“Ua faaora mai te A ara mai na! ia ˈu”

“I te 11 no Novema 1996, i te area hora 10 i te po,” o ta Arthur ïa e faatia ra, no Suva oia, i te fenua Fiti, “ua haamata ihora to ˈu ouma i te mauiui, e ua manaˈo aˈera vau e ǎhu ouma noa tera. Ua manaˈo râ ta ˈu vahine o Esther e, e maˈi mafatu to ˈu, e ua parau oia, hoê â huru tupuraa teie ta ˈu e farerei ra e o tei faaitehia i roto i te A ara mai na! o te 8 no Titema 1996, oia “Te maˈi mafatu—Eaha te ravea?,” ta ˈna hoi i taio aˈenei.

“Ua niuniu atura vau i to ˈu taote, e ua parau maira oia ia ˈu ia rave i te raau no te ǎhu ouma, ia haere e taoto, e farerei atu ai ia ˈna i te poipoi aˈe. Tera râ, ua tamau noa te mauiui. Ua ani atura vau ia Esther ia afai mai i te A ara mai na! e ia taio mai tera tuhaa “Te mau tapao o te maˈi mafatu.” I muri aˈe i to ˈna taioraa mai, ua farii aˈera vau i te haere i te fare maˈi.

“Na te mau tuatapaparaa i te fare maˈi i faaite mai e ua tupuhia vau i te maˈi mafatu e ua tapeahia vau i reira. I roto i na mahana e pae i muri iho, ua tuuhia vau i raro aˈe i te raau haamǎrû e ma te faaea tarava noa. Ua parau te taote taa ê no te mafatu e, e taata fanaˈo vau no te mea ua itehia mai to ˈu maˈi mafatu.

“I te 9 no Tenuare 1997, e maha hora te tâpûraahia to ˈu mafatu i Sydney, i Auteralia. ‘Ua piri rahi roa te uaua o te mafatu,’ o tei papaihia ïa i roto i te parau faataa a te taote tâpû. Na te huru o te mau uaua o to ˈu mafatu i faaite e ua fatata roa vau i te roohia i te maˈi mafatu fifi mau, tau avaˈe noa i muri iho ahiri aita i itehia teie maˈi i tupu i te 11 no Novema.

“E nehenehe ta ˈu e parau ma te papu maitai e, ua faaora mai te A ara mai na! ia ˈu, no te mea hoi e, ua manaˈo na vau e, e maˈi ǎhu ouma ino noa to ˈu.”

Te tutava ra te A ara mai na! i te vauvau i te taime au e rave rahi mau haamaramaramaraa apî. Mai te peu e e hinaaro outou i te farii tamau i teie vea, a faaite atu ïa i te mau Ite no Iehova ia farerei anaˈe outou ia ratou aore ra a papai atu i te hoê o te mau vahi nohoraa i te api 5.