Tamahanahanaraa no te utuafare e te mau hoa

I TE paainaraa te manureva TWA 800 i te Moana Ataranitita, i te 17 no Tiurai i mairi, ua pohe na horopatete taatoa e 230. Te vai ra i rotopu ia ratou, 16 tamarii Farani haere haapiiraa tuarua e pae taata tiai paari no Montoursville, te hoê oire iti no Pennsylvania e 5 000 rahiraa taata e noho ra i reira. I te hoê oroa hunaraa i te oire, i te 17 no Atete, ua tapao te hoê o te feia orero, o Rudolph Giuliani te iˈoa, tavana no te oire no New York, e ahiri e hoê â rahiraa taata i nia i te hanere no te oire no New York tei pohe, e 35 000 taata ïa te pohe!

Ua anihia te faatere o te fare haapiiraa tuarua ra o Dan Chandler, ia paraparau i te hunaraa o e rave rahi tamarii haere haapiiraa. Ua faahiti oia i te parau tǎpǔ a te Bibilia i roto i te Apokalupo 21:4 o te na ô ra e i roto i te faanahoraa apî o te mau mea a te Atua, “e ore roa te pohe, e te oto, e te mihi, e te mauiui, e ore atoa ïa.” No te faataa e no te aha teie mau huru ati e tupu ai, ua haamatara oia i te Koheleta 9:11 (MN), o te na ô ra e e roohia tatou i “te tau e te tupuraa manaˈo-ore-hia.” E rave rahi tei maere i te faarooraa i te faatere o ta ratou fare haapiiraa tuarua ia hohora mai i teie mau huru manaˈo tamahanahana.

No te horoa i te tahi atu tauturu, ua faanaho o Chandler i te hoê airaa maa i te fare haapiiraa tuarua no te apǎpǎ i te mau papai i nia iho, mai te vea iti e 32 api ra Ia pohe tei herehia e outou na e te api parau iti ra Eaha te tiaturiraa no te feia herehia e tatou tei pohe? E mau hanere papai Bibilia i ravehia, e e rave rahi taata o tei haamauruuru no te tamahanahanaraa ta te reira i horoa.

[Faaiteraa i te fatu o te hohoˈa i te api 32]

Courtesy of Williamsport Sun-Gazette

[Faaiteraa i te fatu o te hohoˈa i te api 32]

Corey Sipkin/Sipa Press