Faaamuraa i te tamarii—No outou anei?

NA TE PAPAI VEA A A ARA MAI NA! I BERETANE

“TE FAAAMURAA, e faanahoraa teie no te maitai o te tamarii, e ere râ no te tuu noa ˈtu i te hoê pepe i roto i te rima o te feia tamarii ore,” o ta te hoê rave ohipa turuutaa beretane ïa i haapapu. Noa ˈtu râ, e parau anei ta te tamarii ia horoa-faaamu-anaˈe-hia oia?

Te manaˈonaˈo ra anei oe e faaamu i te hoê tamarii? Mai te peu e e, tei mua ïa oe i te hoê maitiraa eiaha noa i te pae no te mau manaˈo hohonu, o ta oe atoa râ e ore e nehenehe e otohe faahou. E manuïa anei teie tamarii i te faaau maitai ia ˈna i roto i to oe utuafare?

Mai te peu e tamarii faaamuhia oe, ua ite anei oe e, o vai to oe mau metua fanau? Mai te peu e aita, eaha ïa to oe huru ahiri e ua ite oe ia raua?

E metua vahine anei oe e opua ra e horoa e faaamu i ta oe pepe? Te horoaraa e faaamu, te reira mau anei te ravea maitai aˈe no ta oe tamarii?

I te matahiti 1995, hau atu i te 50 000 tamarii o tei faaamuhia i te mau Hau Amui no Marite, e fatata e 8 000 o tei fanauhia i te fenua ê. Te rahi noa ˈtura te mau metua e faaamu nei i te mau tamarii no te mau fenua ěê mai. Ia au i te vea ra Time, i roto i na matahiti e 25 i mairi aˈenei, ua faaamu te mau utuafare marite hau atu i te 140 000 tamarii i fanauhia i te fenua ê. Hoê â huru numera tei noaa mai na Europa ma, e 32 000 i Tuete, e 18 000 i Holane, e 15 000 i Helemani, e e 11 000 i Danemata.

Tei roto anei outou i te hoê o teie mau huru tupuraa? Ia faaamu outou i te tamarii, e taui roa ïa to outou iho oraraa—eiaha noa to teie tamarii. Ua tano te mau metua faaamu i te tiaturi e, e rave rahi oaoaraa te noaa mai, e tia atoa râ ia ineine ratou i te faaruru i te mau fifi e te mau feaaraa e rave rahi. Oia atoa, eita paha te mauiui o te hoê mama e horoa e faaamu i ta ˈna aiû, e ore roa.

I roto i te tupuraa tataitahi, te vai ra te hopoia e faatia aore ra e patu faahou i te hoê oraraa apî ma te here. E faataa mai te mau tumu parau i muri nei i vetahi o te mau oaoaraa—e te mau hopoia atoa—o te faaamuraa i te tamarii.