mea e tera iho â, eaha ïa te tupu mai no te mau maˈi?
Te oraraa mai i te maˈi
Te horoa ra te huru faaoraraa i te huma a Iesu Mesia i te hoê hohoˈa. No nia i teie mau faaoraraa maˈi, ua parauhia e: “Ua faaorahia te matapo, ua haere te pirioi, ua faaroo te turi, ua tamâhia te lepera, ua faatiahia tei pohe, e ua parauhia te parau oaoa i te taata rii.” (Mataio 11:3-5) Oia mau, “ua ora roa ïa” te mau huma atoa o tei haafatata ˈtu ia Iesu. (Mataio 14:36) Ei faahopearaa, “maere anaˈe ihora taua feia rahi ra, i te iteraa ratou i te vava i te parauraa, e te paruparu i te oraraa, e te pirioi i te haereraa, e te matapo i te hiˈoraa; haamaitai atura ratou i te Atua o Iseraela.”—Mataio 15:31.
Parau mau, noa ˈtu e aita e taata te nehenehe i teie mahana e faaora mai teie te huru, e nehenehe tatou e tiaturi e i raro aˈe i te faatereraa a te Atua e naeahia e te taata te tia-roa-raa, e ora mai oia i te mau maˈi atoa o te feruriraa e o te tino. Ua papaihia te parau fafau a te Atua i roto i te Apokalupo 21:3, 4: “Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”
A manaˈo noa na i te hoê ao eita e titauhia te tapihooraa raau aore ra te mau fare maˈi, te tâpûraahia e te taote aore ra te rapaauraa! Hau atu, i roto i te Paradaiso apî, e riro te hepohepo e te mau maˈi o te feruriraa ei mau mea tahito. E riro te oraraa ei mea au roa e te oaoaraa, ei manaˈo putapû tamau. Oia mau, e faaoioi te puai hope o te Atua i te ravea faaapîraa o te tino, e e faaore te faufaa o te hoo i te faahopearaa ino o te hara. “E ore hoi to reira e parau e, Ua paruparu vau i te maˈi.”—Isaia 33:24.
Auê ïa tiaturiraa faahiahia mau â—te fanaˈoraa i te oraora-maitai-raa tia roa o te tino e i te pae varua i raro aˈe i te Basileia o te Atua! A tapea ˈi oe i te hoê huru oraraa aifaito e te maitai i teie nei, a hiˈo i mua ˈtu no te mau haamaitairaa o te ao apî a te Atua. Ia tia ia Iehova ‘o tei faaî i to oraraa i te maitai, ia faaapî-faahou-hia oe mai te aeto ra’!—Salamo 103:5.