Te neneiraa maere o te A ara mai na!
TE RAVE NEI TE HOÊ VAHINE TAIO I TE A ARA MAI NA! I MINNESOTA, HAU AMUI NO MARITE, i te ohipa no te hoê fare haapiiraa teitei i reira te taata tuatapapa i te mau mea ora o te moana ra o Sam LaBudde i te vauvauraa i te hoê tumu parau “Te haere nei te mau ouˈa ihea?” Ma te haamanaˈo e ua faahitihia o ˈna i roto i te A ara mai na! i te tumu parau “E faaorehia anei te taiˈaraa e te mau upeˈa haapainu?” (8 no me 1992), ua afai oia i te vea na muri iho ia ˈna i te oreroraa parau.
“I nia i te vea, ua papai au i te hoê nota na LaBudde Tane. Ua parau vau e ua manaˈo vau e oaoa oia i te iteraa e e operehia teie tumu parau maitai na te ao nei i roto e rave rahi reo e ua neneihia te vea i roto hau atu e 13 000 000 numera. I reira, ua tarima vau i to ˈu iˈoa e ua vaiiho vau i te A ara mai na! ma te hohora i nia i te pupiti e ua hoˈi atura vau i to ˈu parahiraa.
Aita i maoro, ite atura vau i te hoê taata i te haereraa i nia i te pupiti, i te raveraa i te vea, e i te haamataraa i te taio. Tau minuti i muri iho, ua hiˈo maira oia i nia e ua ani ma te reo puai e mai te peu e tei reira te taata tei vaiiho i te vea. I to ˈu afairaa i to ˈu rima i nia e to ˈu parauraa e ‘O vau,’ ua pou maira e ua parahi maira oia i pihai iho ia ˈu. Ua haamauruuru maira oia ia ˈu no te vea e ua parau o ˈna e te haafaahiahia nei oia ia faaite te hoê taata ia ˈna i te haamaramaramaraa o te haapapu ra i te ohipa aore ra te mau tupuraa i roto i to ˈna tuhaa fenua. Ua manaˈo râ oia e ua hape paha vau i te parauraa e 13 000 000 vea tei neneihia. Ua manaˈo o ˈna e ua hinaaro vau e parau e 13 000. Ua huri atura vau i te mau api matamua o te vea e ua faaite vau ia ˈna e 13 000 000 iho â. Ua maere oia. Ua maere roa atoa oia i te rahiraa reo teie vea e neneihia ˈi [i teie nei mahana e 74 reo]. Ua manaˈo o ˈna e ua operehia te vea i te mau Hau amui no Marite anaˈe, ua faataa râ vau e mea nafea te reira i te raveraahia na te ao nei.”
Mai te peu e e hinaaro oe ia haponohia na roto i te fare rata te hoê vea o te A ara mai na! i to oe fare, a papai mai i te Taatiraa “Te mau Ite no Iehova,” B.P. 518, Papeete, TAHITI, aore ra i te hoê o te mau vahi nohoraa i faataahia i te api 5.