Géorgie—Te hoê tufaa tupuna tahito tei faahereherehia
NA TE PAPAI VEA A A ARA MAI NA!
E HINAARO anei outou e ora i roto i te hoê fenua e mea rahi te mau peho i rotopu i te mau mouˈa tapoˈihia e te hiona e 4 600 metera te teitei, i reira, te ora nei vetahi mau taata 100 matahiti e hau atu? No te feia e noho ra i Géorgie, e ere te reira i te moemoeâ. E mea mau râ.
Tei pihai iho o Géorgie i te otia i te pae teotarafia e i te pae hiroa tumu, i rotopu ia Europa e ia Asia. I mutaa ihora, ua riro na o Géorgie ei vahi faufaa i nia i te Purumu Tirita tuiroo, ua na nia atoa o Marco Polo i teie purumu no te haere i Taina. Ua fanaˈo o Géorgie i te pae moni e i te pae hiroa tumu na roto i teie taairaa i rotopu i te pae Hitia o te râ e i te pae Tooa o te râ, i te tahi râ mau taime, e haere atoa na te feia haru fenua na nia i teie purumu no te mea e mea ohie. Ia au i te hoê numeraraa, ua haamouhia na te oire pu no Géorgie, o Tbilisi, e 29 taime! I teie mahana, ua riro o Tbilisi ei oire taata roa e te ohipa, e pereoo atoa ta ˈna o te tere na raro i te fenua e e mau fare tahua apî anoihia e te mau paturaa tahito.
Tau 87 % o te fenua no Géorgie, e mouˈa ïa. Mai te mau vahi teitei toetoe roa e te moemoe e tae atu i te mau peho, te tahe ra e 25 000 anavai, e rave rahi tei î i te iˈa ra truite. Hau atu i te hoê i nia i te toru tuhaa o te fenua, e ururaau ïa aore ra e uruaihere. Ua riro te mau mouˈa no Caucase i te pae apatoerau o te otia no Géorgie ei paruru i te rotoraa o te fenua i te toetoe na te pae apatoerau mai. Na roto i teie tupuraa, e nehenehe ïa te pae tooa o te râ no Géorgie e tamahanahanahia e te mataˈi haumi no ǒ mai i te Miti Ereere ra—no reira o Géorgie i riro ai ei vahi au-roa-hia e te feia faafaaea. Ua turu atoa te ahuaraˈi haumǎrû i te hoê o te mau peu tumu tahito roa ˈˈe e te maitai roa ˈˈe i te ao nei, i te pae no te hamaniraa i te uaina. Inaha, te hamani nei o Géorgie hau atu i te 500 vine e uaina huru rau!
Tera râ, to Géorgie vahi maitai rahi roa ˈˈe, o to ˈna ïa mau taata. Ua matauhia na ratou i te roaraa o te mau tau, ei feia itoito, maramarama, e te farii maitai roa, e e feia ataata atoa ratou e te here i te ora. Mea rahi te himene e te ori i roto i ta ratou hiroa tumu, e e himene-pinepine-hia na te mau himene tumu i muri aˈe i te tamaaraa i roto i te mau fare i Géorgie.
E mea roa atoa te aamu o Géorgie i te pae o te mau papai, mai te senekele 5 mai â. O te reo Géorgien te hoê o te mau reo matamua roa ˈˈe mea na reira te Bibilia i te huriraahia, o tei faaohipa i te piapa taa ê e te nehenehe o te reo Géorgien. Te faatupu ra teie hiroa tumu atoa i te hoê oraraa tei taaihia i te tau i mutaa iho o Géorgie—te hoê tufaa tupuna tahito tei faahereherehia i roto i te hoê fenua no teie nei tau.
[Faaiteraa i te fatu o te hohoˈa i te api 24]
Pat O’Hara/Corbis
[Hohoˈa i te api 25]
1. Te Bibilia Géorgien
2. Te ora ra vetahi feia 100 matahiti e hau atu!
3. Te hoê aroâ tei î i te taata i Tbilisi
[Faaiteraa i te tumu]
Dean Conger/Corbis