“E au ra e te amu ra vau i te meli”

I TE afa matahiti 1993, i Altus, i Oklahoma, i te mau Hau Amui no Marite, ua pure te hoê metua tane e haapeapea ra, e raatira faehau oia no te U.S. Air Force, no te ani i te aratairaa no te tauturu i ta ˈna tamahine e fifihia ra i roto i to ˈna faaipoiporaa e e opua ra e faataa. I te poipoi aˈe, ua tia ˈtu te hoê Ite no Iehova i to ˈna uputa ra e ua pûpû atu ia ˈna i te A ara mai na! o te 8 no Tiurai 1993, o te vauvau ra i te tumu parau ra “Te faataa-ê-raa—E uputa anei no te hoê oraraa maitai aˈe?”

Noa ˈtu e aita roa ˈtu teie taata i au na e i faaroo na i te mau Ite na mua ˈˈe, ua farii e ua taio oia ma te aau tae i taua A ara mai na! ra. I muri iho, ua tauaparau oia e ta ˈna tamahine no nia i te mau irava e te mau manaˈo o taua vea ra. Ua taio atoa oia i Te Pare Tiairaa i vaiihohia ˈtu e te A ara mai na! Te vai ra te hoê tumu parau i roto o tei turai ia ˈna ia feruri hohonu i nia i te Toru Tahi o ta ˈna i tiaturi maoro na. Ua taa ia ˈna e ua pahonohia mai ta ˈna pure no te tauturu i ta ˈna tamahine, ua uiui râ oia e no te aha te Atua e faaohipa ˈi i te feia e ore e tiaturi i te Toru Tahi no te pahono i ta ˈna mau pure. Ua feruri atura oia e mea papu e eita te Atua e faaohipa i te mau taata no te pahono i te mau pure, mai te peu e aita ratou e haapii ra i te parau mau.

Ua ru atura oia i te taniuniu i te Piha no te Basileia a te mau Ite no Iehova no te ani i te tahi mau papai o te faataa maramarama maitai atu â i ta ratou mau tiaturiraa no nia i te Toru Tahi. Tei roto hoi te taata i pahono i te niuniu paraparau, i te hoê putuputuraa a te mau matahiapo Kerisetiano. Ua haere oioi atura te raatira faehau i te Piha no te Basileia, i reira te horoaraahia mai ia ˈna ra te buka ra E nehenehe oe e ora e a muri noa ˈtu i roto i te paradaiso i nia i te fenua nei e te vea iti ra E tia anei ia tiaturi i te Toru Tahi?

I taua iho po ra, ua taio taatoa te taata i te vea iti. A taio ai oia, ua horuhoru roa oia, ua parau oia i muri iho e ua tia ia ˈna ia faaea rii e ia na ô e, ‘A haere mǎrû. E mea maere mau. E mea faahiahia roa no te tiaturi.’ Ua vauvau te vea iti ma te maramarama roa i te mau haapapuraa a te Bibilia no te faahapa i te Toru Tahi, e ia oti ta ˈna taioraa, ua faataa aˈera oia e, “e au ra e te amu ra vau i te meli.” I te po i muri iho, ua haere oia i ta ˈna putuputuraa matamua e te mau Ite no Iehova e ua oaoa oia i ta ˈna i faaroo.

I muri aˈe i ta ˈna haapiiraa Bibilia matamua e te mau Ite no Iehova e te hoê tauaparauraa hohonu i nia i te manaˈo o te Bibilia no nia i te avaava, ua faarue oia i ta ˈna mau avaava e aita roa ˈtu i puhipuhi faahou. Ua faaterehia ˈtura te hoê haapiiraa Bibilia e o ˈna e rave rahi taime i te hebedoma taitahi. E toru avaˈe i muri aˈe i to ˈna taioraa i te vea iti ra Toru Tahi e to ˈna faarueraa i te nuu, ua haamata ˈtura oia i te apiti i roto i te ohipa pororaa i mua i te taata e te mau Ite. E toru avaˈe i muri iho, ua faataipe oia i to ˈna pûpûraa ia ˈna no te Atua ra o Iehova na roto i te bapetizoraa. Te tavini nei oia i teie nei ma te taime taatoa.