E nehenehe oe e pohe ia ore anaˈe oe e faaetaeta i to oe tino
TEIE te poroi no ǒ mai i te Taatiraa Marite no nia i te mafatu e te Piha maimiraa no Kanada ia paiuma roa te toto i roto i te roro. E rave rahi ahuru matahiti i teie nei, ua tapaohia te puhipuhiraa i te avaava, te neˈiraa toto puai, e te rahiraa cholestérol i roto i te toto ei mau tumu rahi no te mau maˈi mafatu o te tia hoi ia ohipa i nia iho. I te matahiti 1992 râ, ua amuihia ˈtu te tahi atu tumu—te oreraa e faaetaeta i te tino. Peneiaˈe o te mea ohie roa ˈˈe ïa no te ohipa i nia iho.
“A na reira noa e ia na reira ma te tamau,” o ta te taote o John Duncan no Dallas, Texas e parau ra. Ma te peapea mau, e rave rahi hoi taata o te ore e faaetaeta tamau ra i to ratou tino. “Te vai ra i Marite te hoê manaˈo hape e no teie peu apî faaetaetaraa tino i na matahiti tootoru aore ra toomaha, ua maraa ïa te mau marite o te faaetaeta ra i to ratou tino,” ta Tom McMillen, Peretiteni mono o te Apooraa no nia te faaetaetaraa tino e te ohipa taaro, e parau ra. “E ere ïa i te parau mau. Ua fatata e 250 000 feia pohe i te matahiti hoê i te oreraa e faaetaeta i to ratou tino.
“I teie nei mahana e 22 anaˈe iho marite i nia i te hanere e faaetaeta ra i to ratou tino ia au i tei faaitoitohia ra no te oraora-maitai-raa o te tino,” ia au i te parau a te taote o Walter R. Dowdle, faatere no te mau Pu no te mau Hau amui no Marite no nia i te hiˈopoaraa i te mau maˈi. “Te titauhia nei ia faaitoito te nunaa taatoa no te aro i te oreraa e faaetaeta i te tino no e rave rahi taata i te mau Hau amui no Marite.
Aita e titauhia ra ia haa hua, mai ta te Medical Post no Kanada e faataa ra: “Ua haapapu mai te mau maimiraa apî e ia ori haere mǎrû noa na raro e haamaitai te reira i te tino.” Te faataa ra te taote o Anthony Graham, upoo no te pae o te mafatu i te Fare maˈi no Wellesley i Toronto, Kanada e: “Te faahiti ra matou i te parau no te faaetaeta-rii-noa-raa i te tino, e mau huru ohipa haihai mai te ohipa-tamau-raa i roto i te aua tiare e rave rahi taime i te hebedoma, e aore ra ia ori haere na raro no te hoê tere poto. . . . Ua ite matou i teie nei e eita te hoê taata e roo-ohie-hia i te maˈi ia rave anaˈe oia i teie mau ohipa. E au ra e te vai ra iho â te tahi ravea no te taata taitahi ia faaetaeta i to ˈna tino.”
Ua farii atoa te taote o Russell Pate no te Haapiiraa tuatoru no Carolina apatoa i te reira, i te na ôraa e: “Ua papu vau e e mau mirioni taata i rotopu i te huiraatira o te manaˈo ra e ahiri eita ratou e tae atu i te hoê fare faaetaetaraa tino tamoni ma te haamâuˈa e pae aˈe hora i te hebedoma i reira, aita ïa e ravea no te faaetaetaraa i te tino. Te manaˈo nei matou e e tia ia matou ia haamana i teie manaˈo e ia ori haere na raro ma te au noa ia oti te tamaaraa i te po e ohipa maitai mau te reira.”
I te mea e e haamaitai maa faaetaetaraa tino ia vai oraora maitai noa te tino, eita ra anei oe e nehenehe e ori haere na raro noa e aore ra e haere na nia i te eˈa paiumaraa ma te ore e rave i te piha faautaraa taata? No te aha e ore ai oe e vaiiho i to oe pereoo maa vahi atea rii i te vahi o ta oe e haere ra, peneiaˈe i te fare toa, ma te haere na raro noa i te toea o te eˈa? “Mea maitai aˈe maa ohipa i te ore roa e rave i te tahi mea,” ta te taote o Robert E. Leach, peretiteni no te faatitiaifaro melo no te Pu utuuturaa no te haapiiraa tuatoru no Boston, e parau ra.