Te faaitehia ra to ˈna mau mea moe

IA PAARI anaˈe mai te mau vahine e tupu iho â te tau faaearaa maˈi avaˈe. Inaha, aita te reira i taa-maitai-hia na mua ˈˈe. Ia au i te buka ra Te area oraraa vai mamû noa—Te tau faaearaa maˈi avaˈe (beretane), i tiaturi na hoi te mau taote faafanau no te 19raa o te senekele e i te tau faaearaa maˈi avaˈe “e ino te faanahoraa uaua uira o te vahine e e erehia te mau vahine i to ratou huru nehenehe.”

Te vai noa nei â teie mau huru manaˈo hape. Ei faahopearaa, e mǎtaˈu e e taiâ e rave rahi mau vahine i te tau faaearaa maˈi avaˈe. No te faaruru atu i te mau fifi i te pae feruriraa taaihia i nia i te reira ua faarirohia ïa te reira ei “hoê o te mau ohipa fifi roa ˈˈe i roto i te oraraa o te hoê vahine,” i roto i te buka ra Te tau faaearaa maˈi avaˈe natura—Te aratai taatoa no nia i te area oraraa taa-ore-roa-hia o te hoê vahine (beretane).

I roto i te mau totaiete taata i reira e faarahihia ˈi te parau no te vai-apî-raa e te hohoˈa tino taurearea, e horoa paha te tupuraa mai te mau tapao no te tau faaearaa maˈi avaˈe i te hoê manaˈo hape: oia hoi te hope-taue-raa te apîraa e te haamataraa te ruhiruhiaraa. No reira, te taiâ ra vetahi mau vahine i te tau faaearaa maˈi avaˈe no te mea e e au ra e te faahohoˈa ra te reira i te omuaraa o te hoê tau oraraa apî au-ore-roa-hia. Ua tae roa vetahi pae i te faariro i te reira ei “tufaa no te pohe.”

Aita e faufaa no te mau vahine no teie tau ia mauiui ma te ite ore noa i roto i teie tau o te oraraa. Te faaitehia ra te mau mea huna o te tau faaearaa maˈi avaˈe. Te ravehia ra te mau maimiraa hau atu â, e te hamanihia ra te mau raau no te faaohie i teie tau tauiraa. Te huti ra te mau vea e te mau buka i te ara-maite-raa i nia i teie tumu parau, ma te horoa i te mau faataaraa no nia i te mau aniraa e mea haama hoi ia anihia ˈtu na mua ˈˈe. Ua maramarama atoa hau atu â te feia toroa taote no nia i te mau fifi e farereihia ra e te mau vahine.

No te aha e tauaparau-rahi-hia ˈi no nia i teie tumu parau? No te mea ia taa-maitai-hia te tau faaearaa maˈi avaˈe e ore atoa ïa te mǎtaˈu, te riaria i te mau mea hape e te inoino o te mau vahine e rave rahi. I roto i te rahiraa fenua e ora maoro aˈe te mau vahine, e te hinaaro ra ratou e faaore i ta ratou e manaˈo ra e e haamamûraa opua-mau-hia no nia i teie tumu parau e ia haamaramaramahia ratou. Te hinaaro ra ratou i te mau pahonoraa ohie, e te papu. Ma te tia hoi, i te mea e ora â te rahiraa o ratou hau atu i te hoê i nia i te toru o to ratou oraraa i muri iho i te tau faaearaa maˈi avaˈe.

Te faaite ra te mau tabula rahiraa taata i te mau Hau amui no Marite i te maraaraa e 50 i nia i te hanere o te rahiraa vahine matahiti tau faaearaa maˈi avaˈe no te ahuru matahiti i mua nei. Te hinaaro ra teie mau vahine e ite no nia i te mau maˈi, te veavea taue, te huru tauiui taue, te mau mauiui rii, e te tauiraa te tino e te mau manaˈo hohonu. No te aha teie mau mea e tupu ai? E hope anei te oraraa faufaa o te hoê vahine i te tau faaearaa maˈi avaˈe? E taui ra anei te faaearaa maˈi avaˈe i te huru iho o te vahine? E tuatapapa te mau tumu parau i mua nei i teie mau uiraa.