Te uiui nei te mau taurearea . . .

Eaha te tia ia ˈu ia rave ia fifihia te hoê hoa?

Teie ta Sherrie e ahuru ma maha matahiti to ˈna e parau ra: “Ua atea ê to ˈu hoa rahi i te eˈa kerisetiano. Te peapea nei au. Ua tamata vau ma te fifi i te faaitoito ia ˈna!”a

TE VAI ra anei te tahi taata piri roa ia outou o te fifihia ra aore ra o te haamata ra i te farii i te hoê huru oraraa huru ê? “E mea piri roa vau ia Chris,” o ta Johnny ïa e parau ra. “E hoa rahi roa mâua. I te hoê mahana ua faarue mai o ˈna i te fare. Ua mauiui roa vau, e ua manaˈo vau e e tia ia ˈu ia haere e imi ia ˈna. Ua tere au na nia i te pereoo i te hoê po taatoa i te imiraa ia ˈna.”

Ua faaara te Bibilia e i te mau mahana hopea, e tupu te mau faateimaharaa rahi i nia i te mau taata, te taata apî e te ruhiruhia. (Timoteo 2, 3:1-5) No reira eita ïa tatou e huru ê ia hape noa ˈtu te hoê taurearea kerisetiano i te tahi mau taime. Ia tupu râ te reira i nia i te hoê taata o ta outou e tapitapi ra, e ite outou i te mau huru manaˈo horuhoru, mai te peapea e te aroha e te riri. Te hinaaro nei outou e tauturu i to outou hoa. Nafea râ outou e nehenehe ai e na reira?

‘E nehenehe au e faahoˈi mai ia ˈna’

Te parau ra te Bibilia e: “O te faahoˈi mai i te taata hara i taua eˈa hapa na ˈna ra, e varua te ora ia ˈna i te pohe, e hara rahi te moe ia ˈna ra.” (Iakobo 5:20) Teie râ anei te auraa e na outou teie hopoia? Eita. Na te mau metua o to outou hoa te hopoia matamua e rave i te reira no ˈna.b (Ephesia 6:4) Te parau faahou ra te Bibilia i roto i te Galatia 6:1 e: “E au mau taeae, ia roohia-noa-hia te hoê taata i te hapa ra, e faaora outou o tei haapao i ta te [v]arua ra i te reira, ma te aau mǎrû.” Ua faaineine-taa-ê-hia te mau tiaau o te amuiraa no teie tuhaa. No reira tei nia ratou i te hoê tiaraa maitai aˈe ia outou no te tauturu.

E tia ia outou ia farii, ei taurearea, e ere outou i te mea aravihi i roto i te oraraa. (A faaau e te Hebera 5:14.) No reira a farii ma te feruriraa tia i to outou mau otia i roto i teie tuhaa e eiaha e rave i te mau ohipa tei hau atu i te maraa ia outou. (Maseli 11:2) E hiˈo anaˈe na i te hiˈoraa o te tamahine ra o Rebekah. Ua tamata o ˈna i te tauturu i te hoê hoa tamaroa, te hoê fetii, o tei faaohipa i te raau taero. Te faatia ra o ˈna: “Te ohipa tei faateimaha ia ˈu o to ˈna ïa faaiteraa mai i to ˈna fifi ia ˈu e aita râ i to ˈna nau metua. Ua tamata vau i te tauturu ia ˈna, e mea fifi roa râ. Ua tauturu mai to ˈu taaraa i te pae hopea e aita ta ˈu e ravea . . . Eita vau e nehenehe e faahoˈi mai ia ˈna.” Ua faaue atura o Rebekah ia ˈna ia ani i te tauturu i te feia paari aravihi.

Ua farerei atoa te taurearea Matthew i teie huru tupuraa, ua farii râ o ˈna i to ˈna mau otia i te omuaraa iho â. Teie ta ˈna e parau ra no nia i te hoê hoa tei fifihia: “Ua haere mai o ˈna e farerei ia ˈu no to ˈna mau fifi, ua parau râ vau ia ˈna ia haere e farerei i to ˈna nau metua. Mea ite aˈe raua no te haapao i to ˈna mau fifi.”

Nafea outou e nehenehe ai e tauturu

E ere ïa te auraa e aita hoê aˈe mea ta outou e nehenehe e rave no te tauturu. Tei te mau huru tupuraa noa. Peneiaˈe te hinaaro nei to outou hoa e faaite i to ˈna fifi ia outou. Mai te reira iho â, e hinaaro outou e turu ia ˈna e e horoa ˈtu i te tariˈa faaroo. (Maseli 18:24; 21:13) Aore ra ua haamata paha o ˈna i te hoê huru oraraa huru ê. E mea tano ia rave i te hoê ohipa e ia parau ia ˈna e noa ˈtu e te tapitapi nei outou no ˈna, aita râ outou e farii ra i ta ˈna ohipa e rave ra.

I roto i te tahi atu tupuraa, ua rave paha te hoê hoa i te hapa ino mau. Ua tamata atoa paha o ˈna i te haamamû ia outou. Te na ô nei râ te Bibilia e: “Eiaha . . . e apiti atoa ˈtu i ta vetahi ê ra hara: ia vai maitai â oe.” (Timoteo 1, 5:22) Mai te peu e e maˈi ino roa to to outou hoa e e tia ia rapaauhia, eita anei outou e onoono i te parau atu ia ˈna e haere e hiˈo i te hoê taote? Oia atoa, mai te peu e ua rave o ˈna i te mau hapa ino mau, e tia ia tauturuhia ia ˈna i te pae varua. E nehenehe te huna-noa-raa i te mau ohipa e haapohe ia ˈna i te pae varua—e e faaino te reira i te amuiraa. E tia râ ia outou ia ite i te reira ia faaarahia te mau matahiapo o te amuiraa.—A faaau e te Levitiko 5:1.

Ua rave te tamahine ra o Caroline i te hoê tiaraa itoito i mua i te hoê hoa tei paruparu o tei haavare i to ˈna nau metua. Te parau nei o ˈna e: “Ua vaiiho vau e piti hebedoma ia haere o ˈna e farerei i te mau matahiapo. Ia ore anaˈe, ua parau vau ia ˈna e na ˈu ïa e haere e farerei ia ratou. E ere i te mea ohie no ˈu.” Ua faaite atoa o Johnny, tei faahitihia i te omuaraa, i teie huru puai. No nia i to ˈna hoa, te faahaamanaˈo ra o ˈna e: “Ua maere au i to ˈu iteraa e ua faaea o ˈna e te hoê potii. Te vai ra i reira te tahi atu mau taata o te inu ra e o te puhipuhi ra i te avaava.” Ua ani o Johnny i to ˈna hoa ia haere mai i rapae e ua faaue o ˈna ma te etaeta ia haere o ˈna e ani i te tauturu i te mau matahiapo o te amuiraa.

E haafaufaa paha to outou hoa aore ra eita i ta outou mau tutavaraa. Te parau maira te Bibilia ia tatou e i te haparaa to ˈna mau tuaana, “ua hopoi hoi [te taurearea ra o Iosepha] i ta ratou parau ino i tana metua ra.” Aita roa ˈtu te reira i faarahi i to ˈna roo maitai i pihai iho i to ˈna mau tuaana. Oia mau, “ua feii mai ra ratou ia ˈna.”—Genese 37:2-4.

Ohipa mai tei matau-noa-hia?

E mâuˈa noa ta outou mau tutavaraa no te tauturu, mai te peu e e tamau noa outou i te amuimui e to outou hoa mai te huru ra iho â ïa e aita e fifi. I roto i te Korinetia 1, 15:33, ua faaara te aposetolo Paulo i te mau kerisetiano e eiaha e amuimui atu i te feia ohipa iino. E nehenehe noa teie amuimuiraa piri e teie mau huru taata e faatopa ia outou!

Ua ite te taurearea ra o Mollie i te reira ma te fifi i te haamataraa to ˈna hoa ra o Sally i te haamatau i te hoê tamaroa ma te omoe. E mea apî roa o Sally no te faaipoipo e ua haamatau atoa râ o ˈna i te mau tamaroa e ere i te mau kerisetiano. Aita o Mollie i ite noa ˈˈe i te ohipa e tupu ra e ua tamau noa o ˈna i te amuimui e to ˈna hoa. Te faahopearaa? Te parau ra o Mollie e: “I te pae hopea, ua rave o Sally i te faanahoraa e ia haamatau vau i te hoê tamaroa no teie nei ao, e ua haamatau iho â mâua.” Auaˈa râ, ua tauturuhia o Mollie e te mau matahiapo o te amuiraa hou te fifi a rahi roa ˈi.

Ua fati atoa o Lynn i raro aˈe i te tahi mau tupuraa atâta no te atuatu noa i to ˈna auhoaraa e te hoê tamahine o Beth te iˈoa. “Ua manaˈo vau e e nehenehe au e faahoˈi mai ia ˈna,” o ta Lynn ïa e haamanaˈo ra, “aita râ i manuïa. Ua haere au na muri iho ia ˈna i roto i te mau fare oriraa. Ua ite au e mea ino, aita râ vau i hinaaro e haamauiui ia ˈna. Ua haamata ˈtura to ˈna mau fifi i te faateimaha ia ˈu. Ua mamû noa vau, ma te manaˈo e e afaro te fifi, tera râ ua rahi roa mai.” Ua riaria roa o Lynn i te hoê ati i tupu. Ua haapohehia to ˈna hoa Beth e te taurearea iho o ta ˈna i haamatau.

E mea faahiahia roa te manaˈo taiva ore i te hoê hoa. Tera râ, mai te peu e te paremo atura to outou hoa i roto i te hoê iripo puai, e ouˈa anei outou iho i roto i te pape? O orua toopiti ïa te paremo. Te ohipa tia ia rave o te taoraraa ˈtu ïa ia ˈna ra i te hoê ahu poito. Oia atoa, e tia ia outou ia tauturu atu na te atea ˈtu.—Iuda 22, 23.

E mea titauhia ia faaatea mai ia tiavaruhia to outou hoa i te amuiraa. Te faaue nei te Bibilia e “eiaha . . . e amui atu” i taua taata ra. (Korinetia 1, 5:11) Ia tapitapi noa outou no ˈna, e nehenehe outou e tauturu hau aˈe ia ˈna, eiaha na roto i te apeeraa ia ˈna i roto i ta ˈna hapa, na roto râ i te faaiteraa i te taiva ore ia Iehova. (Salamo 18:25) Peneiaˈe e riro to outou tiaraa fati ore ei ohipa faufaa o te turai ia ˈna ia hiˈopoa faahou i ta ˈna mau ohipa. Hau atu i te faufaa, e faaoaoa to outou taiva ore ia Iehova.—Maseli 27:11.

Teimaha roa

E mea pinepine, aita te mau tamataraa maitatai roa ˈˈe no te tauturu i manuïa. Te haamanaˈo ra o Rebekah no nia i to ˈna hoa e: “Ua tamata vau i te toro atu i te rima e i te tauturu ia ˈna. Ua papai atoa vau i te hoê rata na ˈna, aita râ o ˈna i pahono mai.” Ua ite atoa o Caroline i te reira e tau avaˈe i muri iho i to ˈna tamataraa i te tauturu i te hoê hoa o tei imi i te fifi, ua “haamata [o ˈna] i te teimaha roa.”

E mea faufaa ia farii e “e hope roa tatou atoa i te faˈi i te parau ia ˈna iho i te Atua ra.” (Roma 14:12) E noa ˈtu e e mea tano ia tauturu i te hoê taata ia amo i ta ˈna mau teimaharaa, aore ra to ˈna iho mau fifi, na roto i te horoaraa ˈtu i te tauturu ohie, eita râ outou e nehenehe e amo i te “hopoia” a te tahi atu taata—oia hoi ta ˈna hopoia i mua i te Atua. “E riro hoi ta te taata nei hopoia ei nia ïa ia ˈna iho e ati noa ˈˈe,” o ta te Bibilia ïa e parau ra. (Galatia 6:5) E ere na outou te hape ia maiti to outou hoa i te ohipa o ta ˈna e rave.

Tera râ, e mea mauiui iho â ia hiˈo atu i te hoê hoa o te faaino ra i to ˈna oraraa. Teie ta te hoê taurearea tamaroa o Mike te iˈoa e parau ra no nia i te ereraa i te hoê hoa: “Ua peapea roa vau. E mea piri roa vau ia Mark e to ˈna nau metua. Ua hepohepo roa vau.”

E ohipa natura iho â ia mauiui no te ereraa i te hoê hoa. Tera râ, e nehenehe te aparauraa i to outou mau manaˈo hohonu i te hoê taata o ta outou e tiaturi e tauturu. (Maseli 12:25) “Maoti te tauturu a to ˈu mau metua,” o ta Rebekah ïa e parau ra, “ua nehenehe au e haapaiuma i te reira.” E nehenehe atoa outou e huri atu i to outou mau manaˈo hohonu i nia i te Atua ra o Iehova na roto i te pure. (Salamo 62:8) Teie te faataaraa poto a Caroline i te tupuraa: “Ua tauturu rahi mai te pureraa ia Iehova e te pororaa ia vetahi ê ia ˈu. Ua tapiri atoa vau i pihai iho ia vetahi ê i roto i te amuiraa, te mau vahine paari iho â râ. Ua taa ia ˈu i te pae hopea e e hopoia ta te mau taata no ta ratou iho mau ohipa e ua tia ia ˈu ia tamau noa i te ora i to ˈu oraraa.” Ma te na reira, e tauturu iho â outou ia outou iho. E e tauturu atoa outou i to outou hoa tei paruparu.

[Nota i raro i te api]

[Hohoˈa i te api 28]

A faaitoito i to outou hoa ia imi i te tauturu