“Ua taui to ˈu manaˈo no nia i te hopoia a te hoê taote”

E HAAFIFIRAA mafatu atâta mau to Akane, e maha matahiti, no Osaka oia, i Tapone, fifi i te pae o te tereraa o te toto e no reira e tia oia ia ravehia te tâpûraa mafatu rahi i nia ia ˈna. Ani haehaa ihora to ˈna mau metua i te mau taote ia ore e faaohipahia te toto i roto i te tâpûraa.a

Mea fifi mau te tâpûraa mafatu mahora aore e faaohipahia te toto, i nia i te mau tamarii no te faito iti o to ratou toto. I roto i te huru tupuraa o Akane, ua farii iho â te mau taote ia tâpû ma te ore e faaohipa i te toto. No to ratou mau aravihi papu i te pae rapaauraa maˈi, ua manuïa te tâpûraa o Akane. Ua oraora vitiviti mai oia e i teie nei mahana te fanaˈo nei oia i te tino oraora maitai.

Ua papai te metua vahine o Akane i te mau taote o tei apiti i te tâpûraa, ma te hopoi atoa hoi i te hoê hohoˈa pata-apî-hia o Akane. Ua pahono atura te vahine taote faataoto i te metua vahine o Akane. Te parau ra te hoê tuhaa o taua rata ra e:

“Te faaoaoa rahi nei te oraoraraa maere mau o Akane ia matou. Ua fifi au i te tapea-noa-raa i to ˈu mau roimata i to ˈu iteraa ˈtu i te hohoˈa nehenehe mau ta oe i tuu i roto i ta oe rata. Ua horuhoru rahi au eiaha no te fifi o te tâpûraa, no te taa-ê-raa râ i rotopu i ta oe mau tiaturiraa e ta ˈu nei. I teie nei, maoti teie ohipa ua taui to ˈu manaˈo no nia i te hopoia a te mau taote. E tia i te mau taote ia faaohipa i to ratou mau ite papu i te pae rapaauraa maˈi no te faaora i te mau taata, tera râ e tia atoa ia ratou ia faatura i te tiaraa e te mau hinaaro o te taata maˈi.”

[Nota i raro i te api]