Te ite ore i te taio e te papai—Te hoê fifi no te ao taatoa

Na te papai vea a A ara mai na! i Nigeria

TE ORA ra o Almaz i Ethiopia. I te maˈiraahia ta ˈna tamahine, e mohina raau tei horoahia ta te taote i papai. Aita râ o Almaz i ite i te taio eaha te rahiraa raau e tano—ehia ta ˈna e horoa, e afea râ? Auaa, ua ite te hoê taata tapiri i te taio i te papai a te taote. Ua horoahia te raau ma te tano, e ua ora mai te aiû.

E taata faaapu o Ramu i Inidia. Ua tae te tau e faaipoipo ai ta ˈna tamahine, opua ihora oia e horoa aitarahu i ta ˈna fenua i te hoê taata horoa tarahu i te moni. I te mea e aita oia i ite i te taio e te papai, no te tarima i te papai o ta ˈna hoi i ore i taa, ua tapao oia i to ˈna rimarima. Tau avaˈe i muri iho ite atura o Ramu e e parau hoo fenua teie—i teie nei ua riro ta ˈna fenua i te taata ê.

E rave ohipa o Michael i roto i te hoê fare faaapu rahi i te mau Hau amui no Marite. Ua faaue te raatira ohipa ia horoa o ˈna i te tahi atu maa na te mau puaatoro. Ua itehia ia Michael e piti pute i roto i te fare vairaa tauihaa, aita râ o ˈna i ite i te taio i te papai i nia iho i te mau pute. Hape ihora oia i te raveraa i te pute. Tau mahana i muri iho, pohe atura te mau puaatoro. E raau taero ta Michael i faaamu. I reira iho, ua tiahihia o ˈna.

E nehenehe te ite ore i te taio e te papai e riro mai ei pau rahi. Ua erehia o Michael i ta ˈna ohipa. Ta ˈna fatu ohipa, e nǎnǎ puaatoro tupai ïa tei pau. Ua erehia o Ramu i to ˈna fenua. Ua nehenehe atoa hoi te aiû o Almaz e pohe.

Ia au i te UNESCO (Faanahoraa a te mau Nunaa Amui no te haapiiraa, te ite aivanaa e te ihotumu), ua hau atu i te hoê i nia i te maha o te feia paari o te huiraatira o te ao nei—hau atu i te 960 mirioni tane e vahine—te ore i ite i te taio e te papaia. I roto i te mau fenua navai ore, 1 i nia i te 3 o te feia paari tei ore i ite i te taio e te papai. Mai ia Almaz, Ramu, e o Michael, aita roa ˈtu teie mau mirioni taata e nehenehe e taa i te hoê tapao purumu, te hoê vea, aore ra te hoê irava Bibilia. Eita ïa ratou e nehenehe e taio i te mau haamaramaramaraa e rave rahi e vai ra i roto i te mau vea e te mau buka. Eita ratou e nehenehe e papai i te hoê rata aore ra e papai i te mau haamaramaramaraa e anihia no te faaî i te hoê parau uiraa ohie noa. Aita te rahiraa e nehenehe e tarima ma te papai i to ratou iˈoa. Eita roa ˈtu ratou e nehenehe e tataˈu ia noaa te hoê ohipa i reira e mea titauhia ia ite i te taio e te papai, e rave rahi te faaea ma te ohipa ore, ma te ore e haafaufaahia to ratou aravihi no te hamaniraa i te taoˈa, ma te ore e haamaitai i to ratou iho aravihi.

Aita to roto i teie mau numera te rahiraa o te feia paari o tei ite rii i te taio—tei ite i te taio e te papai rii aita râ i ravai no te taioraa e te papairaa i te mau mea fifi aˈe no nia i te mau ohipa o te mau mahana taitahi o te oraraa. I te mau Hau amui no Marite anaˈe iho, ua naeahia e 27 mirioni feia paari tei ite rii i te taio e te papai.

E no te mau tamarii? Aita i tapaohia te taatoaraa o te mau numera, no te mea aita te mau uiuiraa manaˈo i faatupuhia i roto i te mau fenua atoa, te manaˈo ra te Faufaa tauturu i te tamarii a te mau Nunaa Amui e e 100 mirioni tamarii faito matahiti e tano no te haere i te fare haapiiraa i te ao nei o te ore roa e tomo i roto i te hoê piha haapiiraa. Te tahi atu 100 mirioni te ore roa e faaoti i te omuaraa o te haapiiraa. Te mea mau, te faˈi ra te Piha Haamaramaramaraa Huiraatira a Te mau Nunaa Amui e i te mau mataeinaa o te mau fenua navai ore, o te afaraa noa o te mau tamarii tei horoahia hau atu i te maha matahiti haapiiraa tuatahi. E i roto i te tahi mau fenua maona, e rave rahi tamarii te haamâuˈa nei e rave rahi hora i mua i te afata teata hau atu i te fare haapiiraa.

E paari iho â te mau tamarii ite ore i te taio e te papai i rotopu i te feia paari ite ore i te taio e te papai. Eaha te mau mea te faatupu nei i teie fifi i te ao taatoa nei? Eaha te tia ia ravehia no te tauturu i te taata paari o te ore e ite i te taio e te papai? E hiˈopoahia teie mau uiraa i roto i te tumu parau i muri iho.

[Nota i raro i te api]

[Hohoˈa i te api 11]

Hau atu i te hoê i nia i te maha o te feia paari o te huiraatira te ore i ite i te taio e te papai