E auau anei oe i to oe niho?

MAI tahito mai â to te taata auauraa i to ratou niho ia faaruru ratou i te faateimaharaa. Mea pinepine te Bibilia i te faaohipa i te parau ra auauraa niho no te faaite i te riri aore ra te riaria. (Ioba 16:9; Mataio 13:42, 50) I teie tau î i te riri e te faateimaharaa, tau mirioni mau taata teie e auau nei i to ratou niho, e no te rahiraa, eita ïa e nehenehe faahou e na reira. Peneiaˈe ua tatarahia e ratou to ratou mau niho haavare.

No te aha te tahi mau taata e auau ai i to ratou niho? E rave rahi mau tumu aitâ râ e maramarama-paatoa-hia ra. I roto râ i te tahi mau tupuraa, te itehia ra e, peneiaˈe, o te faateimaharaa te tumu. Te faaite mai nei te UC Berkeley Wellness Letter e: “Mea pinepine te feia e auau i to ratou niho i te parau e te farerei nei ratou i te mau fifi i te pae o te faaipoiporaa aore ra o te moni, te haere ra ratou i te hoê hiˈopoaraa rahi, te mǎtaˈu ra ratou ia erehia ratou i ta ratou ohipa, aore ra tei raro aˈe ratou i te faateimaharaa.” Te tahi atu â mau tumu e mau mea e faatupu i te reira, o te tû-ore-raa ïa o te niho i nia e te niho i raro, te mau fifi o te taoto, aore ra te inuraa i te ava. No reira te Wellness Letter e horoa ˈi i te manaˈo i te feia e farerei ra i teie fifi ia faaiti mai i ta ratou ava; aore ra ia rave noa i te tahi ohipa no te tamǎrû i to ratou tino a haere atu ai e taoto, mai te hopuraa i te pape mahanahana; aore ra te faaiteraa i to ratou mau hepohepo i te hoê hoa aore ra te hoê taata e horoa i te manaˈo paari ta ratou e tiaturi.

Ia ao, e ite paha oe e te auau ra oe i to oe niho aore ra te orooro ra oe ia ratou. Nafea râ oe e ite ai e te na reira ra oe ia taoto oe? E pinepine te auauraa niho tamau e te ite-ore-hia, i te faaroo-maitai-hia e te faaara roa i te hoê taata ê e taoto atoa ra i roto i taua piha ra. Peneiaˈe e mauiui to oe upoo ia ara mai oe, aore ra e maniania to oe taa.a E ite mai paha to oe taote niho i te pau rahi i nia i to oe mau niho. E nehenehe oia e horoa i te tahi mau ravea haamaitai, mai te hoê taoˈa ta oe e tuu i nia i to oe niho ia pô. Noa ˈtu â eita te hoê ravea mai teie e faaore i ta oe auauraa niho, e paruru râ oia eiaha to oe niho ia ino roa ˈtu â. Noa ˈtu eaha te tupuraa, eiaha e haapeapea! Ia iti to oe haapeapea, e iti atoa ïa ta oe auauraa niho.

[Nota i raro i te api]