I roto i te tariˈa o te hoê tamarii aruaru

I TE hoê mahana, e tamahine nainai au i tera ra tau, haere mai nei te hoê taata i to matou fare i Coeburn, i te hau no Virginia, Hau Amui no Marite, e a paraparau noa ˈi o ˈna e to ˈu metua tane, ua paraparau maira to ˈna hoa ia ˈu no te faaanaanatae ia ˈu. Ua faatia maira oia i te parau no te hoê paradaiso i nia i te fenua nei, i reira vau e hauti ai e te mau animala oviri, eita hoi ratou e haamauiui mai ia ˈu. (Isaia 11:6-9) Ua parau maira oia e, peneiaˈe eita vau e pohe, e ora râ vau e a muri noa ˈtu i nia i te fenua nei. Auê ïa oraraa faahiahia no a muri aˈe e! Aita i moehia ia ˈu i ta teie taata i parau mai ia ˈu no nia i te oraraa i nia i te fenua nei.—Isaia 25:8; Apokalupo 21:3, 4.

Te hiaairaa i te pae faaroo

Ua faataa to ˈu mau metua, o tei peapea noa na, tau matahiti i muri iho, e ua ora vau i pihai iho ia Mama. Aita roa ˈtu oia i anaanatae aˈe i te haapaoraa. No reira, e haere atu na vau o vau anaˈe i te haapiiraa Sabati i te tahi fare pure o ta ˈu e nehenehe e haere noa ˈtu na raro. Ua faaipoipo faahou atura o Mama, e ua haere atura mâua e faaea i ǒ ta ˈna tane apî ra i te hau no Indiana. I te mau tau veavea atoa râ, e hoˈi atu na vau i Virginia no te hiˈo i to ˈu papa.

Aita i maoro roa i muri aˈe i to raua faataaraa, riro mai nei o Papa ei Momoni, e ua tamata ˈtura oia i te haapii mai ia ˈu i ta ˈna haapaoraa apî. I te tau veavea o te matahiti 1960 ra, e vau ïa matahiti to ˈu i reira, ua bapetizo ihora oia ia ˈu. Teie râ, ia hoˈi atu vau i Indiana, e haere atu na vau i te fare pure, noa ˈtu eaha te faaroo, fatata noa i to matou fare. Ua haapii teie mau faaroo atoa e, mai te peu e e taata maitai tatou, e haere atu ïa tatou i nia i te raˈi, e mai te peu e e taata ino ra, e haere atu ïa tatou i roto i te po auahi i reira tatou e haamauiuihia ˈi. I te mea e aita vau i manaˈo e e taa mai te tahi taata i to ˈu hinaaro e ora i nia i te fenua nei, eiaha râ i nia i te raˈi, aita roa ˈtu vau i faaite i to ˈu mau manaˈo.

I te 11raa o to ˈu matahiti, ua haere atura o Papa e faaea i te hau no Oregon. Ua mauiui roa vau e ua riri roa atoa. Eita te tane apî a to ˈu mama e tiaturi i te Atua, e e taata inu ava atoa, e e faaooo noa mai na oia ia ˈu no to ˈu faaroo. E pii mai na oia ia ˈu o Paieti iti, e ia haamata anaˈe au i te taˈi, e parau mai na oia e: “A pure pai i to oe Atua ia tauturu mai ia oe.” Aita hoê taata i te fare i tâuˈa aˈe i te Atua. E mau matahiti fifi mau ïa no ˈu. Ua hamani-ino-hia vau i te pae tino, na roto i te parau, e i te pae taatiraa atoa. Ua tamǎrûhia vau i to ˈu paraparauraa ˈtu i te Atua, no te mea e rave rahi taime, ua manaˈo vau e o ˈna anaˈe o te tâuˈa maira ia ˈu.

Ua faarue atura o Mama i ta ˈna tane apî, e ua faaea ˈtura hoi te hamani-ino-raa. Teie râ, e mea veve roa mâua, e mea fifi roa no Mama ia imi i te ora no mâua. I te 13raa o to ˈu matahiti, ua hoˈi atura mâua i Virginia no te hiˈo i te tuahine o Mama. E vahine maitai e te aau rotahi, e e Baptiste o ˈna. Mea here roa na ˈu ia ˈna. I to ˈna aniraa mai ia ˈu e haere na muri ia ˈna i te pure, ua farii atura vau. Ua haere atoa mai o Mama, e te haamanaˈo ra vau i to ˈu oaoa rahi i te mea ua parahi mai to ˈu fetii i pihai iho ia ˈu i taua vahi ra. I te hoperaa ta mâua taime farereiraa, aita vau i hinaaro e hoˈi i to mâua fare. Ua riaria hoi au e, ia hoˈi noa ˈtu vau, e topa vau i roto i te ohipa taiata. No reira, ua taparu atura vau i te tuahine o Mama e tapea ia ˈu ia ˈna ra e ua faatia maira o Mama.

Ua hoo maira to ˈu mama fetii i te hoê Bibilia, tatararaa Arii Iakobo. Ua teoteo roa vau i ta ˈu Bibilia e ua taio vau i te tahi mau irava i te mau po atoa. Ua taio vau i te pene hopea o te Bibilia e na ô ra e, “ia taati noa mai te tahi taata i te tahi parau ê i teie nei mau parau, na te Atua e taati mai ia ˈna i te mau pohe i papaihia i roto i teie nei buka.” (Apokalupo 22:18, 19) Ua feruri atura vau e, ‘Nafea vau ia tiaturi e no roto atoa te Buka a Moromona i te mau Papai moˈa?’ Ua faaoti atura vau e riro mai ei Baptiste.

Noa ˈtu e ua papu ia ˈu e ua mauiui roa o Papa i to ˈu papairaa ˈtu ia ˈna no te faaite atu i ta ˈu faaotiraa, aita ˈtu parau ta ˈna i faatae mai maoti râ, ua oaoa roa o ˈna e te haere ra vau i te pure. Ua haere pinepine na vau na muri iho i ta matou orometua Baptiste na te fare o te taata no te titau manihini ia ratou e haere mai i ta matou mau putuputuraa faanahohia i raro aˈe i te fare ie. Ua manaˈo hoi au e te rave ra vau i te hinaaro o te Atua na roto i te haereraa e hiˈo i te taata i ǒ ratou e te paraparauraa ia ratou mai ta Iesu i rave na.

Teie râ, ua fa noa mai taua hiaai ra e ora i roto i te paradaiso i nia i te fenua nei, eiaha râ i nia i te raˈi. Tera râ, ua taio atura vau i teie irava Bibilia, e ua noaa maira te tiaturiraa: “E ani, e horoahia mai ta outou, e imi, e itea ïa ia outou; e patoto atu, e iritihia mai te opani ia outou. O tei ani ra hoi, ua noaa ïa; e o tei imi ra, ua itea ïa; e te feia atoa i patoto ra, ua iritihia ïa te opani.”—Mataio 7:7, 8.

To ˈu faaipoiporaa e to ˈu utuafare

I te matahiti i muri iho, ua hoˈi atura vau e faaea e o Mama i Indiana. Ahuru ma pae matahiti noa to ˈu i to ˈu faaipoiporaa, hapû mai nei au e tere atura vau na nia i te pereoo uta taata i Kalifonia apatoa. Aita vau i matau maitai i te fetii o ta ˈu tane, tera râ, ua hinaaro vau e ia farii maitai mai ratou ia ˈu. E haapaoraa Penetekose ta ratou, e ua paraparau mai te tuahine o ta ˈu tane ia ˈu no nia i te ô o te paraparauraa i te mau reo ěê. No reira, i to ˈu haereraa ˈtu na muri iho ia ratou i ta ratou pureraa i te hoê po, ua pure atura vau e ia faatiahia vau ia paraparau na roto i te mau reo ěê.

Ma te tupu taue noa mai, i te taime oroa pureraa, ua huru-ê-roa-hia ˈtura vau. Ua haamata ˈtura vau i te ruru noa, e ua haamata ˈtura to ˈu arero i te faahiti i te parau taa-ore-hia, e eita hoi ta ˈu e nehenehe e tapea. Ua tuô aˈera te orometua e ua tau mai te varua i nia iho ia ˈu, e ua haamata ˈtura oia i te tairiiri i to ˈu tua. I muri iho, ua tauahi pauroa mai te taata ia ˈu, e ua parau mai ratou e e mea oaoa roa i te mea e ua faaohipa mai te Atua ia ˈu na roto i teie nei ravea. Ua feaa roa râ to ˈu manaˈo e ua riaria roa atoa vau. Aita hoi au i ite e eaha ta ˈu i parau.

I muri noa iho, ua fifihia vau i te taime a fanau ai au i ta mâua tamarii matamua. Ua parau ihora te orometua o te ekalesia i ta ˈu tane e, na te Atua e faarahi ra i to ˈu mauiui fanau no te mea e ere o ˈna i te Kerisetiano. Ua haere maira ta ˈu tane ma te taˈi e ua parau maira e, mai te peu e te manaˈo ra vau e e tamǎrû te reira i to ˈu mauiui, e haere ïa o ˈna e bapetizo ia ˈna. Ua pahono atura vau e ua papu ia ˈu e eita te Atua e taviri i te taata no te faahepo ia ratou e tavini ia ˈna.

To ˈu faarueraa i te ekalesia

I te hoê Sabati, i muri aˈe i ta ˈna oreroraa parau, ua ani maira te orometua i te amuiraa e pûpû i te ô. E tia hoi ia tâtaˈihia te fare pure no te mea ua ino roa i te hoê aueueraa fenua i tupu iho nei. I te faahaereraahia te mereti moni, ua tuu pauroa ˈtura vau i ta ˈu moni. Ua taio aˈera te orometua i te moni, tera râ, aita oia i haamauruuru mai i te amuiraa maoti râ ua faaue oia e ia iriti te taata i to ratou pute e i to ratou mafatu no teie ohipa faufaa roa. I muri iho, ua faahaere faahou aˈera oia i te mereti moni. Ua pau hoi ta ˈu moni, no reira, ma te haama, ua horoa oioi noa ˈtura vau i te mereti i te taata i muri iho. Ua taio vitiviti faahou atura te orometua i te moni e, ma te ore â e haamauruuru mai ia ratou, ua parau noa maira oia e aita i ravai. “Papu maitai, eita te hoê taata e faarue mai i teie nei vahi mai te peu e eita te moni e hinaarohia ra no te ohipa a te Atua e pue mai,” o ta ˈna ïa i parau.

Te tiai noa maira ta ˈu tane i rapaeau, e ua ite au e te fiu ra o ˈna. E ere o ˈna anaˈe. Ua fiu roa atoa vau i te mauruuru ore o te orometua. No reira, e ta ˈu pêpe i roto i te rima e ma te taˈi, ua haere atura vau i rapae i te fare pure i mua i te mau taata atoa. Ua euhe atura vau e eita roa ˈtu vau e hoˈi faahou i te fare pure. Noa ˈtu e ua faaea vau i te haere i te pure, aita râ vau i faaea i te tiaturi i te Atua. Ua taio noa vau i ta ˈu Bibilia e ua tamata noa atoa i te riro ei vahine faaipoipo maitai.

To ˈu haapiiraa i te parau mau a te Bibilia

I muri aˈe i to ˈu fanauraa i te piti o ta mâua tamarii, ua ani atura te tahi mau hoa to mâua e haere ra e faaea i te hau no Texas, i te fatu o to raua fare tarahu, e tarahu mai i te fare ia mâua. Hou to ˈu hoa ra o Pat e reva ˈi, ua parau maira o ˈna e e moni ta te hoê vahine i tarahu mai ia ˈna e e haere mai o ˈna e aufau i ta ˈna tarahu. Ua ani maira o Pat ia hapono atu vau i teie moni ia ˈna ra i Texas. Tau mahana i muri iho, patoto mai nei e piti nau vahine i to mâua opani. Manaˈo atura vau e te haere maira raua e aufau i taua tarahu ra, no reira ua parau atura vau ia raua ia tomo mai. Ua faataa ˈtura vau e aita o Pat e faaea faahou ra i ǒ nei, tera râ, ua faaara mai o ˈna e e haere mai raua. “Mea maitai roa ïa,” o ta Charlene Perrin ïa, hoê o na vahine, i parau mai. “Ua oaoa roa mâua i te haapiiraa e o Pat.”

“Eaha?” o ta ˈu ïa i ani atu. “Haapiiraa? Te hape ra paha orua.” Ua faataa maira o Charlene e ua haamata raua i te haapii i te Bibilia e o Pat. I to ˈna iteraa e ua haere o Pat, ua ani maira o Charlene e e hinaaro anei au e haapii i te Bibilia. “Aita e fifi,” o ta ˈu ïa i pahono atu ma te manaˈo tiaturi maitai. “E haapii atu vau ia orua i te mau mea atoa o ta orua e hinaaro.” Ua teoteo roa hoi au i te taioraa Bibilia o ta ˈu i rave noa na, e ua manaˈo vau e e nehenehe ta ˈu e faaitoito atu ia raua.

Ua faaite maira o Charlene i te buka ra Te parau mau e aratai i te ora mure ore ra, e ua taio atura matou i te Salamo 37:9 e na ô ra e: “E riro hoi te feia hamani ino ra i te tâpû-ê-hia, o te feia râ i tiaturi ia Iehova ra, no ratou ïa te fenua.” Ua hitimahuta roa vau. I roto i ta ˈu iho Bibilia, te na ôhia ra e e parahi te taata i te fenua nei. I muri iho, ua hiti noa mai te mau uiraa e rave rahi i te hoê â taime. Ua ataata ˈtura o Charlene e ua parau maira e: “E, a haere mǎrû! E pahono tatou i te hoê uiraa i muri aˈe i te tahi.” Ua faataa maira oia e mea faufaa roa ia rave i te hoê haapiiraa Bibilia tamau e te tuutuu ore. I reira iho, ua titau manihini maira oia ia ˈu i te Piha no te Basileia, te iˈoa ïa o te vahi putuputuraa a te mau Ite no Iehova.

Ua faatia ˈtura vau ia Charlene i te ohipa i tupu e te mereti moni e aita hoi au e hinaaro faahou ra e hoˈi i te fare pure. Ua faaite maira oia i te Mataio 10:8 e na ô ra e: “I horoa-noa-hia mai ta outou, e horoa noa hoi outou.” Ua faataa maira o ˈna e eita e faahaerehia te mereti moni i te mau putuputuraa a te mau Ite no Iehova e e mea horoa noa te mau ô atoa. Ua parau atoa mai o ˈna e te vai ra te hoê afata ô i roto i te piha e, te taata e hinaaro, e tuu noa ˈtu oia i te ô i roto. Ua faaoti atura vau e tamata â.

I to ˈu haapiiraa i te Bibilia, ua papu atura ia ˈu e no te aha vau i au ore roa ˈi i to ˈu paraparauraa i te mau reo ěê i te pureraa Penetekose. Ua horoa te Atua i te ô o te paraparauraa i te mau reo ěê i te mau Kerisetiano matamua, no te haapapu e tei ia ratou ra to ˈna varua moˈa. Ua tauturu atoa teie ô semeio ia nehenehe te mau parau mau Bibilia ia tufahia na te mau taata no te mau fenua ěê o tei haaputuputu mai i te Penetekose o te matahiti 33 T.T. (Ohipa 2:5-11) Teie râ, te na ô ra te Bibilia e e faaea te ô a te Atua no te paraparauraa i te mau reo ěê, o te ohipa ïa i tupu i muri aˈe i te poheraa o te mau aposetolo. (Korinetia 1, 13:8) Tera râ, no te haapoiri i te feruriraa o te taata, ua rave o Satani e ta ˈna mau demoni e ia paraparau vetahi ma te taa-ore-hia, ia riro te taata e rave rahi i te tiaturi e ua fanaˈo teie mau taata i te varua moˈa o te Atua.—Korinetia 2, 4:4.

Te patoiraa a to ˈu fetii

Aita i maoro, ua taa ˈtura ia ˈu i te opuaraa a te Atua no te fenua nei e eita e tia ia ˈu ia amui atu i roto i teie nei ao ino. (Ioane 17:16; 18:36) Ua haapii atoa vau e, e tia ia ˈu ia tâpû i to ˈu mau taairaa atoa e o Babulonia Rahi, te taipe ïa e faaohipahia ra i roto i te Bibilia no te faahohoˈa i te hau emepera a te haapaoraa hape na te ao nei. (Apokalupo 18:2, 4) I to ˈu parauraa ˈtu ia Papa e te bapetizohia ra vau i teie taime ei Ite no Iehova, ua hepohepo roa oia. Ua taparu maira oia ia ˈu eiaha e riro mai ei Ite. A tahi ra vau a ite ai ia ˈna i te taˈiraa. Ua taˈi atoa ˈtura vau, no te mea aita roa ˈtu vau i hinaaro e haamauiui ia ˈna. Tera râ, ua papu maitai ia ˈu e ua itea mai ia ˈu i te parau mau e eita roa ˈtu ta ˈu e nehenehe e huri i to ˈu tua i nia ia Iehova.

Aita to ˈu mau fetii taatoa i farii e ia riro mai au ei Ite no Iehova. I te hoê taime, ua faaea roa ˈtura vau i te haere i te mau putuputuraa. Ua mǎrû maira te patoiraa a to ˈu mau fetii, aita roa ˈtu râ vau i oaoa. Ua ite au e eita roa ˈtu to ˈu hau e topa e tae roa ˈtu i te taime au e rave ai i te hinaaro o Iehova. I te hoê mahana, i te taime tamaaraa avatea, ua tapea ˈtura vau i te fare o Charlene e ua parau atura vau ia ˈna e te hinaaro mau ra vau e bapetizo. “Aita anei oe e manaˈo ra e e tia na mua ia oe ia hoˈi mai i te mau putuputuraa?” o ta ˈna ïa i ani mai. Ua parau atura vau e, i teie nei taime, ua faaoti au eiaha e vaiiho i te hoê noa ˈˈe mea ia faataa ê ia ˈu ia Iehova. Ua bapetizohia ˈtura vau i te 19 no Setepa 1973.

Ua hau atu ïa i te 23 matahiti i teie nei. Auaa râ, i te roaraa o te tau, ua faatura mai to ˈu mau fetii i ta ˈu faaotiraa, e aita hoê e faahepo maira ia ˈu ia faarue i te parau mau, e te haamauruuru nei au ia ratou no te reira. Teie râ, e tae roa mai i teie nei, o ta ˈu tamahine matahiapo anaˈe, o Kim, tei riro mai ei Ite. Ua riro ta ˈna taviniraa taiva ore ia Iehova ei faaitoitoraa rahi no ˈu a mairi ai te mau matahiti.

E farereiraa putapû mau

I te matahiti 1990, i to ˈu hoˈiraa ˈtu i Coeburn, i Virginia, no te tahi tere farereiraa, ua ani atura vau ia Mama e tapea i te Piha no te Basileia ia hiˈo vau i te hora putuputuraa i te Sabati. I to mâua tomoraa ˈtu i roto i te aua, ua parau maira o ˈna e e faaea na matou i te fare i muri noa mai i te Piha no te Basileia, i te tahi atu pae o te eˈa pereoo auahi. Mea maoro i teie nei te fare i te paapaaraa, e ua toe noa mai te haapupuraa auahi piriti. “E tamahine nainai ïa oe i taua tau ra,” o ta ˈna ïa i parau mai, “e toru aore ra e maha noa matahiti to oe.”

I taua Sabati ra, ua farii-popou-hia mai au i te Piha no te Basileia. I roto i ta mâua aparauraa e o Stafford Jordan, ua faahiti atura vau e, i to ˈu nainairaa, e faaea na vau i te fare i muri noa mai i te Piha no te Basileia. Ua hiˈo noa maira o ˈna ia ˈu. “Te haamanaˈo ra vau ia oe!” o ta ˈna ïa i tuô. “O oe tera tamahine iti rouru tafifi, mai teie te rahi [ua faaite maira o ˈna i te faito e to ˈna rima]. Te poro ra mâua i taua tuhaa fenua ra a paraparau ai mâua to ˈu hoa pororaa i to oe metua tane. Ua tamata vau i te faaanaanatae ia oe na roto i te paraparauraa ia oe no nia i te Paradaiso.”

Ua mamû noa ˈtura vau. Ua ruru noa to ˈu reo i to ˈu faatiaraa ˈtu e mea nafea to ˈu maimiraa i te parau mau a te Bibilia. “I to ˈu aruaruraa, ua ueue oe i te mau huero o te parau mau i roto i to ˈu mafatu iti!” o ta ˈu ïa i parau atu. Parau mai nei o ˈna e e fetii to ˈu i te pae o to ˈu papa ruau, o Stephen Dingus, o tei riro na ei Ite haapao maitai. Aita to ˈu mau fetii i faahiti noa ˈˈe i to ˈna parau, no te mea eita roa ˈtu ratou e au i te parau mau. “Ahiri e te ora noa ra o ˈna, e teoteo roa o ˈna ia oe!” o ta Taeae Jordan ïa i parau mai.

Ia feruri anaˈe au i te mau matahiti i haerehia mai e au i roto i te faanahonahoraa a Iehova, te mauruuru rahi nei au no te here e te hamani maitai tei faaitehia mai i nia ia ˈu. Parau mau, i te tahi mau taime, ia ite anaˈe au i te Piha no te Basileia i te mau utuafare e tavini amui ra ia Iehova, e mauiui rii au, no te mea e pinepine o vau anaˈe te haere na i te putuputuraa. Tera râ, e haamanaˈo oioi noa vau e tei pihai iho noa o Iehova ia ˈu. Ua hiˈo noa mai oia, e i te taime a ineine ai to ˈu mafatu no te farii i te parau mau i faahitihia i roto i te tariˈa o te hoê tamarii iti e rave rahi matahiti na mua ˈtu, ua faatia oia e ia oteo e ia uaa taua mau huero ra.

“Mauruuru roa, e Taeae Jordan,” o ta ˈu ïa i parau atu, “i to oe raveraa i te taime no te paraparau no nia i te Paradaiso i te hoê tamahine iti hauti roa!”—Faatiahia e Louise Lawson.

[Hohoˈa i te api 25]

E o Stafford Jordan i to mâua farerei-faahou-raa i te matahiti 1990