A paruru ia outou i te anapa uira!

NA TE TAATA PAPAI A A ARA MAI NA! I TUETE

TAU ahuru mirioni volts e tau ahuru tausani ampères te faito o te uira i roto i te hoê anapa uira faito au noa. Ei faaauraa, mea pinepine e 15 ampères te faito uira matauhia i roto i te hoê fare.a Eaha ta outou e nehenehe e rave no te faaiti i te atâtaraa ia haruhia outou i te anapa uira? A tapao na i te mau faahitiraa i muri nei.

• I te mau taime atoa e nehenehe, a tomo atu i roto i te tahi vahi. E paruru maitai atoa te pereoo. Eaha ïa mai te peu e tei roto outou i te hoê fare tahua? E paruru te hoê fare tahua e te vai ra te mau auri aratai i te anapa uira. Ei hiˈoraa, te vai noa ra te Empire State Building i patuhia i te oire no New York o tei tairihia e te patiri tau 25 taime i te matahiti tataitahi. Tera râ, mea maitai aˈe ia ape i te mau fare e aita te uira i faahaerehia i roto i te fenua ma te mau tafare auri e te mau vahi i pihai iho i te eha (antenne) e te mau aua auri.

• Eiaha e faaea i te mau vahi ateatea, mai te mau roto, te mau aua, e te mau vahi huiraa popo (golf). Mea atâta atoa te mau tumu raau moemoe e te teitei. Mai te peu e tei te hoê vahi outou e mea rahi te tumu raau, a pupuni atu i raro aˈe i te mau tumu raau haehaa aˈe. Mai te peu e te piri roa maira te vero ma te atâta mau e eita outou e nehenehe e faarue atu i te vahi mahora, a parahi i raro e a tapiri i to outou nau turi avae. Eiaha e tarava roa i raro, mea faufaa hoi ia vaiiho outou i te hoê vahi tairiraa iti roa ˈˈe.

• Noa ˈtu e tei roto outou i te tahi vahi, e nehenehe outou e rave i te tahi mau ravea paruru. Teie te tahi mau ravea: A ape i te tapea i te mau tari uira, mai te mau haapupuraa auahi e te mau auri pape. E huru paari ia ore e faaea i raro aˈe i te faahîraa pape aore ra i roto i te farii hopuraa pape, e eiaha atoa e tamata i te faaohipa i te niuniu paraparau. A tâpû i te uira o te mau matini roro uira, te afata teata, e vetahi atu mau matini uira, i te mea e e nehenehe te reira e ino ia haruhia te fare i te uira.

• Ia haruhia te hoê taata i te anapa uira, mea faufaa ia faahaere oioi faahou i to ˈna pâmuraa aho e to te mafatu. Te parau ra o Victor Scuka, e ohipa ra i te Pu maimiraa faito uira puai i te Fare haapiiraa tuatoru no Uppsala, i Tuete, e i roto i te rahiraa o te mau tupuraa, ua faaorahia mai te feia i haruhia na roto i te faahaere-faahou-raa i te pâmuraa aho e to te mafatu, noa ˈtu e ua manaˈohia e ua pohe ratou. “E tia râ ia faahaere-oioi-hia te pâmuraa ia ore te roro ia pepe,” o ta ˈna ïa e faaara ra.

Ia haru-noa-hia ˈtu outou e te anapa uira o te hoê vero, a haapao i te mau ravea paruru i faahitihia iho nei. E nehenehe hoi outou e roohia i teie tupuraa riaria mau.

[Nota i raro i te api]