No te aha eita e nehenehe e itehia te mau fetia
O VAI o tei ore i hiˈopoa na i te po i te raˈi e o tei maere i te anapanapa nehenehe mau o te mau fetia e rave rahi i roto i te reva teitei? Tera râ, te moe ê mǎrû noa ra teie anapanapa faahiahia mau i to tatou mata. No te aha? No te haaviiviiraa o te mau mori.
Ua riro te haaviiviiraa o te mau mori ei turamaraa puai mau, ei haamohimohiraa i te mata o tei faatupuhia na te ravea turamaraa a te taata o te mau purumu, mau fare, mau fare toa, mau fare huiraatira, e o te mau tahua tuaro. Te parare ra te afaraa o teie maramarama i nia i te raˈi, ma te haafifi i te hiˈoraa tatou i te rahiraa o te mau fetia. Eaha te inoraa mau o teie fifi? Ia ateatea maitai anaˈe te raˈi i te po pouri i te pae apatoerau no Europa, ei hiˈoraa, e nehenehe ta te mata e ite tau 2 000 fetia. Ua topa râ teie numera i nia i te 200 no te feia e ora ra i rapaeau mai i te hoê oire, e i ropu i te hoê oire maramarama maitai, e 20 noa ïa fetia te itehia. Te mǎtaˈu nei te tahi mau taata tuatapapa i te reva teitei e ia ore anaˈe te mau parururaa e ravehia, eita te mau fetia e itehia i te pae apatoerau no Europa i roto tau 25 matahiti.
Parau mau, mea faufaa roa te tahi tau lamepa. E tapea oia i te taparahiraa taata e e turai oia i te mau fatu fare paruparu ia ore e mǎtaˈu faahou. E tauturu râ teie rahiraa mori vai tahaa noa i te faateimaharaa rahi e e haafifi taue oia i te taotooto-maitai-raa. E ere te huitaata anaˈe o tei fifihia ra. E nehenehe te mau manu ratere e te mau manumanu iti e faanevanevahia e te mori, e e nehenehe e hape hoê mahana o te tupuraa o te mau raau tanu.
Eaha râ ïa te nehenehe e ravehia no te tamǎrû i teie fifi? Hoê faanahoraa maitai roa oia hoi ia papu e ua paruru-maitai-hia te turamaraa i rapaeau e te turama ra oia i raro. E nehenehe te mau mori paruru e riro mai ei taoˈa faaharuharu, maoti râ i te ama noa. Ua faatitiaifaro te hoê tuhaa oire no Farani i teie fifi ma te faaôraa i rapaeau i te mau lamepa totiumu auauahi puai mau, o tei horoa mai i te opereraa maramarama ma te papu maitai, e ma te faatanoraa i te tapoˈi mai ta tatou e ite ra i nia i te mau mori purumu, ma te turamaraa i raro. E anaana mai te mau purumu e te anaana mori i roto i te ta ereere, e e tupohehia te mau mori i nia i te mau fare huiraatira tahua teitei i muri aˈe i te hora 11 i te po. Eita teie huru raveraa e faaore noa i te mau mori tia maitai e e faaiti noa mai i te maramarama o te mori e piti i nia i te toru, ua maraa râ te faufaa uira i nia i te 30 %.
Parau mau, e anihia i te taime e te moni no te mau ravea atoa mai teie te huru—mea varavara roa te faanavairaa faufaa i teie mau mahana. Auê ïa i te faahiahia i te iteraa e faatata roa te Basileia o te Atua faaterehia e ta ˈna Tamaiti, o Iesu Mesia, e faaore i te mau huru haaviiviiraa atoa! I muri iho e nehenehe faahou â ta ˈna mau tavini e ite maitai i te ohipa o ta to tatou Poiete i hamani, te mau raˈi tei î i te mau fetia nehenehe mau.—Salamo 19:1, 2; Apokalupo 11:18.