Te mau metua—Eaha te mau taoˈa hauti o ta oe tamarii?
“IA PAU te taime i nia i te ohipa e aita e taime no te hauti e riro mai o Jack ei tamaiti taere i te pae feruriraa e i te pae o te mau manaˈo hohonu.” Te na ô ra hoi te hoê parau tahito. E tuhaa faufaa iho â te hauti i roto i te oraraa o te mau tamarii. Mea na roto i te mau ohipa hauti e aano ai te feruriraa e e etaeta ˈi te mau uaua iˈo a te mau tamarii e e rahi ai to ratou aravihi. Ua riro hoi te mau hauti a te mau tamarii no teie nei tau ei imiraa moni rahi. E ere tei te mau tamarii aore ra te mau metua te parau no te mau taoˈa hauti, tera râ, tei te feia hamani taoˈa hauti, te feia hoo, te feia faatianiani, e te feia aravihi i te pae tapihooraa. Na roto i ta ratou mau ravea aravihi apî no te hamaniraa i te mau taoˈa hauti e te turu a te ravea haapurororaa mana, te taui ra ratou i te huru feruriraa o te ao a te mau taoˈa hauti—ma te mau faahopearaa peapea na te mau metua e te mau tamarii atoa.
Ma te feaa ore te haafaufaa mau ra e rave rahi taata o te pu hamaniraa taoˈa hauti i te maitai o te mau tamarii. E mea pinepine râ, o te moni te haapaohia na mua ˈˈe. Teie ïa te tumu parau rahi, e ere e, eaha te taoˈa hauti e haapii i te tamarii e aore e faananea ˈtu i to ratou feruriraa, tera râ eaha te taoˈa hauti e hinaaro-rahi-hia ra. E te mea e hoo-rahi-hia nei, e ere ïa i te mau taoˈa hauti hamani-noa-hia i te ahu, te raau, e te uraina no te mau matahiti i mairi iho nei e mau taoˈa hauti aravihi roa e te oti roa e aita ˈtura e titau-faahou-hia te tamarii ia feruri.
Te hoo ra te hoê taata hamani taoˈa hauti, ei hiˈoraa, i te mau pereoo uira hauti e te mau taata rii haavare i roto o te taa te tino i te ûraa te pereoo. Ia û anaˈe te mau pereoo, e purara i rapae te mau rima, te mau avae—te upoo—o te mau taata rii haavare na roto mai i te haamaramarama o te mau pereoo rii. E tamata te tahi atu hauti i te pere vahine hapu te huru. E hohoˈa pute te huru i te hamaniraahia ia taamuhia te reira i nia i te opu o te hoê tamahine rii e o te hauti mai te tue rii e te otuitui o te mafatu o te aiû iti i roto i te opu.
Te tiaturi nei te tahi pae e faufaa to teie mau taoˈa hauti ei haapiiraa. Te pii ra o Donna Gibbs vahine faatere i te pae no te mau ravea haapurororaa o te hoê taiete hamani taoˈa hauti, i te pere hapu ei “ravea arearearaa no te [mau tamahine iti] ia ite atoa ratou i to mama huru.” Aita râ hoi te taatoaraa e farii ra i to ˈna anaanatae. Te pii ra te taote T. Berry Brazelton, orometua haapii i te pae rapaauraa i te tamarii i te Haapiiraa tuatoru toroa taote no Harvard, i teie taoˈa hauti oia hoi ei “haruraa i te hoê ravea a te mau metua no te horoa ˈtu i te tahi mea faufaa i te hoê tamarii.” Te aimǎrô ra te taote David Elkind, te hoê orometua haapii no nia i te maimiraa i te pae o te tupu-maitai-raa o te tamarii, e “e mea huru ê roa teie mau taoˈa hauti.” Te parau ra oia e te hoê pepe haavare o te hauti mai te hoê aiû iti i roto i te opu “tei te atea ê roa ïa i ta [te tamarii] e nehenehe e taa aore ra e haafaufaa.” Mai te mau taoˈa hauti e faahohoˈa ra i te pau rahi o te hoê ati purumu, te na ô faahou ra oia e ua î aˈena hoi te afata teata i te haavîraa uˈana, “no te aha e faarahi ai i te reira na roto i teie huru taoˈa hauti?”—The Globe and Mail, no te 8 no febuare 1992.
Te vai atoa ra te mau aimǎrôraa no nia i te tahi atu mau hauti au-rahi-hia, mai te mau hauti pere tamaˈi a te video e te mau pupuhi pape puai roa. No nia i te reira, ia au i te peretiteni o te mau fare hamaniraa taoˈa hauti no Marite, “te manaˈohia ra e te vai ra 150 000 taoˈa hauti i nia i te matete i te mau taime atoa,” e mea fifi roa ïa no te mau metua ia maiti eaha te mau taoˈa hauti ta ratou e hoo mai. Na te aha ïa e aratai i te mau metua i te reira tuhaa? E tumu tano anei ia haapeapea no nia i te tahi mau taoˈa hauti o teie nei mahana? E hiˈopoa te mau tumu parau i mua nei i te reira e te tahi atu mau uiraa te taaihia i nia i te reira.