Eaha te roohia ˈtu i te albatros?
Na te papai vea a A ara mai na! i Beretane
Eaha te roohia ˈtu i te albatros, te manu no tua rahi roa ˈˈe i te ao nei? “E mea riaria,” o ta te vea ra The Times no Lonedona ïa e faaite ra. E mau ahuru tausani albatros—te parau nei te feia maimi Auteralia e peneiaˈe e 44 000—e haapohehia nei i te mau matahiti atoa. Inaha, te manaˈo nei vetahi feia mana e fatata roa teie manu ratere, e 3 metera te aano o to ˈna nau pererau haviti mau ia hohorahia, i te mou roa.
Ia ineine anaˈe te mau albatros i te rere, e ora ratou e hitu matahiti noa ˈtu i tua, ma te maurere e te faahee e rave rahi kilometera te atea, e te taoto atoa a rere noa ˈi ratou. Te manaˈo nei vetahi e e haaati na mua teie mau manu i te fenua e rave rahi taime hou ratou e hoˈi ai e ofaa i to ratou vahi fanauraa.
Hoê noa fanauˈa ta te albatros e fanau, hoê matahiti i nia i te piti. Tera râ, i roto i na matahiti e 20 i mairi aˈenei, ua topa mai te numera o te mau albatros ratere fatata i nia i te afaraa, i te motu no Georgia Apatoa i roto i te Moana Ataranitita Apatoa e i te motu Crozet i roto i te Moana Inidia. Eaha ïa te tumu, ia au i te tahi pae? Te taiˈaraa ïa e te mau anave iˈa puto.
No te taiˈa i te aahi, e faaohipa te feia tautai i te mau anave iˈa puto, e mau hanere mǎtau to nia iho i te anave tataitahi. E taorahia te mau anave na muri i te pahi. E fee te ainu e tuuhia i nia i te mǎtau tataitahi—te maa ïa a te albatros. Ia hopu anaˈe te manu i roto i te miti no te haru i te fee, e momi atoa ïa oia i te mǎtau. E huti te teiaha o te anave i te albatros i mau i nia iho i te mǎtau, i raro i te miti a paremo atu ai te manu.
No te paruru i te mau albatros, ua faaitoitohia vetahi feia taiˈa aahi ia tuu i ta ratou mau anave i te po, ia ore anaˈe te manu e taiˈa, e ua manuïa teie ravea. Te imi atoa nei te feia taiˈa i te tahi mau ravea no te taora i ta ratou mau anave i raro aˈe i to ratou pahi ia ore te albatros ia ite mai i te ainu. Te tahi atu mau ravea i faaohipahia, oia ïa te faateiaharaa i te mau anave ia moe oioi aˈe i raro i te miti e te raveraa i te tahi taoˈa faariaria i te manu.
I roto râ i te mau miti no Ataranitita Apatoa, aita e hiˈopoahia nei te mau ravea taiˈaraa a te mau pahi tautai. Ia au i te vahine tuatapapa manu ra o Sandy Bartle, no te Fare vairaa tauihaa tahito no Niu Zelani, “aita [te mau pahi i reira] e imi nei i te ravea no te paruru i te mau albatros ia ore ratou ia pohe.” Oia mau, ua riro te atâtaraa ia mou roa te albatros nehenehe mau, ei hiˈoraa no te tâuˈa ore e te haapao ore o te taata.