A faaoteo i te mau huero

NA TE PAPAI VEA A A ARA MAI NA! I TE FENUA VAIHI

IA HAERE outou i te matete, e imi noa anei outou i te tahi mau maa tupu apî papaaina maitai e te au ia amu? A faaea ïa i te imi! Maa taime e maa tutavaraa iti, e nehenehe ta outou e faatupu i te mau maa tupu i to outou iho fare. Nafea? Na roto ïa i te faaoteoraa i te mau huero!

Mea ohie roa ia faaoteo i te mau huero, e nehenehe atoa hoi ta te tamarii e rave. Mea iti te vahi e titauhia, aita e ǒraa, e utaruraa, e aita atoa e pâmuraa i te raau fifi roa ia faaohipa. Te mea hau atu â râ, e nehenehe outou e amu i te maa o ta outou i faaoteo, e maha aore ra e pae noa mahana i muri aˈe i te haamataraa i te tupu! Ua hau atu râ te mau hoonaraa, i te ohieraa ia rave.

A tahi, e maa maitai roa te mau huero e faaoteohia—hau roa ˈtu paha i te mau pǐpǐ aore ra te mau huero matau-noa-hia. Te na ô ra o Gay Courter i roto i Te Buka o te pǐpǐ tupu (Beretane) e: “Ia haamata anaˈe te huero i te oteo, e haamata atoa te mau vitami i roto i te rahi. I roto i te mau oteo apî o te pǐpǐ tupu (i roto i te 100 tarama o te huero), te vai noa ra ïa 108 militarama vitami C, ia au i te hoê tuatapaparaa i ravehia i te Fare haapiiraa tuatoru no Pennsylvania, Hau Amui no Marite. Tera râ, e 72 hora i muri iho, ua maraa te rahiraa vitami C i nia i te faito e 706 militarama!”

Mea mama atoa te mau huero faaoteohia. Inaha, eita e ore e te vai ra i ǒ outou te mau tauihaa atoa e hinaarohia no te tanu i teie maa.

Faaineineraa

A tahi, e hinaarohia te tahi farii. E navai noa te hoê farii rahi hapaina aore ra uraina, te hoê pani eiaha râ e pani auri, te hoê aˈua hapaina aore ra araea, aore ra te hoê mereti poopoo. E nehenehe atoa e rave i te hoê mereti parahurahu, ma te apǎpǎ i te mau huero i ropu e piti ahu rairai aore ra tauera papie rarirari ia ore te huero ia mǎrô. Noa ˈtu eaha te farii ta outou e rave, a hiˈo e mea aano maitai anei ia nehenehe te mau huero e oteo e ia teretere haere atoa te mataˈi. I to ˈu manaˈoraa, e mea maitai roa te hoê farii hapaina no te mau huero huˈa roa mai te alfalfa. Mea maitai aˈe ia faaoteo i te mau huero rarahi aˈe, mai te pǐpǐ mungo, i roto i te hoê mereti poopoo aore ra i te hoê pani. Mea rahi maitai ïa e e ore atoa te mau oteo e pê aore ra e avaavahia.

E tia atoa ia tapoˈi i ta outou farii. E navai noa te hoê paruru uraina, te hoê ahu rairai, aore ra te hoê totini rairai tahito. A rave atoa i te hoê uaua paari aore ra te hoê taura iti no te taamu i teie tapoˈi i nia i te auvaha o te farii. E tia atoa ia horoi i te mau huero i te pape e piti aˈe taime i te mahana, no reira, e titau-atoa-hia te pape e peneiaˈe te hoê titia no te faataheraa i te pape o te farii.

I te pae hopea, e tia ia noaa mai ta outou huero. Fatata te mau huero atoa e amuhia o te nehenehe e faaoteohia. (E haapao maitai râ vau i te ore e rave i te mau huero tei pâmuhia i te raau.) Te mau huero maitatai roa ˈˈe no te haamataraa, o te mau pǐpǐ mungo ïa aore ra te mau huero alfalfa. Mea ohie roa ia faaoteo e mea au roa ia amu! I teie nei, e faaite atu vau e e nafea râ.

Ueueraa i te mau huero

MAHANA 1: A tahi, a horoi maitai i te mau huero. I muri iho, a faaî i ta outou farii i te pape, ia poˈi roa te mau huero aore ra te mau pǐpǐ, i raro aˈe e 5 tenetimetera pape. A tapuru i te mau huero e vau tae atu i te ahuru hora te maoro. E nehenehe outou e tapuru i te mau huero hou outou e haere ai e taoto. E vau e tae atu i te ahuru hora i muri iho, e oru roa te mau huero e e afa te paa. Ua ineine ïa no te oteoraa.

MAHANA 2: I te poipoi aˈe, a haavî maitai i te tapoˈi e a faarue i te pape i roto i te farii. (I te mea e e vitami atoa to roto, e rave au i teie pape no te pîpî i ta ˈu tiare.) A tito faahou te farii i te pape. A ueue rii, e a huri te niaraa i raro, ia tahe pauroa te toetoeâ pape. A faaî faahou â te farii i te pape, ma te horoi i te mau huero e te faarue i te pape, e toru taime. Mai te peu e ua tuu outou i te mau huero i tapuruhia i roto i te hoê mereti parahurahu, a manii mǎrû noa ïa i te pape i nia i te ahu rairai, e a faarue i te pape ma te faaopa i te mereti. I muri iho, a horoi faahou ia mâ maitai te mau huero e piti taime i te mahana.

MAHANA 3: I teie nei, e nehenehe outou e ite i te mau oteo. A horoi faahou â e piti taime i te mahana.

MAHANA 4: E nehenehe outou e haamata i te amu i te mau oteo! E nehenehe outou e vaiiho noa i te mau oteo o te pǐpǐ mungo ia rahi roa, e ere hoi i te mea avaava ia amu. A haapao maitai râ i te horoi i te mau oteo e piti taime i te mahana. E nehenehe atoa outou e tuu i ta outou mau oteo i nia i te mahana i te area hoê hora e i muri iho, e tuu atu ai i roto i te faatoetoeraa. E taui ïa te ǔ o te mau rauere huˈa roa e riro mai ei mea matie nehenehe roa—e hiaamuhia oe!

I te mea e ua amu roa outou i ta outou iho i faaoteo, e hinaaro paha outou i muri iho, e tamata i te tahi atu mau huru pǐpǐ e mau huero. Mea taa ê te tahi e tahi ia amu anaˈe e to ratou atoa taime oteoraa. Ei hiˈoraa, e nehenehe outou e tamata i te faaoteo i te mau huero i hohorehia o te tiare tournesol. Mea au aˈe ia amu i teie mau oteo, e piti mahana i muri iho, hoê noa afa initi te roa. Ia tupu roa ˈtu â teie mau oteo, e mea avaava ïa ia amu.

E tuuhia te mau oteo i roto i teihea maa

E nehenehe te rahiraa o te mau oteo e amu-ota-hia ma te anoi atu i roto i te mau salade, te mau faraoa inai, aore ra te tahi atu maa te vai ra te pǐpǐ e te huero i roto. E nehenehe râ te mau pǐpǐ tupu e tunu-hou-hia 10 tae atu i te 15 minuti hou a amu ai. Aore ra e nehenehe e farai pani e te tahi maa hinu iti, maa oniani piropiro, e te miti papaa. Hope te au! E mea monamona roa te mau oteo sitona e te seigle, e mea au roa ia anoi atu i roto i te faraoa e te mau faraoa monamona iti.

E mea maitai roa te mau oteo no te tino, e mea mama atoa. E au roa e e mauruuru atoa paha outou i teie ohipa. Inaha, e manuïa iho â e e mea au atoa ia amu!

[Faaiteraa i te fatu o te hohoˈa i te api 25]

Japanese Stencil Designs

[Hohoˈa i te api 26]

MAHANA 1: A haaputu i te mau huero e a tapuru i roto i te pape e 8 tae atu i te 10 hora

[Hohoˈa i te api 26, 27]

MAHANA 2 E TE 3: A horoi maitai i te mau huero i te pape e piti taime i te mahana

[Hohoˈa i te api 27]

MAHANA 4: E nehenehe e amu i te mau oteo! (I ǒ nei, ua patahia na te hiti, i nia i te ahu rairai)