Nafea oe e nehenehe ai e ora e a muri noa ˈtu
I TE mea hoi e e mana to te tino taata ma te taa maitai no te ora maoro roa ˈtu â i ta te mau taata e fanaˈo noa ra i teie mahana, te tuu nei vetahi i to ratou tiaturiraa i roto i te ite aivanaa no te ite e nafea tatou e nehenehe ai e ora e a muri noa ˈtu. “A noaa noa ˈi ia tatou i te hoê ite taatoa no nia i te mau taoˈa chimiques o te tino e nafea ratou ia tauiui,” o ta te taote Alvin Silverstein ïa i papai, “e tatara tatou i te huru o te oraraa. E e taa ia tatou . . . nafea te hoê taata e ruau ai.”
Eaha te faahopearaa? E aratai te reira i “te hoê tau apî i roto i te aamu o te taata,” o ta Silverstein ïa i parau. “Aita e taata ‘ruau’ faahou, no te mea e horoa atoa mai te ite o te faaupootia i nia i te pohe i te vai-apî-raa mure ore.”
Na te mau taata anei e faatupu i te reira? “Eiaha e tiaturi i te hui arii, e te taata atoa, aita hoi o ˈna e ora,” o ta te Bibilia ïa e aˈo maira. “Te reva nei hoi to ˈna varua, te hoˈi nei oia i to ˈna ra repo; mou roa ˈtura ta ˈna i opua i taua mahana ra.” (Salamo 146:3, 4) Aita roa ˈtu te mau taata i nehenehe e faataa, e faatitiaifaro noa ˈˈe i te tiaraa paruparu o te tapae atu i te ruauraa e te pohe, mai ta tatou iho â i ite mai. O to tatou Poiete anaˈe te nehenehe e na reira.
Tera râ, o te reira anei te opuaraa mau a te Atua ia ora te mau taata e a muri noa ˈtu i nia i te fenua nei?
Te opuaraa a te Atua
Ihea to te Atua ra o Iehova tuuraa i nau hoa faaipoipo matamua no te ora? I roto ïa i te hoê paradaiso i nia i te fenua nei. E ua faauehia raua ia “fanau . . . e ia rahi roa, e faaî i te fenua nei, e e haavi iho.” (Genese 1:28) E, te opuaraa a te Atua, i muri iho, oia hoi ia î roa te fenua taatoa nei i te hoê fetii taata parau-tia o te ora amui i roto i te hau e te oaoa.—Isaia 45:18.
Noa ˈtu e ua tuuhia te utua pohe i nia ia Adamu no to ˈna auraro-ore-raa, aita te opuaraa matamua a te Atua no te mau taata e ora e a muri noa ˈtu i roto i te Paradaiso i nia i te fenua nei i taui. (Genese 3:17-19) “O ta ˈu i parau ra,” o ta te Atua ïa e parau ra, “e na ˈu ïa e rave.” (Isaia 46:11; 55:11) Ua faaite te Atua e aita ta ˈna opuaraa no nia i te fenua i taui i to ˈna parauraa e: “E parahi te feia parau-tia i nia i te fenua, e parahi tamau â ratou i reira.”—Salamo 37:29.
Ei Poiete hoi no tatou, tei nia te Atua i te hoê tiaraa e faatitiaifaro i te hape o te faaruhiruhia e o te haapohe nei i te mau taata. I nia ïa i teihea niu oia e na reira ˈi? I te mea hoi no ǒ taua hape ra i te taata matamua, o Adamu, ua horoa mai te Atua ei tusia taraehara i te ora tia roa o ta ˈna Tamaiti, o Iesu Mesia, “ia ore ia pohe te faaroo ia ˈna ra, ia roaa râ te ora mure ore.”—Ioane 3:16; Mataio 20:28.
Inaha, ua mono o Iesu Mesia i te Adamu matamua mai to tatou metua tane, aore ra te tumu o te ora. No reira o Iesu i piihia ˈi i roto i te Bibilia “te Adamu hopea.” (Korinetia 1, 15:45) No reira maoti râ i te faautuahia i te pohe mai te mau tamarii a te taata hara ra o Adamu, e nehenehe te feia auraro e fanaˈo ma te tia i te ora mure ore mai te mau tamarii a to ratou “Metua no te ui a muri atu,” o Iesu Mesia.—Isaia 9:6.
Parau mau, o te Atua ra o Iehova “[te Arii hau mure ore]” e “te Metua o to tatou Fatu o Iesu Mesia.” (Timoteo 1, 1:17; Apokalupo 15:3; Kolosa 1:3) Tera râ ua riro atoa o Iesu Mesia ei “Arii no te hau,” taa ê noa ˈtu i to ˈna tiaraa “Metua no te ui a muri atu” e e ‘Faaora’ no tatou. (Luka 2:11) Ei tia no to ˈna Metua, e faatupu te Mesia i te faatereraa tamaiti arii no te faatupu i te hau i nia i te fenua nei.—Salamo 72:1-8; 110:1, 2; Hebera 1:3, 4.
I raro aˈe i te faatereraa a Iesu Mesia, e haamau-faahou-hia te Paradaiso tei erehia i nia i te fenua nei. E tupu iho â te reira, mai ta Iesu i parau, “ia tae i te faahouraa ra, ia parahi te Tamaiti a te taata i nia iho i to ˈna terono hanahana.” (Mataio 19:28) E faatere atoa te mau pǐpǐ haapao maitai a te Mesia—e 144 000 ratou paatoa—e o ˈna i nia i te fenua o tei faarirohia ei Paradaiso. (Timoteo 2, 2:11, 12; Apokalupo 5:10; 14:1, 3) E mau mirioni taata o te maitaihia i taua faatereraa parau-tia na roto i te fanaˈoraa i te ora i roto i te Paradaiso i nia i te fenua nei. Tei rotopu atoa ia ratou te taata ino o tei pohe i pihai iho ia Iesu e o ta Iesu i tǎpǔ atu e: “Ei paradaiso ïa oe e o vau atoa.”—Luka 23:43.
No reira, e faatia-faahou-hia mai te feia parau-tia ore tei pohe e e horoahia ia ratou i te ravea e ora e a muri noa ˈtu i nia i te fenua nei. (Ohipa 24:15) Te faataa ra te Bibilia ma te nehenehe i te faaoreraa o te maˈi, te ruauraa, e te pohe, ma te parau e: “Ei pihai atoa iho te Atua ia ratou . . . E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4.
Nafea ia ora e a muri noa ˈtu
E mea papu te hinaaro nei oe e faaô atoa i roto i te feia e parahi i te fenua nei e e parahi tamau â ratou i reira. Mai te peu e e, e tia ia oe ia faaî i te mau titauraa no te ora e a muri noa ˈtu i roto i te Paradaiso. I roto i te pure i to ˈna Metua i nia i te raˈi, ua faahiti o Iesu Mesia i te hoê titauraa papu maitai, i te parauraa e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.
E oaoa te mau Ite no Iehova i te tauturu ia oe no te titau i taua ite faaora ra. A ani roa ˈtu ia ratou e e haere mai ratou, ma te tamoni ore, e farerei ia oe i te hoê taime au e e paraparau no nia i te mau opuaraa a te Atua e aratai i te huitaata nei i te tia-roa-raa i te pae varua e i te pae tino atoa. Ia papu oe e nehenehe iho â to tatou Poiete mana hope e faatitiaifaro i te paruparu fatuhia o te faaruhiruhia e o te haapohe. Te piri maira te taime, e te fatata maira, e ere te ora i te mea poto faahou. E haamaitai te Atua i to ˈna nunaa e te “ora e a muri noa ˈtu.”—Salamo 133:3.
[Hohoˈa i te api 22]
I raro aˈe i te faatereraa tamaiti arii a te Mesia, e noaa te re i nia i te ruauraa e te pohe