“A faaaraara na i to outou mata e a hiˈo na”
EAHA ta ta outou mau tamarii e ite ra? Te tamaˈi? Te ohipa ino? Te haaviiviiraa? Te veve? Te maˈi? Parau mau, o te mau ohipa ïa e tupu nei. Tera râ, ua haapii anei outou ia ratou ia hiˈo atu i muri mai i teie mau mea no te ite atu i te oraraa oaoa ta te Bibilia e tǎpǔ ra no a muri aˈe? O ta te mau metua ïa o Joel Pierson, 9 matahiti, i rave. Eaha ˈtura te faahopearaa?
A hiˈo na eaha ta Joel i papai no nia i te tumu parau ra “A faaaraara na i to outou mata e a hiˈo na.” Ua horoahia teie pereota ei tumu parau papairaa na te mau taurearea no te hoê fare haapiiraa mataeinaa a te hau no Virginia, Hau Amui no Marite. A hiˈo na e mea nafea te papairaa a Joel, tei neneihia i roto i te vea ra The Central Virginian o te 22 no Atete 1996, i te faaiteraa e ua niuhia to ˈna tiaturiraa i nia i te mea o ta ˈna i haapii mai i roto i te Parau a te Atua. Teie ta ˈna i papai:
“A faaaraara na i to outou mata e a hiˈo na i te unauna atoa e nehenehe e itehia.
“E ere anei i te mea faahiahia ia tia mai i nia i te hoê poipoi e ia faaroo e aita e haaviiviiraa faahou? Eita e faahitihia te taparahiraa taata e te ohipa ino i roto i te mau parau apî, te hau râ e te oaoa o te oraraa o te taata.
“Te rave amui ra te mau taata tapiri i te ohipa no te tauturu i te hoê hoa ia patu i to ˈna fare. I pihai atu, te ite ra tatou i te tahi mau taata e tanu ra i te hoê aua tiare. Aita noa ratou e rave amui ra i te ohipa, e manaˈo maitai anaˈe râ te turai ra ia ratou. Te tahoê nei ratou no te tauturu i te tahi e te tahi. Aita e taata veve faahou, e mea rahi te maa ia mâha te taatoaraa. E itehia te tahoêraa e te hau na te ao atoa nei. Eita te taata e pohe faahou i te poia aore ra e roo-faahou-hia i te maˈi. Mea nehenehe maitai te fenua, e a hiˈo na, te tuta ra te hoê nemera i te hoê tamaiti iti! E ere te nemera anaˈe, ua hau râ te mau animala atoa e te mau taata.
“Te hinaaro nei au e ora i roto i te hoê ao mai teie te huru. E hinaaro atoa anei outou e ora i roto i teie ao e o vau nei?”
Ua tǎpǔ mau anei te Atua i te mau haamaitairaa mai ta Joel iti e faatia ra? Oia mau! A iriti na i ta outou Bibilia e a taio i teie mau parau tǎpǔ i roto i te Salamo 46:8, 9; 67:6; 72:16; Isaia 2:3, 4; 11:6-9; 33:24; 65:17-25; Mataio 6:9, 10; Petero 2, 3:13; Apokalupo 21:3, 4.