Te ravea e noaa faahou mai ai te Paradaiso

IA HIˈOHIA te hiaai o te taata no te Paradaiso e te mau tamataraa, te mea rahi e te mea iti, no te hamani faahou i te tahi, e nehenehe e manaˈohia e, i teie nei, ua riro mai ïa te fenua nei ei paradaiso. Aita râ hoi.

Ua haafaufaa na mua râ te taata i te nounou, o te mana pinepine nei ma te faaino i te natura e to ˈna mau mea ora huru rau. No te mea te manaˈo nei ratou e o te faufaa materia te upootia, e rave rahi taata e ore e tiaturi faahou nei e e riro mai te fenua ei paradaiso e au ia Edene ra. Teie râ, no ratou, te Paradaiso, o te oraraa ïa i nia i te raˈi ia pohe anaˈe ratou. Te auraa ra, a tahi, e vai mâha ore noa ïa to tatou hiaai no te Edene e a muri noa ˈtu e a piti, ua faarue te Atua i teie palaneta i roto i te maamaa e te nounou o te taata. Mai te reira mau anei? Eaha te oraraa no a muri aˈe? E ihea roa?

Te Paradaiso—I nia i te raˈi aore ra i nia i te fenua nei?

Fatata e 2 000 matahiti i teie nei, i to ˈna parauraa ˈtu i te hoê eiâ tatarahapa i rîhia i pihai iho ia ˈna, ua na ô o Iesu Mesia e: ‘Ei [te] paradaiso oe e o vau atoa.’ (Luka 23:43) Te auraa anei e e haere te eiâ i nia i te raˈi e o Iesu? Eita.

Aita hoi teie manaˈo i puta mai i roto i te feruriraa o te taata ohipa ino. No te aha? No te mea ua ite maitai paha oia i te mau irava o te mau Papai Hebera, i vai na i to ˈna ra tau, mai te tuhaa matamua o te Salamo 37:29, e na ô ra e: “E parahi te feia parau-tia i nia i te fenua.” O taua parau mau ra ta Iesu i haapii, ia ˈna i parau e: “E ao to tei mǎrû; e riro hoi ia ratou te fenua.” (Mataio 5:5) Ua tuea maitai teie irava e te pure i pii-noa-hia te Pure a te Fatu, e na ô ra e: “Ia haapaohia to oe hinaaro i te fenua nei, mai tei te ao atoa na.”—Mataio 6:9, 10.

Te haapii ra te Bibilia e, ua poiete te Atua i te fenua, eiaha te raˈi, ei faaearaa no te fetii taata nei. Te na ô ra ta ˈna Parau e “aitâ râ oia i hamani [i te fenua] ia vaiiho-taata-ore-noa-hia, ua hamani râ oia ia taatahia.” (Isaia 45:18) Ehia maororaa? “Na oe i haamau i te tumu o te fenua, ia ore roa ia aueue [“e a muri noa ˈtu,” MN].” (Salamo 104:5) Oia mau, “te fenua nei te vai noa nei â ïa.”—Koheleta 1:4.

Ua opua te Atua e faariro i teie fenua ei faaearaa mure ore no te rahiraa o te feia e tavini nei ia ˈna. A tapao na e mea nafea te Parau a te Atua, te Bibilia, ia faataa i te reira. Ua tohu te Salamo 37:11 e: “Area te feia mǎrû ra, e parahi ïa i te fenua, e oaoa ratou i te rahi o te hau ra.” Ehia maororaa? Te na ô ra te Salamo 37:29 e: “E parahi te feia parau-tia i nia i te fenua, e parahi tamau â ratou i reira.” I taua tau ra e tupu ai te irava e na ô ra e: “Te heheu nei oe [te Atua] i to rima, e te haamâha nei i te hiaai o te mau mea ora atoa nei,” oia hoi, te hiaai e au i te hinaaro o te Atua.—Salamo 145:16.

Eaha ïa no te feia aita e hiaai ra i te rave i te hinaaro o te Atua? Te na ô ra te Maseli 2:21, 22 e: “Na te feia piˈo ore hoi e parahi i te fenua, e te feia parau-tia te haapapuhia i reira; e tâpû-ê-hia ra te paieti ore i te fenua nei, e te feia i rave i te hara ra, e taihitumuhia ïa.”

E haamau-faahou-hia te Paradaiso

Fatata roa, e faatupuhia te mau haavaraa a te Atua i nia i teie ao ino. (Mataio 24:3-14; Timoteo 2, 3:1-5, 13) Tera râ, e paruru te Atua i te “feia rahi roa” i teie haamouraa i mua nei e tae roa ˈtu i roto i ta ˈna ao apî.—Apokalupo 7:9-17.

I reira, e aratai te Atua i te ohipa oaoa e ravehia e te mau taata e auraro ia ˈna, oia hoi te faariroraa i te fenua taatoa ei paradaiso no te huitaata nei. Te tǎpǔ nei te Bibilia e: “E rearea te medebara e te vahi pâpâmaro ra no ratou; e oaoa hoi te fenua aihere e e ruperupe hoi mai te tiare ra: . . . e pǔpû mai hoi te pape na te medebara, e te pape tahe i te fenua mǎrô ra.”—Isaia 35:1, 6.

I roto i tera Paradaiso o te haere noa ˈtu i te rahi, aita faahou e oˈe, e veve, e fare riirii, e feia aita e faaearaa, aore ra e vahi tei î i te ohipa ino. “E riro hoi e maa sitona tei te fenua.” (Salamo 72:16) “E hotu te mau raau o te ô ra i ta ratou maa, e tupu hoi to nia i te fenua ra.” (Ezekiela 34:27) “E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu.” (Isaia 65:21, 22) “E parahi râ ratou o te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou.”—Mika 4:4.

No te aha vetahi e haere ai i nia i te raˈi

E farii paha te rahiraa o te taata e te hiaai nei ratou i te hoê paradaiso i nia i te fenua nei. E hiaai natura hoi te reira inaha, aita roa ˈtu te Atua i tuu mai i roto ia ratou i te hiaai e haere i nia i te raˈi; eita hoi ta te taata e nehenehe e feruri noa ˈˈe e eaha te huru o te oraraa i nia i te raˈi. Ei hiˈoraa, ia ˈna i tauaparau e ta ˈna orometua no te Ekalesia no Beretane, ua parau o Pat, noa ˈtu e e melo ekalesia faaroo roa oia, e: “Aita roa ˈtu vau i manaˈo noa ˈˈe e haere i nia i te raˈi. Aita vau e hinaaro ra e haere, eaha hoi ta ˈu ohipa i reira?”—A faaau e te Salamo 115:16.

Parau mau, te haapii ra te Bibilia e e haere te hoê numera taata taotiahia, 144 000, i nia i te raˈi. (Apokalupo 14:1, 4) Te faataa atoa ra oia e no te aha: “Ua faariro oe ia ratou ei basileia e ei mau tahuˈa no to matou Atua, e e riro ratou i te faatere ei mau arii i nia i te fenua nei.” (Apokalupo 5:9, 10, MN) Apitihia e to ratou Arii, o Iesu Mesia, o ratou te “basileia,” te faatereraa apî i nia i te raˈi e faatere mai i te fenua, o ta te mau Kerisetiano e pure nei. Na teie faatereraa e tiaau i te taatoaraa o te ohipa faaapîraa i te fenua e i te huitaata nei.—Daniela 2:44; Petero 2, 3:13.

Teie râ, i te mea e e ere te hiaai e ora i nia i te raˈi i te hiaai natura i roto i te taata, na te hoê ohipa otahi a te varua o te Atua e “faaite” i te mau 144 000, ia taa ia ratou i teie ‘parauraa no nia maira’ taa ê mau hoi. (Roma 8:16, 17; Philipi 3:14) Ma te papu râ, eita teie huru ohipa a te varua moˈa e hinaarohia no te rahiraa o te huitaata nei, no te mea to ratou faaearaa mure ore, o te paradaiso ïa i nia i te fenua nei.

Te Paradaiso pae varua hou i to te fenua nei

Nafea te hoê taata ia fanaˈo i te ora mure ore i roto i te Paradaiso i nia i te fenua nei? Ua parau o Iesu e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Ma te faatuati i te mau taairaa hau i rotopu i te taata, e te ite i te Atua, te na ô ra te Isaia 11:9 e: “E ore ratou e hauti, e ore e rave ino, i to ˈu atoa nei mouˈa moˈa, . . . e î hoi te fenua i te ite ia Iehova, mai te vairaa miti e î i te miti ra.”—A faaau e te Isaia 48:18.

E ere teie ite i te ite feruriraa noa. E ohipa râ oia i nia i te huru hohonu o te hoê taata e e faatupu oia i te mau huru maitatai paieti, mai “te here, te oaoa, te hau, te faaoromai, te hamani maitai, te maitai, te faaroo, te mǎrû, te hitahita ore.” (Galatia 5:22, 23, MN) Te tutava nei te mau Ite no Iehova i te faatupu i teie mau huru maitatai, e no reira, i teie nei atoa, te fanaˈo nei ratou i te hoê paradaiso pae varua maitai roa.—Isaia 65:13, 14.

Auê ïa taa-ê-raa rahi i rotopu i to ratou huru pae varua e to teie nei ao, e topa noa ˈtura i roto i te paieti ore e te viivii! Fatata roa râ teie ao ino i te haamouhia e te Atua. A tiai noa ˈtu ai, te titau manihini nei te mau Ite no Iehova ia outou ia haere mai e mataitai—oia, ia hiˈopoa roa—i te paradaiso pae varua o ta ratou e fanaˈo nei. A haere roa ˈtu e hiˈo e, i teie nei iho, te aratai mǎrû noa nei o Iesu, te Arii ite-ore-hia i nia i te raˈi, i te feia e ora ˈtu i roto i teie ao apî, na nia i te eˈa pirihao e tae atu ai i te Paradaiso i nia i te fenua e i te ora mure ore!—Mataio 7:13, 14; Apokalupo 7:17; 21:3, 4.

[Hohoˈa i te api 8, 9]

E oaoa te feia e ora ˈtu i te hopea o teie nei ao i te apiti atu i roto i te ohipa faariroraa i te fenua nei ei Paradaiso