Te haapiiraa e mea tupu noa te mau mea e oe

I TE roaraa o te senekele 19, ua faatiaturi te buka ra The Origin of Species e rave rahi taata e ua ora mai na te taata ma te faataa ê mai i te Atua e e tamau noa oia i te na reira. Aratohia e te mau haereraa i mua i te pae ite aivanaa, e rave rahi tei manaˈo e e ere te Atua i te mea faufaa faahou e e nehenehe taua ite aivanaa e faaora i te nunaa taata. Ua tapao te buka ra Age of Progress e “na te tiaturi-papu-raa e ma te feruri maite, e nehenehe te tutavaraa tuutuu ore a te taata e taui i te ao nei” i te senekele 19.

Tera râ, tae noa ˈtu i te hopearaa o taua senekele ra, ua feaa atoa o Charles Darwin i nia i to ˈna manaˈo maitai. Ia au i te hoê taata tuatapapa aamu, ua haapeapea o Darwin no nia i te haapiiraa niu-ore-hia e mea tupu noa te mau mea “o tei haapohe i te Atua e e eita e nehenehe e numera i te mau faahopearaa no te tau a muri aˈe o te huitaata nei.” Ua haamanaˈo o Alfred Russel Wallace, te hoê taurearea no te tau o Darwin e: “I te roaraa o ta ˈu paraparauraa hopea e o Darwin [na mua noa ˈˈe i te poheraa o Darwin] ua faaite oia i te hoê manaˈo peapea roa no nia i te tau a muri aˈe o te huitaata nei.”

Eaha ta te tutavaraa taata i faatupu?

Mai reira mai ua faaite te aamu o te senekele 20 e te tamau noa ra taua mau taime peapea ra. Ua huna te mau ohipa tei ravehia na roto i te mau ravea aravihi apî mai te tau mai o Darwin tei haapapu-maramarama-hia e e tau poiri roa ˈˈe, e te haavî roa ˈˈe i roto i te taatoaraa o te aamu o te taata. Te ora nei tatou i roto i ta te taata tuatapapa aamu ra o H. G. Wells i faataa “te hoê haaparuparuraa mau.”

Mai te taime a faahiti ai o Wells i teie parau (tau 75 matahiti i teie nei), ua tamau noa te ao i te faaruru atu â i te haaparuparuraa. Aita noa ˈˈe te mau tamataraa a te mau aivanaa, te feia aravihi i te pae faanavairaa faufaa, te mau taatiraa totiale, te mau faatereraa taata, aore ra teie mau haapaoraa o te ao i faaafaro i te huru oraraa aore ra i tapea atoa i te area taime haaparuparuraa. Te haere noa ra te huru oraraa i te ino-roa-raa.

E tia râ ia uihia, i roto i te tupuraa mau: Eaha ta te tutavaraa taata i faatupu? Ua faatupu anei te ite aivanaa e te mau ravea aravihi apî i te hoê ao maitai aˈe? “Ia hohora anaˈe tatou i te vea e ia hiˈo tatou e eaha te parau apî,” o ta te taata tuatapapa ihiora ra o Ruth Hubbard i parau, “aita e fifi i te pae ite aivanaa. E mau fifi râ no nia i te faanahonahoraa i te pae totiale, no nia i te mau ohipa teimaha roa, no nia i te mau taata e tapapa ra i te moni e aita e tâuˈa ra i te mau hinaaro o te taata.” Ua parau faahou o Hubbard e: “Aita vau e manaˈo roa ra e i roto i te hoê tatuhaaraa tano o te mau faufaa, e nehenehe te ite aivanaa e faaafaro i te mau huru aore ra e rave rahi fifi atoa o te haapeapea nei i te rahiraa taata i te ao nei.”

Oia mau, eaha te faufaaraa ia nehenehe te taata e ratere atu i nia i te avaˈe e eita râ o ˈna e nehenehe e faatitiaifaro i te fifi rahi o te fetii taata? Ua faaore anei te hamani-rahi-raa i te mau mauhaa tamaˈi pohe, mai te paura atomi, i te mau tamaˈi e te haavîraa uˈana i te mau nunaa ěê? Ua faaiti rahi anei te mau ohipa a te ite aivanaa i te taparahiraa taata, te amahamaharaa te utuafare, te mau maˈi pee na roto i te taatiraa, te taiataraa, te mau hapûraa i rapaeau i te faaipoiporaa, te ino i roto i te mau toroa teitei, te veve, te poia, te ereraa i te faaearaa, te faaohiparaa i te raau taero, te haaviiviiraa? Aita, maoti râ ua faatupu te ite aivanaa i te tahi o teie mau ohipa atâta. Na roto i te faarueraa i te Atua e te fariiraa i te haapiiraa e mea tupu noa te mau mea e te ite aivanaa, aita te fetii taata i haamaitai mai i to ˈna huru oraraa ua faaino râ oia.

E ere i te mea maere, e rave rahi o te hiˈopoa faahou ra i te haapiiraa niu-ore-hia e no roto mai te taata i te mau animala mai te uri-taata ra te huru, tei taa ê roa i te haapiiraa e te vai ra te hoê Atua o tei hamani i nau taata matamua. Ua faaite te hoê titorotororaa Gallup i te mau Hau Amui e e 9 i nia i te hanere anaˈe marite e tiaturi ra e mea tupu noa mai te taata; e 47 i nia i te hanere e farii ra i te manaˈo e na te Atua i hamani i te taata i roto i to ˈna huru i teie mahana.

Te tohu a te Bibilia

Noa ˈtu e ua tohu te buka ra The Origin of Species e e haere te taata i te huru tia-roa-raa, ua tohu te Bibilia e e faainohia te ao na te hoê ati i te pae morare. (Mataio 24:3-12; Timoteo 2, 3:1-5) Ua tohu atoa te Bibilia e e faaorehia teie ati, i muri iho e riro te paradaiso ei tufaa na te huitaata haapao maitai, aita e mau fifi atoa i teie mahana e tupu i reira.—Salamo 37:10, 11, 29; Isaia 11:6-9; 35:1-7; Apokalupo 21:4, 5.

Ua turai teie tiaturiraa e rave rahi taata ia hiˈopoa i te Bibilia ma te anaanatae rahi. Eita anei e te tumu o te oraraa e hau aˈe i te hoê aroraa no te ora? E ravea anei ta te Bibilia eiaha no te tau i mairi o te taata, no to ˈna tau atoa râ no a muri aˈe, to oe oraraa atoa no a muri aˈe? E hoona aˈe ïa to oe faufaaraa ia hiˈopoa oe i ta te Bibilia e haapii mau ra no nia i te Atua e ta ˈna opuaraa no teie fenua e to ˈna mau taata. Mai te peu e e hinaaro oe i te tahi atu â mau haamaramaramaraa, e oaoa te mau Ite no Iehova i te tauturu ia oe.

[Tumu parau tarenihia i te api 9]

E mau mirioni taata tei tauturuhia ia hiˈopoa faahou i te haapapuraa e te vai ra te hoê Atua o te poieteraa, na roto i te faaohiparaa i te buka ra La vie: comment est-elle apparue? Évolution ou création?a Tae mai i teie mahana, te tahi 30 mirioni buka tei neneihia na roto e 27 reo. Te tamau noa atoa ra te vea ra A ara mai na! i te nenei i te haamaramaramaraa no nia i te mau ohipa o ta te ite aivanaa mau e faaite ra no nia i te faufaaraa o te haapiiraa e mea tupu noa te mau mea.

[Nota i raro i te api]

[Hohoˈa i te api 8, 9]

Ma te taa-ê-raa i te haapiiraa e mea tupu noa te mau mea, ua tohu te Bibilia i te ati i te pae morare i teie mahana e ta ˈna ravea—te hoê paradaiso aita e arepurepuraa

[Faaiteraa i te fatu o te hohoˈa i te api 8]

U.S. Coast Guard photo

[Faaiteraa i te fatu o te hohoˈa i te api 8]

Tamarii e pohe poia ra: WHO hohoˈa na P. Almasy

[Faaiteraa i te fatu o te hohoˈa i te api 8]

Atau: U.S. National Archives photo