Te faahanahanaraa i te hoê Poiete

“TE MAU tiare no te faanehenehe ïa, e te mau maa hotu no te amu ïa. Tera râ, e rave rahi mau maa hotu e mea nehenehe. Mea au na to tatou Metua i nia i te raˈi e faanehenehe i te mau mea e ia nehenehe atoa e faaohipahia.” E ere teie nota no roto mai i te hoê buka faaroo. No roto mai râ i te hoê buka ite aivanaa teie te upoo parau The Child’s Book of Nature. Papaihia i te matahiti 1887, ua hinaaro to ˈna taata papai, o Worthington Hooker, e taote oia, ia faaohipahia te buka i roto i te mau utuafare e te mau fare haapiiraa no te haapii i te mau tamarii.

Te horoa ra te huru papairaa o teie buka i te haapapuraa e te tiaturi nei e te faatura nei te taata papai i te hoê Poiete. Teie ta te Taote Hooker e papai faahou ra: “Ua rau te monamona o te mau maa hotu o te fenua nei, mai ta outou e ite ia manaˈonaˈo anaˈe outou e rave rahi o te reira. Auê ïa faaiteraa o te hamani maitai rahi o te Atua e! Aita o ˈna e haamauruuru noa ra ia tatou na roto i te tahi mau ohipa, na roto râ e rave rahi taoˈa. Fatata roa e aita e hopearaa to te mau ohipa anaanatae a teie nei ao i roto i to ratou huru-rau-raa. Auê ïa i te maere e ia ite noa ˈtu te hoê taata i teie mau mea atoa, e te ora nei oia i te mau mahana atoa ma te ore e haamauruuru i to ˈna Poiete!”

I te taime matamua i neneihia ˈi te buka ra The Child’s Book of Nature, ua aano rahi te mau haapiiraa niu-ore-hia a Darwin e fatata e toru ahuru matahiti te maoro. Tera râ, te faaite nei te buka a te Taote Hooker e i te hopearaa atoa o te senekele 19, e nehenehe te hoê buka e faahanahana tahaa i te Atua, maoti râ i te tupuraa matapo, no te feia uiui no nia i te natura.—A faaau e te Isaia 40:26.