Te mau raau taero, te peu tahutahu, e te Bibilia

Ua faaara o Paulo i te mau kerisetiano no te senekele matamua no nia i “te tahutahu.” (Galatia 5:20) Teie te auraa tumu o te parau heleni ta Paulo i faaohipa i ô nei, phar·ma·kiʹa, oia hoi “te raveraa i te mau raau taero.” “I te mea e rave te mau tahuˈa i te mau raau taero,” ta Te tatararaa i te Bibilia (beretane) e faataa ra “ua ravehia teie parau no te faataa i te pifao, te rahu, te peu hiˈohiˈo, e te peu tahutahu.”

E ere ïa i te mea maere e e tuhaa atoa ta te raau taero i roto i te peu tahutahu i teie nei tau. Ei hiˈoraa, ua faatiahia e e ravehia te ava e te raau taero no te farii i te mau melo apî i roto i te haamoriraa a Satani. Ua parau-atoa-hia e e ravehia te raau taero ia faaroo ohie noa te taata e ohipa ra i roto i te mau oroa a Satani.

Noa ˈtu te huru o te tupuraa, ua papai o Petero e “te hahaere nei” te Diabolo “mai te liona uuru ra, i te imiraa i te taata e pau ia ˈna ra.” (Petero 1, 5:8) Teie te auraa o te parau heleni ka·ta·piʹno, tei tatarahia na roto i te parau “e pau,” oia hoi “haamou i te auahi,” aore ra “haavî.” O te reira iho â ta te mau raau taero e te peu tahutahu e rave. Na te reira ïa e turai hua i te mau kerisetiano ia ape i te mau huru raveraa raau taero tano ore.—A faaau i te Korinetia 2, 4:4.