Te ao unauna o te ǎau toˈa

NA TE PAPAI VEA A A ARA MAI NA! I TE FENUA PAPUA

TE HAAATI nei te mau ǎau toˈa fatata i te fenua Papua taatoa. I mutaa ihora, e faariro na te mau ihitai i teie mau ǎau ei atâtaraa rahi. Area no te feia o tei hopu i roto i te mau pape e haaati ra i teie mau ǎau ra, ua riro te mau ǎau toˈa ei uputa e pipiha ˈtu i roto i te hoê ao haviti mau, te unauna, e te hau—e ao peni rau i raro i te miti!

E ere roa ˈtu i te mea ohie ia pata i te hohoˈa i roto i taua ao i raro i te miti ra. A tahi, te mau taoˈa i raro i te pape, e au ra e mea nainai rii aˈe ratou i to ratou faito mau; e mea fifi roa ˈtura ïa ia faatano i te pata hohoˈa. E haru mai hoi te pape i te maramarama, e haapurara, e e faatioi atoa ˈtu. E tauiui rahi atoa te mau peni, ia au i te huru o te mahana, te vahi mea na reira mai te hihi mahana, te mau rimu e te taoˈa plancton i roto i te pape, te hohonuraa o te pape, e te huru e te peni o te tahua o te miti. Hau atu â, e hautiuti noa te pape, te taoˈa e patahia ra i te hohoˈa, e te taata pata hohoˈa iho!

Noa ˈtu râ, ua manuïa vetahi feia i te pata i te mau hohoˈa nehenehe roa. Te mau hohoˈa o ta outou e ite ra i ǒ nei, ua patahia ïa i roto i te tahi mau tere mataitairaa i raro i te miti. E faaite atu matou e maha o te mau mea ora faahiahia mau i patahia i raro aˈe i te mau are.

Te faaite ra te hohoˈa 1 i te hoê taoˈa nehenehe roa o te moana, oia hoi te poreho, parauhia nemera (Cypraea tigris). Mea huru ê rii teie nei iˈoa no te mea, mea patapata teie poreho, e ere râ i te mea toretore. Teie iho â te vahi nohoraa o teie poreho, no te mea e amu oia i te toˈa e te rimu. No to ratou faahiahia i teie nei pupu, ua faaohipa na te mau Tinito no tahito ra ia ˈna ei taoˈa aufau. I te fenua Papua, te faaohipa-noa-hia nei â te mau poreho ei taoˈa aufau i roto i te tahi mau matete a te huiraatira tumu. I te rahiraa râ o te taime, te ohi nei te mau taata no teie fenua i te mau poreho no to ratou anaana e to ratou nehenehe.

Te faaite ra te hohoˈa 2 i te tahi mau toˈe toˈa unauna mau (Spirobranchus giganteus). E nehenehe oia e ora i nia i te toˈa pohe aore ra i nia i te toˈa ora. Ia paia maitai oia, e au oia i te hoê tiare. Ia poia râ oia, e taviriviri noa to ˈna mau ave mai te hoê “upeˈa” ra no te haru oioi mai i te maa e na mua mai. Ia hautiuti anaˈe to ˈna mau ave huruhuru, e au roa i te tahi feia ǒri e tairiiri mǎrû noa i ta ratou tahiri. Tau 10 milimetera noa teie toˈe i te aano. Tera râ, eiaha te taata pata hohoˈa ia hauti taue. Ia ite anaˈe oia i te tahi mea atâta, mai te amoraa mata ra, e moe taue noa teie pueraa ave iti i roto i to ˈna apu toˈa.

Te faaite ra te hohoˈa 3 i te hoê rimu. E ere iho â ïa to ˈna hohoˈa mai te rimu e faaohipahia nei i roto i to outou farii hopuraa pape. Teie rimu, e animala ora oia, e ere râ i te raau tupu. E haapueraa taoˈa tahi ora apoopoo teie, e mea ê roa to ˈna huru hamaniraa. Te na ô ra te buka ra I raro i te miti (Beretane) e, aita te mau taoˈa tahi ora o te mau rimu i faanahonaho-amui-hia aore ra aita ratou i tuatiatihia te tahi e te tahi. No reira, mai te peu e e huˈahuˈa roa te hoê rimu ora, i muri iho, e riro faahou mai te tuhaa tataitahi ei rimu apî. Noa ˈtu e e faataa-ê-hia te mau taoˈa tahi, e nee ratou mai te mau toˈe iti ra, e e tahoê faahou ratou no te hamani i te mau rimu apî taatoa.

Taa ê atu i te raau tupu e na ˈna iho hoi e hamani i ta ˈna maa, e “auau” te rimu i ta ˈna maa. E momi mai oia i te pape e e titia oia i te maa i roto. Mai te tahi atu animala, e faatopa oia i ta ˈna maa e e faarue i te pehu. E ite atu outou i te mau rimu i mau i nia i te ofai aore ra i nia i te mau pupu i nia i te one i raro i te miti.

E te faaite ra te hohoˈa hopea, te 4, i te hoê pahua. E vai noa oia i te hoê vahi e e ohie roa i te itehia ˈtu i nia i te mau toˈa aore ra i raro i te miti. Te rave nei te rahiraa o te mau pahua i ta ratou maa na roto i te titiaraa i te taoˈa plancton i roto i te pape. E piti apu to te pahua. Ua tuatihia raua e te tahi uaua tuati e na te tahi uaua iˈo puai e faahamama e e tapiri ia ˈna. Ia hinaaro anaˈe te pahua e hauti, e hamama roa oia e e faura rii mai to ˈna avae iˈo i rapae. Tera râ, ia fatata mai te hoê enemi, e moe taue noa oia i roto i to ˈna apu!

Te horoa maira teie mau hohoˈa i te hoê noa hiˈoraa o te mau ohipa faahiahia e nehenehe e mataitaihia i roto i te miti na pihai iho i te mau toˈa—te tahi atu ïa vahi i reira e itehia ˈi te paari o te poieteraa a Iehova.—Roma 1:20.

[Hohoˈa i te api 18, 19]

1. Te faaohipa-noa-hia nei â te poreho ei taoˈa aufau

2. Teie mau “tiare,” e mau toˈe toˈa ïa

3. E animala te rimu, e ere i te raau tupu

4. E amu te pahua i te plancton (to ˈna vaha te itehia ra)