Te tupuraa e te toparaa te haamoriraa a Satani
Te tupu ra te mau peu faaroo e ravehia na na te mau tahuˈa ahu roroa ereere i roto i te mau vahi pouri i raro i te fare, e himene hoi i te mau pure na nia i te mau taata i taamuamuhia i nia i te fata, e te tapea ra i te mau mori hinu e itehia te ata huru ê mau ia hautiuti noa i nia i te mau papai, inaha mai te huru ra ïa e te haamori ra ratou i to ratou atua, ia Satani. Ma te haafatatahia ˈtu e te ite moe o te tahi huru miterio e apitihia i te mau mea tei hau ê i te natura taata nei, te haafaahiahia ra te mau taurearea i amui atu i taua mahana ra i roto i te ohipa tahutahu, i te omumuraa rahi e î roa na roto i te reva. Te haafatata ra ratou i te fata ma te manaˈo miterio o te huru otahi e vai ra i roto ia ratou anaˈe ra.
E peu noa anei teie o te ore e haamauiui? Aore ra e ohipa demoni iino na te totaiete o teie nei tau?
E RAVE rahi mau peperu parau i papaihia i roto i te mau vea, e te mau buka no nia i te mau ohipa riaria mau a te mau haamoriraa a Satani. Ua haapurorohia te ohipa a te mau pǔpǔ haavî a Satani na roto i te afata radio teata e te radio o te fenua. Ua riro mai hoi oia ei fifi matamua na te mau mutoi i roto i te mau oire nainai mai roto atoa i te mau oire rarahi i Marite, Kanada, e i Europa.
E ainu taa ê ta te haamoriraa a Satani na te mau ui apî i teie nei tau. Te faataa ra te taata i haamau i te Ekalesia a Satani e no te aha, ia au i tei faaitehia i roto i te vea ra ’Teen o te avaˈe tiunu 1993: “Maoti hoi i te faaue i te mau melo ia faaiti mai i to ratou mau hinaaro natura ru, e haapii matou e e tia ia ratou ia faaite i to ratou mau hinaaro natura ru. E ô mai ïa te hinaaro uˈana i te pae taatiraa, te hinaaro tahoo, te hinaaroraa i te mau taoˈa materia.”
Auê o Satani i te mauruuru i teie manaˈo diabolo, i te mea e te patoi ra i te mau faaueraa tumu kerisetiano faauruahia e te Atua e!
Te maraa noa ˈtura te haamoriraa a Satani. E haamǎtaˈuraa hoi teie e rahi noa ˈtura, o te fatata roa râ i te ore. Tei raro aˈe to ˈna atua i te faautuaraa a te pohe. E oia atoa te ao a Satani e to ˈna mau melo, inaha “te vai noa nei te ao atoa i raro aˈe i taua varua ino ra.” (Ioane 1, 5:19; Roma 6:16) Teie te poroi a Iehova i te feia haamori ia Satani e i te taatoaraa o te taata tei ite aore ra tei ore i ite e te tavini ra ratou i te mau hinaaro o Satani: “E teie nei na te Atua hau e haaparuparu ia Satani i raro aˈe i to outou avae eita e mahia.”—Roma 16:20.
Eaha ïa te oraraa no a muri aˈe o te huitaata e autâ nei, no roto mai i “te Atua hau ra”? E faaite mai na tumu parau e toru i muri nei i te tupuraa e te toparaa te haamoriraa a Satani e te mau huru tupuraa i nia i te fenua nei e mono ia ˈna.