Ia au i te Bibilia

E mea mau anei te mau demoni?

I TE roaraa o te mau senekele 17 e 18, ua tupu na te hamani-ino-raa uˈana i nia i te mau vahine tahuˈa i roto i te rahiraa fenua no Europa. E rave rahi vahine faahua tahuˈa o tei haamauiui-uˈana-hia. Ua faˈi vetahi o tei pari-hape-hia, e mau vahine tahuˈa ratou no te ape noa i te haamauiuiraa. E rave rahi roa o tei haapohehia no te mau parau a te taata aore ra no te mau manaˈo iino.

Noa ˈtu e ia hiˈohia e ua niuhia i nia i te mau Papai, e mea maamaa roa teie mau mea i tupu i nia i te ohipa tahuˈa, te hoê huru ohipa demoni. Aita i faauehia i te mau Kerisetiano ia haamauiui aore ra ia haapohe i te mau vahine tahuˈa aore ra i te tahi atu feia hiˈohiˈo. (Roma 12:19) Eaha ïa te haerea e itehia ra i teie mahana?

E haerea tapitapi ore

I teie mahana, aita te rahiraa o te mau taata i roto i te Amuiraa faaroo kerisetiano e manaˈo ra e mea atâta teie mau ohipa hiˈohiˈo. No to ratou hinaaro e ite, te faaô ra paha vetahi i roto i te peu hiˈo fetia, te ohipa tairoiro, te peu pifao, e te ohipa tahuˈa, aita râ ratou e hiˈo ra i teie mau ohipa tahutahu ei ohipa demoni. I te tahi mau taime, ua faˈi tahaa te feia faaanaanatae, te mau maona, e te feia politita e ua rave na ratou i te ohipa tahutahu. Te faahohoˈa ra te tahi mau buka e te mau hohoˈa tavirihia i te mau vahine e te mau tane tahuˈa mai “te mau taata haviti, taa ê rii, e aita ta ratou mau ohipa tei hau aˈe i te natura e haamauiui ra i te hoê taata,” o ta te hoê buka parau paari ïa e faahiti ra. Te horoa ra paha te mau tumu parau i faataahia no te faaanaanatae e no te haapii i te mau tamarii, i te mau upoo parau tahutahu.

E nehenehe teie haerea tapitapi ore e te matauhia i mua i te ohipa hiˈohiˈo e aratai ia ore e tiaturi e te vai mau ra te mau demoni. Te tiaturi ra anei outou e te vai mau ra te mau demoni e te tamata uˈana nei ratou i te haamauiui ia tatou? Tera râ, e parau paha te rahiraa o te mau taata i teie mahana e aita roa ˈtu ratou i farerei aˈenei i te mau demoni aore ra aita ratou i ite mata aˈenei i ta ratou mau ohipa. E mea mau anei te mau demoni?

Ua riro te oreraa e tiaturi ei fifi

Te farerei nei te feia e parau ra e te farii ra ratou i te Bibilia, o te feaa nei râ i nia i te vai-mau-raa o te mau demoni, i te hoê fifi. Mai te peu e aita ratou e tiaturi ra e mea mau te mau demoni, aita ïa ratou e tiaturi roa ra i te Bibilia. No te aha? No te mea te haapiihia ra te manaˈo no nia i te mau varua iino e e mana to ratou tei hau aˈe i to te taata nei, i roto i te Parau a te Atua, te Bibilia.

Te faatia ra ta ˈna buka matamua, te Genese, e mea nafea to te hoê varua maramarama faaohiparaa i te hoê ophi no te faahema ia Eva e no te aratai ia ˈna ia orure hau atu i te Atua. (Genese 3:1-5) Te faataa ra te buka hopea a te Bibilia, te Apokalupo, i teie faahema ino, te “ophi tahito,” mai “tei parauhia o te diabolo ra, e o Satan[i] hoi, o tei haavare i to te ao atoa nei.” (Apokalupo 12:9) Ua manuïa o Satani i te arato i te tahi atu mau melahi ia orure hau. (Iuda 6) I roto i te Bibilia, ua piihia teie mau melahi o tei hiˈa, te mau demoni. Te ohipa nei ratou na te hiti o te fenua e e riri rahi to ratou i te Atua e i te feia e tavini ra ia ˈna.—Apokalupo 12:12.

E mana to Satani e to te mau demoni no te ume, no te haamauiui, e no te paraparau i te mau taata. (Luka 8:27-33) Ua tuatapapa ratou i te natura o te taata tau tausani matahiti te maoro. Ua ite ratou e nafea ia hauti i nia i te mau paruparu o te taata. Te faatia ra te Bibilia i te mau ohipa tei tupu, oia hoi ua uruhia te mau tane, te mau vahine, e te mau tamarii aore ra ua faatere-taatoa-hia ratou e te mau demoni. (Mataio 15:22; Mareko 5:2) E nehenehe ratou e faatupu i te maˈi aore ra i te hapepa i nia i te tino mai te mataporaa. (Ioba 2:6, 7; Mataio 9:32, 33; 12:22; 17:14-18) E nehenehe atoa ratou e haapoiri i te feruriraa o te taata. (Korinetia 2, 4:4) Te rohi tamau nei te mau demoni, mai to ratou raatira atoa, o Satani, e au i “te liona uuru ra, i te imiraa i te taata e pau ia ˈna ra.” (Petero 1, 5:8) E rave rahi aamu i roto i te Bibilia o te faatia ra e te vai mau ra te mau demoni. Mai te peu e te tiaturi ra outou i te Bibilia, e farii ïa outou e te vai mau ra te mau varua iino ite-ore-hia e te mata nei.

Te mau varua haavare iino

Teie râ, nafea te mau demoni puai ia vai mai i teie mahana ma te ore e faatupu tamau i te mǎtaˈu i roto i te ao nei? No te aha ïa aita e ite-papu-hia ra to ratou vai-mau-raa e ta ratou mau ohipa? Te pahono ra te Bibilia e: “O Satani hoi tei faahua melahi atoa ia ˈna iho no te maramarama.” (Korinetia 2, 11:14) E varua haavare te Diabolo. E pinepine te ohipa demoni i te faahuru-ê-hia ei ohipa mauiui ore aore ra maitai. No reira, e mea fifi ia ite i te reira.

Te tamau noa ra o Satani e ta ˈna mau demoni i te haamauiui i te taata na roto i te mau huru ravea atoa, mai ta ratou i rave na i te mau tau Bibilia ra. Ua rave na vetahi, e mau Kerisetiano mau hoi ratou i teie nei, i te hoê taime i te ohipa tahutahu; e nehenehe ratou e haapapu e mea riaria mau â te mau aroraa a te mau demoni. I teie mahana, i nia paha i te hoê faito rahi aˈe i na mua ˈˈe, te faaohipa nei te mau demoni i to ratou mau mana tei hau aˈe i to te taata nei no te arato i te taata i roto roa i te mau ohipa tahutahu. Eiaha e haafaufaa ore i to ratou mana. Teie râ, te rohi nei ratou hau aˈe na roto i te faahemaraa i te taata ia faarue i te Atua i te haamǎtaˈuraa ia ratou. Te “haavare” nei o Satani e te mau demoni “i to te ao atoa nei,” o ta te Bibilia ïa e parau ra. (Apokalupo 12:9) Te opua nei ratou i te faaino i te huru pae varua na roto i te mau ravea aravihi e te haavarevare.

E mea mau te mau demoni. Nafea ˈtu â ïa ia faataa i te hiaai mâha ore e haamanii i te toto e e haapohe o te ite-rahi-hia ra i rotopu i te mau taata i teie mahana? E hinaaro iho â te taata e ora ma te hau e te oaoa. Te faatupu nei râ te mau demoni i te ino e e mana to ratou no te ume e no te haaviivii i te feruriraa o te taata.

Tera râ, e Atua mana hope o Iehova—e mea puai aˈe o ˈna i te mau demoni. Te pûpû maira oia i to ˈna puai e ta ˈna paruru i mua i “te mau ravea paari a te diabolo.” (Ephesia 6:11-18) Eiaha tatou e riaria i te mau demoni, no te mea te tǎpǔ ra te Atua e: “E tena na, e auraro atu outou i te Atua. E patoi atu i te diabolo, e na ˈna e maue ê atu.”—Iakobo 4:7.

[Faaiteraa i te fatu o te hohoˈa i te api 26]

Sipa Icono