Te ooro ra anei outou?

E TAATA ooro rahi anei outou? Mai te reira hoi te tahi mau taata e aita roa ˈtu ratou e ite ra i te reira. No reira, aita ratou e taa ra e no te aha ratou e paruparu ai e e aniania ia ara mai ratou. Ua matauhia to ratou huananeraa mai te maumauraa o te hutiraa aho i roto i te taotoraa. Ia taoto anaˈe te hoê taata e teie huenaneraa, e paruparu te mau uaua o te arapoa o te haamatara noa ra i te mau eˈa hutiraa aho e tae noa ˈtu i te piriraa o te haereraa o te mataˈi. E nehenehe e mairi e hoê minuti hou te taata e puunena ˈi e e ara ˈi maa taime poto noa. Aita te rahiraa o te feia e te maumau ra to ratou hutiraa aho e ite ra e te haapeapeahia ra to ratou taotoraa. Te ravea noa paha e itehia ˈi na roto ïa i te hoê hoa o te piha o te faaara-pinepine-hia e te oororaa. Te tiaturi ra te feia aravihi e te turu ra te maumauraa o te hutiraa aho i te mau ati purumu e i nia i te vahi raveraa ohipa e e nehenehe te reira e riro mai ei tumu o te mau-taue-raa te roro e te mau maˈi mafatu.

Te vai ra anei te hoê ravea? Te aˈo nei te Buka Aratai i te pae rapaauraa o te utuafare (beretane) (Apooraa rahi o te mau taote e te mau taote tâpû no te haapiiraa tuatoru i Columbia) e: “Te naeahia ra te mau tane hau atu i te 20 taime i te mau vahine. Hau atu i te afa e mea poria te feia maˈi, o tei na nia ˈˈe i te faito au o te haereraa mataˈi. Tera râ, e tuhaa faufaa roa te faatoparaa mai i te kilo no te rapaauraa.” Te horoa atoa mai ra taua noâ buka ra e i roto e rave rau mau tupuraa, e nehenehe e titauhia te hoê tâpûraa no te faaiti mai i te haafifiraa o te haereraa mataˈi.