Ia au i te Bibilia

Ta outou tuhaa ohipa i roto i ta outou mau pure

I NIA i te hoê mouˈa teitei i nia ˈˈe i te oire, te faafaaea rii nei te arii i roto i te ati no te mataitai i to ˈna aorai faahiahia mau, te oire pu aano, e te huru tupuraa ino mau i nia i to ratou utuafare. Ua putuputu te hoê nuu rahi mau i te pae apatoa e te tomo ra i teie nei i roto i te oire. Ua hape te mau tia teitei o te faatereraa, e ua taui te manaˈo o te huiraatira no te turu i te feia patoi. Ma te paruparu, te pûpû nei te arii i te hoê pure i te Atua. E faaroo hohonu to taua taata ra, ua maraa mai to ˈna tiaturiraa e e faaroo te Atua i ta ˈna aniraa e ua faahuru ê oia i te ohipa o te feia totova. I reira, ma te faarue i to ˈna oire unauna mau, ua pou aˈera oia mai te mouˈa mai e ua haere i te pae apatoerau e tae atu ai i te medebara i te tahi atu pae o te anavai. Eaha ˈtu â ta ˈna e nehenehe e rave? I teie nei tei roto te tupuraa i te rima o te Atua.

Mai te reira atoa, te huri tia ˈtu nei te mau taata faaroo i nia i te Atua i teie nei mahana na roto i te pure i te mau taime fifi mau e te tiaturiraa mahanahana e e horoa oia i te aratairaa papu e mea nafea ia pure, te faaite ra te Bibilia e o te Atua ra o Iehova “Tei faaroo i te pure.” (Salamo 65:2) Ua papu ia tatou e te feia aau tia atoa o te imi mau ra i te Atua e e faaroohia ratou.

Tera râ, e navai anei te faaroo e te pure? Eaha te tuhaa o ta tatou e hauti i roto i te faahopearaa o ta tatou mau pure?

Nafea tatou e nehenehe e rave amui i te ohipa?

O te arii ra o Davida no Iseraela i tahito ra tei faahitihia i te omuaraa. Ma te faaruru i te totovaraa huna o ta ˈna tamaiti ra o Abasaloma e ta ˈna taata aˈo haavarevare ra o Ahitophela, ua maiti oia e faarue ia Ierusalema e e imi i te parururaa i roto i te oire haapûraa o te medebara ra o Mahanaime i te pae Hitia o te râ o te anavai no Ioridana. Ma te teimaha paha na roto i te taiâ, te hepohepo, e te mǎtaˈu, ua ani oia ia Iehova na roto i te pure, ma te parau e: “E Iehova e, teie ta ˈu maa parau ia oe e, e faariro oe i te aˈo a Ahitophela ei maamaa!” (Samuela 2, 15:11-15, 30, 31) Teie nei râ, ua rave hau atu â o Davida i te pure noa. Ua apiti atu oia na roto i te hoê haerea tano e ia manuïa ta ˈna pure. Eaha ta ˈna i rave?

Ua haamata aˈena ta ˈna ohipa na mua ˈˈe te tamataraa ta ˈna e faaruru ra. E rave rahi mau matahiti, na mua ˈˈe oia i riro mai ai ei arii, ua haapapu o Davida iho e e taata haapao maitai oia o te haamori ia Iehova. (Samuela 1, 16:12, 13; Ohipa 13:22) Ua faatupu oia i te taairaa piri roa e o te Atua. No reira, i raro aˈe i te tamataraa, ua roaa ia Davida i te tiaturiraa e e faaroo o Iehova i ta ˈna pure e e pahono oia ma te tano.

Hoê â huru i teie nei mahana. Na roto i te apeeraa i te mau aˈoraa Bibilia ei hohoˈa no te oraraa o te mau mahana atoa te ravea matamua e manuïa ai ta outou mau pure. E faatupu taua turu-maite-raa rotahi i te mau faaueraa tumu i horoahia e te Atua i te mau auraa fatata roa e o ˈna. E tia e ia itehia taua huru taairaa piri roa e te Atua e te huru faaroo na mua ˈˈe te tamataraa e haamata ˈi. Mai te hoê niu paari maitai i reira te hoê fare e patuhia ˈi; e tia e ia patuhia na mua ˈˈe te pǎpai o te fare e faatiahia ˈi. I reira e nehenehe tatou—i teie nei atoa, na mua ˈˈe te tamataraa e haamata ˈi—e ohipa e ia manuïa te rahiraa o ta tatou mau pure.

A ohipa ma te itoito!

Noa ˈtu e ua hauti te mau taairaa ta Davida i faatupu e te Atua i te hoê ohipa faaora, ua farii atoa oia e eita o ˈna e nehenehe e hiˈo noa ma te ore e ohipa i roto i te tupuraa o ta ˈna pure. I te tahi aˈe pae, ua rave o Davida ma te hoê ohipa itoito no te haapapu i te haerea paari o te apee i ta ˈna pure.

I rotopu i te mau hoa haapao maitai a Davida, te vai ra te taata ati Areki ra o Husai. Ua farerei o Husai i te arii o te horo ra i nia i te mouˈa ra no Oliveta. Noa ˈtu e ua hinaaro oia e apee ia Davida i roto i te hororaa, ua auraro o Husai i te titauraa ru a Davida e faaea i roto i te oire. E tia ia ˈna ia haavarevare turu ia Abasaloma, ma te tamata i te faaruri ê i te mau parau o te taata aˈo orure hau ra o Ahitophela, e na ˈna e faatia ˈtu ia Davida i te mau tupuraa. (Samuela 2, 15:32-37) Mai tei tiaturihia, ua upootia o Husai na roto i te roaaraa i te tiaturiraa o Abasaloma. I teie nei e nehenehe o Iehova e ohipa ˈtu.

Ua pûpû te taata maramarama, e te haerea piˈo ra o Ahitophela i te hoê raveraa faahiahia mau. Ua ani oia ia Abasaloma ia horoa ia ˈna ra e 12000 taata no te aro ia Davida i taua po iho â o Davida i horo ai, e aita oia i nahonaho e e noaa oioi noa—na te hoê faataheraa toto e faahope roa i te orureraa hau o te manuïa! Ma te haamaere i te rahiraa, ua maiti o Abasaloma i te aˈoraa a Husai no nia i taua tumu parau ra. Ua haamaramarama oia ia Abasaloma ia vaiiho i te taime no te haaputu i te nuu taata rahi mau, e na Abasaloma iho e aratai eiaha na te tahi atu taata. Na roto i te aratairaa a Iehova, ua fariihia te aˈoraa a Husai. Ua taa papu ia Ahitophela e te apeeraa i te aˈoraa a Husai e aratai te reira i te pau, ua hoˈi atura i to ˈna fare e ua haapohe atura ia ˈna.—Samuela 2, 17:1-14, 23.

Papu maitai e ua pahono o Iehova i te pure a Davida—mai ta ˈna iho â i pure. Te horoa nei te hiˈoraa o Davida o te ohipa ia au i ta ˈna pure i te hoê haapiiraa no te taatoaraa o te imi ra i te tauturu o te Atua na roto i te pure.

E rave o Iehova i ta ˈna tuhaa

Papu maitai, ua faaite o Iesu i ta ˈna mau pǐpǐ ia pure no te maa no te mau mahana atoa e ua tǎpǔ oia e mai te peu e e tuu ratou i te mau faufaa o te Atua i te parahiraa matamua, e haapao Oia i to ratou mau hinaaro. (Mataio 6:11, 33) Ei hiˈoraa, mai te peu e aita ta te hoê taata e ohipa, e tia ia ˈna ia ohipa ia au maite i ta ˈna pure e ani ra i te tauturu na roto i te raveraa i te mau mea atoa no te imi aore ra no te faatupu i te hoê ohipa.

Noa ˈtu eaha te tumu parau o ta outou mau pure, tei te huru o ta tatou mau aravihi e rave e ia manuïa te reira. Te vai ra te taime e nehenehe tatou e faatupu e rave rahi e te taime ta tatou e nehenehe rave iti aˈe, mai te peu e aita e ravea. Te tuhaa faufaa e ere ïa eaha ta tatou e nehenehe aore ra te ore e nehenehe e rave, tera râ e faatupu tatou i te mea maitai roa ˈˈe o ta tatou e nehenehe.

E nehenehe tatou e papu e ua ite o Iehova i ta tatou mau huru tupuraa e to tatou mau aravihi. E faatupu oia ma te taatoa i te mea e maraa ia tatou ia rave, e eita roa ˈtu oia e titau ia tatou ia rave hau atu â i ta tatou e nehenehe. Mai te peu e e nehenehe tatou e rave rahi aore ra e rave iti, na Iehova e faatano i te toea ra. Te haafaufaa nei oia e te turu ra oia i ta tatou mau tutavaraa e e ohipa amui oia e o tatou no te faatupu i te faahopearaa maitai roa ˈˈe o ta te taata tataitahi e titau ra.—Salamo 3:3-7.

I rotopu i te tamataraa, ua parau te Arii ra o Davida ma te tiaturi e: “No ǒ mai te ora ia Iehova ra: te vai ra to oe ra maitai i nia i to oe ihora mau taata.” (Salamo 3:8) Ia tamau noa to outou tiaturiraa i roto i te mana o Iehova e to outou rave-amui-raa i te ohipa: te mea iti aore ra te mea rahi, e aratai i te manuïaraa o ta outou mau pure.