Teihea roa te mau melo ekalesia?
NA TE TAATA PAPAI VEA A A ARA MAI NA! I PANIORA
“Aita ˈtu e mea ino aˈe no te haapaoraa maoti râ te tâuˈa-ore-raa.”
EDMUND BURKE, TIA HAU BERETANE NO TE SENEKELE 18.
I TE fenua papu, puhihia e te mataˈi i te pae apatoerau no Paniora, te vai ra te oire iti no Caleruega. I nia mai i teie oire no te Anotau no Ropu mai, te tia ra te hoê fare paretenia rahi tei patuhia ia au i te hohoˈa fare o te tau Roman. Ua faatiahia oia a 700 matahiti i teie nei no te faahanahana ia Domingo de Guzmán, te taata i haamau i te pǔpǔ faaroo dominicain, o tei fanauhia i reira. E hitu senekele te maoro, ua noho na te mau paretenia o tei maiti i te ora ma te maniania ore e ma te faaatea ê ia ratou i roto i teie fare paretenia.
Ua apoopoo te tapoˈi o te fare paretenia, e te haamata ra te mau patu tahito i te mairi i raro. Tera râ, te tapitapi nei te metua paretenia no nia i te hoê toparaa ino roa ˈtu â—te toparaa o te haapaoraa iho. “I to ˈu haereraa mai i roto i teie fare paretenia fatata e 30 matahiti i teie nei, e 40 paretenia i ǒ nei,” o ta ˈna ïa e faataa ra. “I teie nei e 16 anaˈe matou. Aita e paretenia apî. E au ra e ua riro te toroa faaroo ei ohipa tahito.”
Te mea e tupu ra i Caleruega, o te ohipa ïa e tupu ra ati aˈe ia Europa. Aita i itehia te tahi manaˈo patoi uˈana i te haapaoraa, te tahi noa râ topa-mǎrû-noa-raa o te haere tamau noa. Ua riro noa te mau fare pure tuiroo no Europa ei mataitairaa na te mau ratere eiaha râ no te huti mai i te “mau melo ekalesia.” Aita te ekalesia fati ore i te matamua ra—porotetani anei aore ra katolika—i tâuˈa-faahou-hia. Ua rahi aˈe te mau taata i te tapitapi no te mau mea i te pae tino eiaha râ i te pae varua i roto i to ratou oraraa—te hoê huru o ta te mau auvaha o te ekalesia e pii ra te ereraa i te auraa faaroo. E au ra e e ere te haapaoraa i te mea faufaa faahou. Ua riro anei teie huru tupuraa faaroo i Europa ei tapao no te toparaa e roohia ˈtu i nia i te tahi atu mau fenua o te ao nei?
Eaha te roohia ra i te feia haere pure?
E ere te reira i te hoê tupuraa apî i te pae apatoerau no Europa. E 5 i nia i te hanere anaˈe feia faaroo lutero no Scandinavie o te haere tamau ra i te pure. I Beretane, te tahi noa 3 i nia i te hanere feia faaroo beretane o te haere ra i te pureraa i te sabati. I teie nei râ, e au ra e te pee nei te mau katolika europa no te pae apatoa i to ratou mau hoa faaroo no te pae apatoerau.
I Farani, te hoê fenua e katolika te rahiraa, 1 anaˈe taata i nia i te 10 o te haere ra i te pure hoê taime i te hebedoma. I na 25 matahiti i mairi aˈenei, ua topa te faito o te mau paniora e parau ra e e “katolika faaohipa” ratou mai te 83 i nia i te hanere i nia i te 31 i nia i te hanere. I te matahiti 1992, ua parau atu te arii epikopo paniora ra o Ramon Torrella i te mau papai vea e, “e ere o Paniora i te hoê fenua katolika; te apiti nei te taata i roto i te mau haereraa moˈa i te Hebedoma Moˈa e te oroa pureraa i te Noela—eiaha râ [i te pureraa] i te mau hebedoma atoa.” I roto i te hoê tere no ˈna i Madrid i te matahiti 1993 ra, ua faaara te pâpa Ioane Paulo II e “e tia ia Paniora ia hoˈi faahou i to ˈna mau tumu kerisetiano.”
Ua ohipa te manaˈo tâuˈa ore i te faaroo i nia i te mau upoo faatere haapaoraa e te feia haere pure atoa. Ua topa te numera o te mau perepitero nomino-apî-hia i Farani i nia i te 140 i te matahiti 1988 ra (aita i naeahia te afaraa o te numera o te matahiti 1970 ra), area i Paniora ra, tau 8 000 perepitero tei faarue i to ratou toroa no te faaipoipo. I te tahi aˈe pae, vetahi mau perepitero o te tamau noa nei i te tavini i ta ratou mau nǎnǎ, te feaa nei ïa ratou i te poroi ta ratou e horoa ra. E 24 i nia i te hanere anaˈe o te mau ekalesiatiko lutero no Tuete o te manaˈo ra e e nehenehe ta ratou e orero no nia i te raˈi e te po auahi “ma te tiaturi i ta ratou iho parau,” area e 25 i nia i te hanere o te mau perepitero farani ra, aita ïa to ratou manaˈo e papu maitai ra no nia i te tia-faahou-raa o Iesu.
Navenave e te hinaaro hau aˈe i te paieti
Na te aha e mono ra i te haapaoraa? I roto e rave rahi utuafare, ua mono mai te faaanaanataeraa manaˈo i te haamoriraa. I te sabati, e haere te mau utuafare i te pae miti aore ra i nia i te mouˈa, eiaha râ i te pureraa. “E mea fiu ia haere i te pureraa,” o ta Juan ïa, te hoê taurearea paniora, i parau ma te anaanatae ore. Eita te mau oroa pureraa e nehenehe e tataˈu atu i te mau tueraa popo aore ra te mau hautiraa upaupa rahi, e mau ohipa o te arato ra e rave rahi taata e o te faaî ra i te mau tahua.
Te itiraa mai te feia haere pure, e ere ïa te reira anaˈe te tapao no te toparaa o te haapaoraa. Mea au aˈe na te mau taata e rave rahi no Europa, e maiti i te mau manaˈo faaroo e tano ia ratou, e faarue atu ai i ta ratou i ore i au. I teie mahana, aita te mau haapiiraa tumu a te ekalesia e tuea faahou ra e te mau tiaturiraa a te feia e parau nei e tei roto ratou i taua haapaoraa ra. Aita te pae rahi o te huiraatira no Europa—katolika anei aore ra porotetani anei—e tiaturi faahou ra i te ora i muri aˈe i te pohe, e hau atu i te 50 i nia i te hanere o te mau katolika no Farani, Italia, e Paniora, aita ratou e tiaturi ra i te mau semeio.
E au ra e aita to te mau tia faaroo e mana no te arai i teie maraaraa o te faaau-ore-raa i te faaroo. Aita ˈtu tuhaa i itehia ˈi te reira maoti râ i roto i te ohipa patoiraa a te pâpa i te faataimeraa i te fanau. I te matahiti 1990, ua faaitoito te pâpa ra o Ioane Paulo II i te mau katolika hoo raau, eiaha e hoo i te mau ravea arairaa i te fanau. Ua parau oia e “te ofati ra” teie mau raau “i te mau ture a te natura ma te faaino i te tiaraa tura o te taata.” Oia atoa, te onoono ra te buka ra Catéchisme de l’Église catholique e “tei raro aˈe te here i rotopu i te tane e te vahine faaipoipohia i na titauraa e piti o te taiva-ore-raa e te fanauraa i te tamarii.”
Noa ˈtu teie mau aˈoraa etaeta, te haapao nei te mau hoa faaipoipo katolika faito au noa, i to ratou iho hinaaro. Mea varavara roa i teie nei, te mau utuafare tei hau atu i te piti tamarii, maoti râ i roto i te mau fenua katolika no Europa apatoa. I Paniora, te haapuroro-tamau-hia nei te poroi no nia i te mau puohu apeni na roto i te afata teata—taoˈa hoo-huna-hia na e piti ahuru matahiti i teie nei—e e 3 anaˈe i nia i te hanere o te mau vahine farani katolika e na ô ra e te farii nei ratou i te ture katolika haamanahia no nia i te faataimeraa i te fanau.
Ma te papu maitai, te huri ra to Europa i to ratou tua i nia i te mau ekalesia e ta ratou mau haapiiraa. Teie te tatararaa papu a te arii epikopo ra no Cantorbéry, no roto i te ekalesia beretane, o George Carey, no nia i te huru tupuraa i roto i ta ˈna ekalesia: “Te pau nei to matou mau taata, e te morohi atura ta matou ekalesia,” o ta ˈna ïa i parau, “e tupuraa ru teie o te tia ia matou ia faatitiaifaro oioi noa.”
Mai te mau tauiraa rahi o te Reforomatio mai â, aita te pare o te haapaoraa i aueue aˈenei mai tei itehia ra i teie mahana. No te aha e rave rahi to Europa e ore ai e tâuˈa faahou i te haapaoraa? Eaha te huru o te haapaoraa i te tau no a muri aˈe?